ساپتارىڭ ءتۇزۋ بولسىن قازبات ساربازدارى!
قوعامدا «قازبات» اتىمەن تانىلعان بىتىمگەرلەر باتالونى – قازاقستان قارۋلى كۇشتەرىنىڭ بىتىمگەرشىلىك كۇشى بۇۇ ميسسياسىن اتقارۋشى، ەلىمىزدىڭ ەڭ تاڭداۋلى اسكەري كۇشى سانالاتىن قۇراما. بۇل ءجاي عانا قاتارداعى قۇراما ەمەس. ونىڭ قىزمەتى اسكەري قاۋىپسىزدىكتى، حالىقارالىق ديپلوماتيانى جانە ەلىمىزدىڭ سىرتقى ساياساتىن جۇزەگە اسىرۋمەن جالعاسادى.
ونىڭ قۇرىلۋ تاريحى 2000 جىلعا تىرەلەدى. ال قازبات بۇۇ اتىنان ەڭ العاش رەت 2003 جىلى يراكتاعى اسكەري وپەراتسيالارعا قاتىسۋىمەن تانىلدى. ودان كەيىن ءبىزدىڭ ساربازدارىمىز 2014 جىلعى بۇۇ جۇرگىزگەن وپەراتسيالارعا قاتىستى.
قازبات نە ءۇشىن قۇرىلدى؟
ونىڭ قۇرىلۋىنا (21 قاڭتار 2000 ج.) مىناداي فاكتورلار ىقپال ەتتى:
- تاۋەلسىز مەملەكەت رەتىندە قازاقستاننىڭ ءوز بەدەلىن ارتتىرۋ;
- الەمدە قاۋىپسىزدىك پەن بەيبىتشىلىكتى ساقتاۋ تۋرالى بۇۇ حالىقارالىق ميسسياسىنا قاتىسۋ;
- سول ارقىلى اسكەري دامۋدى الەمدىك ستاندارتتارعا، جاڭا تەحنولوگيالارعا سايكەستەندىرۋ;
- الەممەن ديپلوماتيالىق جولمەن قاتار اسكەري تاجىريبە الماسۋ باعىتىندا قاتىناستار ورناتۋ.
بۇل جەردە ناتو‑نىڭ «بەيبىتشىلىك ءۇشىن كۇش بىرىكتىرۋ» باعدارلاماسى دا ماڭىزدى رول اتقارعانىن اتاپ ءوتۋىمىز قاجەت.
ءسويتىپ، «قازباتتىڭ» قۇرىلۋى تاۋەلسىز مەملەكەت رەتىندەگى قازاقستاننىڭ اسكەري سالاداعى ەڭ ال،اشقى قادامدارىنىڭ ءبىرى بولىپ سانالادى.
وسى ۋاقىتقا دەيىن «قازبات» قانداي اسكەري وپەراتسيالارعا قاتىستى؟
«قازبات» ەڭ العاشقى اسكەري تاجىريبەسىن يراك مەملەكەتىندە باستادى. 2003 جىلى حالىقارالىق تۇراقتىلىق ينجەنەر‑ساپەرلىق كۇشتەرىنىڭ قاتارىندا قازاقستاندىق اسكەريلەر يراكتاعى وپەراتسيالارعا قاتىستى. ول ميسسيا 2008 جىلعا دەيىن جالعاستى. وسى ۋاقىتتا ەلىمىزدىڭ 290 ساربازى وسى تاجىريبەدەن ءوتتى. قاۋىپتى ميسسيانى ويداعىداي اتقاردى.
وندا ولار:
- ممينالاردى زالالسىزداندىردى;
- اۋىز سۋ كوزدەرىن ۋلى زاتتاردان تازالادى;
- يراك اسكەريلەرىن ساپەرلىق جۇمىسقا ۇيرەتتى;
- جەرگىلىكتى تۇرعىندارعا مەديتسينالىق جاردەم ەتتى.
قورعانىس مينيسترلىگىنىڭ دەرەگى بويىنشا، وسى ۋاقىتتا ءبىزدىڭ ساربازدار ءتورت ميلليوننان استام جارىلعىش زاتتاردى زالالسىزداندىردى، جەتى ميلليون كۋب مەترگە تەڭ سۋدا تازارتتى، بەس مىڭنان استام ادامعا مەديتسينالىق كومەك كورسەتتى.
الايدا، قاسىرەتكە وراي، بەيبىتشىلىك ميسسيا دا قۇرباندىقسىز بولمايدى ەكەن – 2005 جىلدىڭ 5‑قاڭتارىندا يراكتا قازاقستاندىق وفيتسەر قايرات قۇداباەۆ ءوز ميسسياسىن اتقارۋ بارىسىندا ەرلىكپەن قازا تاپتى. ونىڭ ءاتى‑جونى قازاقستاننىڭ قارۋلى كۇشتەرى تاريحىنا ماڭگىلىككە جازىلدى.
ەلىمىزدىڭ بەيبىت ءومىر ءسۇرۋى ءۇشىن ەلىمىزدەن تىسقارى جاقتا قىزمەتتە جۇرگەن قازبات ساربازدارى ءالى دە الدىڭعى شەپتە! ساپتارىڭ ءتۇزۋ بولسىن دەيمىز ولارعا.
Abai.kz
