ابۋ-دابيدە ەكى كۇن ءجۇرىپ ءۇش تاراپ - اقش، ۋكراينا مەن رەسەي «اۋقىمدى تۇتقىن الماسۋ» جاساساتىن بولىپ قايتقان. «وزگە ماسەلەلەردى اشىپ ايتا المايمىز، بىراق ماڭىزدى تاقىرىپتار تالقىلاندى»، - دەپ تاراسقان.

سونان ىلە-شالا ۋيتكوفف پەن كۋشنەر ماسكەۋگە اتتانعان. اۋەلى پۋتينمەن، ونان سوڭ زەلەنسكيمەن جۇزبە-ءجۇز سويلەسەتىنى ايتىلعان.

كەشە ماسكەۋدە اقش وكىلدەرى 1,5-2 ساعات پۋتينمەن سويلەستى دە، ەشقايدا بۇرىلماستان دۋبلينگە ۇشىپ كەتتى. زەلەنسكي سوندا ءجۇر…

ۋيتكوففتىڭ بار ايتقانى:

- ۋكراينا بويىنشا كەلىسسوزدەردىڭ كەلەسى راۋندىنا ەۋروپا دا قاتىسادى. بۇگىن بۇل ماسەلە بويىنشا شەشىم تاپتىق، - بولدى.

بۇعان دەيىن ۋكرايناداعى سوعىستى بەيبىت رەتتەۋ بويىنشا كەلىسسوزدەرگە ەۋروپاننىڭ قاتىسۋىنا رەسەي ءۇزىلدى-كەسىلدى قارسى بولىپ كەلگەن.

ال پۋتين نە دەدى، كرەمل قانداي تالاپ قويعانىن رەسەيباسىنىڭ باس كەڭەسشىسى يۋري ۋشاكوۆ ايتتى.

ۋشاكوۆ ايتادى: اقش-پەن رەسەي تالقىلاپ جاتقان «ەۋروپانىڭ جاڭا قاۋىپسىزدىك ارحيتەكتۋراسى» ماسەلەسىندە رەسەي تالابى - ناتو-نى 1997 جىلعى قالپىنا قايتارۋ!

بۇل ماسەلە ماسكەۋدە، كرەملدە اق ءۇيدىڭ ارنايى وكىلدەرى كۋشنەر-ۋيتكوفف تاندەمى پۋتينمەن جولىققاندا دا تالقىلانعان.

ءپۋتيننىڭ تالابى، سايكەسىنشە ماسكەۋدىڭ قالاۋى - ناتو-نى ودان ءارى كەڭەيتپەۋ تۋرالى تالاپ. ال 1997 جىلدان كەيىن بلوكقا كىرگەن ەلدەر اۋماعىنا اليانستىڭ وزگە مۇشەلەرىنەن اسكەري كونتينگەنت، اسكەري كۇش ورنالاستىرماۋ.

جانەسى تاعى بار - اليانستان تىس پوستكەڭەستىك مەملەكەتتەرمەن، سونىڭ ىشىندە استىن سىزىپ تۇرىپ ۋكراينامەن اسكەري ىنتىماقتاستىقتى شەكتەۋ!

سونداي-اق، «رەسەي — ناتو» اكتىسىنە قول قويىلعان ساتتەگى اليانس كۇشتەرىنىڭ كونفيگۋراتسياسىنا قايتىپ ورالۋ تالابى دا ايتىلدى. ال بۇل قۇجاتقا 1997 جىلى قول قويىلعان ەكەن.

ياعني، پۋتين ناتو-نىڭ 1997 جىلعى شەكارالارىنا قايتا ورالۋىن تالاپ ەتىپ وتىر. ال ول كەزدە شىعىس ەۋروپا ەلدەرى ءالى ناتو قۇرامىنا كىرمەگەن ەدى.

قاپەرلەرىڭىزگە سالساق، 1997 جىلدان بەرى ناتو قۇرامىنا باقانداي 16 مەملەكەت قوسىلعان. ولار:

1999 جىلى - ۆەنگريا، پولشا، چەحيا;

2004 جىلى - بولگاريا، لاتۆيا، ليتۆا، رۋمىنيا، سلوۆاكيا، سلوۆەنيا، ەستونيا;

2009 جىلى - البانيا مەن حورۆاتيا;

2017 جىلى - قاراتاۋ (مونتونەگرو);

2020 جىلى - سولتۇستىك ماكەدونيا;

2023 جىلى - فينليانديا;

2024 جىلى - شۆەتسيا كىردى.

پۋتين ەندى وسى ەلدەردى ناتو-دان تىس قالدىرۋدى تالاپ ەتىپ، «نە شىقسىن، نە اليانسپەن بايلانىسسىز قالسىن»، - دەپ وتىر…

سونىمەن قاتار، پۋتين وسى جولى باسقا دا ماسەلەلەردى ورتاعا قويعان. بىراق، ۋشاكوۆ ول جايلى ءۇنسىز قاپتى…

نۇرگەلدى ابدىعانيۇلى

Abai.kz