بەكتەنوۆ: 6,5 ترلن تەڭگە قۇرىلىسقا جۇمسالادى!
قازاقستاندا «حالىقتىق قۇرىلىس» باعدارلاماسىن جۇزەگە اسىرۋعا ۇلتتىق قوردان شامامەن 6,5 ترلن تەڭگە باعىتتاۋ جوسپارلانىپ وتىر.
پرەمەر-مينيستر ولجاس بەكتەنوۆ بۇل قارجىنىڭ وتاندىق ءوندىرىستى دامىتۋعا دا ىقپال ەتۋى كەرەكتىگىن ايتتى.
ۇكىمەت قانداي تاپسىرما بەردى؟
* قۇرىلىس جوبالارىنا قازاقستاندىق وندىرۋشىلەردى كەڭىنەن تارتۋ;
* قاجەتتى ماتەريالدار مەن جابدىقتاردىڭ كولەمىن الدىن الا انىقتاۋ;
* ساتىپ الۋ جوسپارلارىن ەرتەرەك جاريالاۋ;
* وتاندىق كاسىپورىنداردىڭ وندىرىستىك قۋاتىن تولىق پايدالانۋ;
* ءوندىرىستى كەڭەيتۋگە قاجەتتى قارجىلاندىرۋدى قامتاماسىز ەتۋ.
قازىر قازاقستاندىق كاسىپورىندار ەلدەگى نەگىزگى قۇرىلىس ماتەريالدارىنا سۇرانىستىڭ 73%-ىن قامتاماسىز ەتىپ وتىر.
«ونەركاسىپ جانە قۇرىلىس مينيسترلىگى اكىمدىكتەرمەن، „بايتەرەك“ حولدينگى جانە „اتامەكەن“ ۇلتتىق پالاتاسىمەن بىرلەسىپ، اتالعان باعدارلاماعا وتاندىق وندىرۋشىلەردىڭ قاتىسۋىن قامتاماسىز ەتسىن»، – دەدى بەكتەنوۆ.
باعدارلامانىڭ ورىندالۋىن باقىلاۋ پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆقا جۇكتەلدى.
Abai.kz