قازاقستاندا وتباسىلىق جانە تۇرمىستىق زورلىق-زومبىلىقتىڭ الدىن الۋعا باعىتتالعان اقپاراتتىق-اعارتۋشىلىق جۇمىستاردىڭ اۋقىمى كەڭەيىپ كەلەدى. سونىڭ ءبىرى – Tatulyq.kz جوباسى. 2026 جىلدىڭ قورىتىندىسى بويىنشا جوبا ماتەريالدارى مەن ءىس-شارالارى 5 ميلليون 910 مىڭنان استام ادامدى قامتىعان. ال پسيحولوگيالىق تەستىلەۋگە قاتىسقان 6 935 ادامنىڭ 44,75 پايىزىندا ورتاشا جانە جوعارى دەڭگەيدەگى ەموتسيونالدىق شيەلەنىس انىقتالعان.

بۇل تۋرالى استانادا وتكەن بريفينگتە «سەرپىن» الەۋمەتتىك دامۋ ۇلتتىق قورىنىڭ وكىلدەرى مالىمدەدى. كەزدەسۋدە جوبانىڭ ءبىر جىل ىشىندە اتقارعان جۇمىستارى، نەگىزگى كورسەتكىشتەرى جانە الداعى جوسپارلارى تانىستىرىلدى.

Tatulyq.kz جوباسى قازاقستان رەسپۋبليكاسى مادەنيەت جانە اقپارات مينيسترلىگىنىڭ ازاماتتىق باستامالاردى قولداۋ ورتالىعى ارقىلى بەرىلگەن مەملەكەتتىك گرانت نەگىزىندە جۇزەگە اسىرىلۋدا. نەگىزگى ماقساتى – تۇرمىستىق زورلىق-زومبىلىقتىڭ الدىن الۋ، وتباسىلىق قۇندىلىقتاردى نىعايتۋ، حالىقتىڭ قۇقىقتىق جانە پسيحولوگيالىق ساۋاتتىلىعىن ارتتىرۋ.

اقپاراتتىق جۇمىستار جوسپاردان 48 پايىزعا جوعارى ورىندالعان

جوبا اياسىنداعى اقپاراتتىق ناۋقان الەۋمەتتىك جەلىلەر مەن ينتەرنەت پلاتفورمالاردا جۇرگىزىلدى. وندا ساراپشىلاردىڭ پىكىرلەرى، تاقىرىپتىق ماقالالار، بەينەروليكتەر، ينفوگرافيكالار جانە قىسقا فورماتتاعى ۆيدەوماتەريالدار جاريالاندى.

جالپى اقپاراتتىق قامتۋ 5 ميلليون 910 مىڭ 345 ادامدى قۇراعان. بۇل جوسپارلانعان 4 ميلليون ادامدىق كورسەتكىشتەن 148 پايىزعا جوعارى.

اتاپ ايتقاندا، 13 بەينەروليكتىڭ جيىنتىق قارالىمى 3 ميلليوننان اسقان. ءار ۆيدەوماتەريال ورتا ەسەپپەن 2 مىڭنان استام لايك جيناپ، 600-دەن استام پىكىرگە يە بولعان.

اقپاراتتىق ناۋقانداردا وتباسىلىق جاۋاپكەرشىلىك، جەكە شەكارا، ستالكينگ، بۋللينگ جانە تۇرمىستىق زورلىق-زومبىلىق ماسەلەلەرى قامتىلدى.

سونداي-اق «ەر بولۋ – جاۋاپكەرشىلىك» جوباسى اياسىندا ءتورت سۇحبات، «وي قوزعاۋ» پودكاستىنىڭ جەتى شىعارىلىمى، ءۇش وقىتۋ ۆەبينارى جانە «تاتۋ وتباسى» ونلاين-مەكتەبىنىڭ جەتى ساباعى ازىرلەندى.

پسيحولوگيالىق زەرتتەۋ: قاتىسۋشىلاردىڭ 44,75 پايىزىندا ەموتسيونالدىق شيەلەنىس بايقالعان

جوبانىڭ تاعى ءبىر ماڭىزدى باعىتى – ازاماتتاردىڭ پسيحولوگيالىق جاعدايىن باعالاۋ جانە ءتيىستى اقپاراتتىق قولداۋ كورسەتۋ.

ءتورت پسيحولوگيالىق تەست بويىنشا 6 935 ادامنىڭ جاۋابى تالدانعان. ناتيجەسىندە قاتىسۋشىلاردىڭ 44,75 پايىزىندا ورتاشا جانە جوعارى دەڭگەيدەگى ەموتسيونالدىق شيەلەنىس انىقتالدى.

سونىمەن قاتار 28,4 پايىزىندا جەكە شەكارانى قورعاۋ داعدىلارىن جەتىلدىرۋ قاجەتتىلىگى بايقالسا، 22,85 پايىزىندا وتباسىلىق قارىم-قاتىناسقا بايلانىستى قيىندىقتار تىركەلگەن.

جوبا وكىلدەرىنىڭ تۇسىندىرۋىنشە، بۇل تەستىلەۋ ناتيجەلەرى مەديتسينالىق نەمەسە كلينيكالىق دياگنوز بولىپ سانالمايدى. ساۋالنامالار ازاماتتاردىڭ وزىندىك باعالاۋىنا نەگىزدەلگەن جانە ولاردىڭ پسيحولوگيالىق احۋالىن، كۇيزەلىس دەڭگەيىن، جەكە شەكارانى ساقتاۋ مەن وتباسىلىق قارىم-قاتىناس ەرەكشەلىكتەرىن باعالاۋعا باعىتتالعان.

زەرتتەۋ ناتيجەلەرى بويىنشا سترەسستى باسقارۋ، جەكە شەكارانى قورعاۋ جانە وتباسىلىق قارىم-قاتىناستى جاقسارتۋ جونىندە ۇسىنىمدار ازىرلەنگەن.

ستالكينگ پەن نەكەگە ماجبۇرلەۋگە قاتىستى زاڭنامالىق وزگەرىستەر ءتۇسىندىرىلدى

بريفينگ بارىسىندا قۇقىقتىق ساۋاتتىلىقتى ارتتىرۋ باعىتىنداعى جۇمىستار دا تانىستىرىلدى.

2025 جىلعى 16 قىركۇيەكتەن باستاپ قازاقستان رەسپۋبليكاسىنىڭ قىلمىستىق كودەكسىنە ستالكينگ پەن نەكەگە تۇرۋعا ماجبۇرلەۋ ءۇشىن جاۋاپكەرشىلىك ەنگىزىلگەنى اتاپ ءوتىلدى.

وسى زاڭنامالىق وزگەرىستەردى ءتۇسىندىرۋ ماقساتىندا 2026 جىلدىڭ اقپان ايىنان باستاپ ارنايى اقپاراتتىق ءىس-شارالار ۇيىمداستىرىلعان. ولاردىڭ قاتارىندا زاڭگەرلەر مەن ساراپشىلاردىڭ قاتىسۋىمەن وتكەن ۆەبينارلار، جاستارعا ارنالعان ترەنينگتەر جانە اقپاراتتىق كەزدەسۋلەر بار.

ءىس-شارالاردا ستالكينگتىڭ قۇقىقتىق سالدارى، قىز الىپ قاشۋدىڭ قىلمىستىق جاۋاپكەرشىلىككە اكەلەتىنى، تۇرمىستىق زورلىق-زومبىلىقتىڭ جاسىرىن تۇرلەرى مەن جەكە قاۋىپسىزدىك ماسەلەلەرى قاراستىرىلدى.

سونىمەن بىرگە «ايەل. قۇقىق. قاۋىپسىزدىك» سەرياسىمەن ەكى ونلاين-جۋرنال، تۇرمىستىق زورلىق-زومبىلىق، بۋللينگ جانە حاراسسمەنتتىڭ سەبەپتەرىنە ارنالعان ءۇش اناليتيكالىق ماقالا دايىندالدى. مەدياكومپانيا جۇرگىزۋگە قاتىستى ەكى ادىستەمەلىك ۆيدەونۇسقاۋلىق تا ازىرلەندى.

جاستارعا ارنالعان وقىتۋ كەزدەسۋلەرى الماتى، قاراعاندى، قىزىلوردا، كوكشەتاۋ، تۇركىستان جانە سەمەي قالالارىندا وتكىزىلدى. وعان ستۋدەنتتەر، جاستار، پەداگوگتەر مەن پسيحولوگتار قاتىستى.

111 بايلانىس ورتالىعى تۋرالى اقپارات كەڭىنەن تاراتىلدى

جوبانىڭ جەكە باعىتى ازاماتتارعا پسيحولوگيالىق جانە الەۋمەتتىك كومەك كورسەتۋ تەتىكتەرىن تۇسىندىرۋگە ارنالدى.

وسى ماقساتتا 111 بايلانىس ورتالىعى، وڭىرلەردەگى داعدارىس ورتالىقتارى مەن سەنىم تەلەفوندارى تۋرالى 20 اقپاراتتىق ماقالا جاريالاندى.

ماتەريالداردا تۇرمىستىق زورلىق-زومبىلىققا تاپ بولعان جاعدايدا قايدا جۇگىنۋ كەرەكتىگى، قانداي قىزمەتتەر كومەك كورسەتە الاتىنى جانە زورلىق-زومبىلىق بەلگىلەرىن قالاي انىقتاۋعا بولاتىنى جونىندە اقپارات بەرىلگەن.

پسيحولوگ الينا اسانوۆانىڭ تانىستىرىلىمىندا دا پسيحولوگيالىق تەستىلەۋ قورىتىندىلارى مەن ازاماتتارعا قولجەتىمدى كومەك كورسەتۋ ارنالارى تۋرالى مالىمەتتەر ۇسىنىلدى.

جوبا جۇمىسى 2027 جىلى دا جالعاسادى

بريفينگ سوڭىندا جوبا مەنەدجەرى ءساربىناس بولەگەن كەلەسى جىلعا ارنالعان جوسپارلار مەن جاڭا جۇمىس باعىتتارىن تانىستىردى.

ونىڭ ايتۋىنشا، جوبا اياسىندا ازىرلەنگەن اقپاراتتىق جانە وقۋ ماتەريالدارى اشىق قولجەتىمدى بولىپ، الداعى ۋاقىتتا دا اعارتۋشىلىق ماقساتتا پايدالانىلاتىن بولادى.

جالپى، Tatulyq.kz جوباسىنىڭ 2026 جىلعى قورىتىندىسى وتباسىلىق زورلىق-زومبىلىقتىڭ الدىن الۋ باعىتىندا اقپاراتتىق ءتۇسىندىرۋ، پسيحولوگيالىق ساۋاتتىلىق جانە قۇقىقتىق ءبىلىم بەرۋ جۇمىستارىنىڭ قاتار جۇرگىزىلىپ جاتقانىن كورسەتتى.

سونىمەن بىرگە مامانداردىڭ پىكىرىنشە، مۇنداي باستامالاردىڭ تيىمدىلىگىن تەك اۋديتوريانى قامتۋ كورسەتكىشىمەن باعالاۋ جەتكىلىكسىز. نەگىزگى ناتيجە – ازاماتتاردىڭ ءوز قۇقىقتارىن ءبىلۋى، قاجەتتى جاعدايدا كومەككە جۇگىنە الۋى جانە وتباسىندا قاۋىپسىز قارىم-قاتىناس مادەنيەتىنىڭ قالىپتاسۋى.

وتباسىلىق زورلىق-زومبىلىقتىڭ الدىن الۋ – تەك مەملەكەتتىك ورگانداردىڭ مىندەتى ەمەس. بۇل باعىتتا قوعام، ءبىلىم بەرۋ ۇيىمدارى، ماماندار جانە ءاربىر ازاماتتىڭ ورتاق جاۋاپكەرشىلىگى ماڭىزدى.

Abai.kz