سەيسەنبى, 17 قاراشا 2026
جاڭالىقتار 189 0 پىكىر 17 قاراشا, 2026 ساعات 16:02

AI-Quryltai: العاش رەت جي كومەگىمەن زاڭ ازىرلەندى

سۋرەت: قۇرىلتايدىڭ ءباسپاسوز قىزمەتىنەن الىندى.

«بالالاردىڭ تسيفرلىق جانە اقپاراتتىق قاۋىپسىزدىگى تۋرالى» جاڭا زاڭ جوباسى قۇقىقتىق تالداۋ جۇرگىزۋگە قابىلەتتى جاساندى ينتەللەكت مودەلى كىرىكتىرىلگەن AI-Quryltai ينتەللەكتۋالدى ورتاسىنىڭ كومەگىمەن ازىرلەنگەن العاشقى زاڭ جوباسى بولدى. بۇل تۋرالى قۇرىلتاي ۆيتسە-سپيكەرى دينارا زاكيەۆا ۇكىمەت ساعاتىندا حابارلادى.

پلاتفورمانىڭ كومەگىمەن زاڭ جوباسىن ازىرلەۋشى دەپۋتاتتارعا تسيفرلىق جانە اقپاراتتىق ورتاداعى بالالار قاۋىپسىزدىگىنىڭ قازىرگى جاي-كۇيىنە كەشەندى تالداۋ جۇرگىزىلدى جانە ۇسىنىلدى. وعان ۇلكەن دەرەكتەر، ازاماتتاردىڭ وتىنىشتەرى، اتا-انالاردىڭ، ساراپشىلار مەن قوعام وكىلدەرىنىڭ ناقتىلاعان ماسەلەلەرىن تالداۋ، سونداي-اق ىقتيمال سىن-قاتەرلەردى باعالاۋ جانە حالىقارالىق تاجىريبەنى زەرتتەۋ نەگىز بولدى.

سونىمەن قاتار، 800 مىڭنان استام نورماتيۆتىك قۇقىقتىق اكتىلەر بازاسى بىرىكتىرىلگەن AI-Quryltai شەڭبەرىندە ارنايى وقىتىلعان زاڭنامالىق مودەل العاش رەت زاڭ جوباسىنىڭ ءماتىنىن قۇرۋعا تىكەلەي پايدالانىلدى. بۇل زاڭناماعا ەنگىزىلەتىن وزگەرىستەردىڭ اۋقىمى مەن تولىقتىعىن ارتتىرۋعا جانە قايشىلىقتاردى بولدىرماۋعا مۇمكىندىك بەردى.

– ماسەلەن، پلاتفورمانىڭ كومەگىمەن جاڭا قاۋىپتەر مەن تسيفرلىق تەحنولوگيالاردىڭ دامۋىن ەسكەرە وتىرىپ، بالالاردى تسيفرلىق جانە اقپاراتتىق ورتادا قورعاۋ جونىندەگى شارالار كەشەنى پىسىقتالدى. بۇل شارالار بارلىق پلاتفورمالارعا «اتا-انا باقىلاۋى» تەتىگىن ەنگىزۋگە قاتىستى بولىپ وتىر. ياعني، بالالارعا ارنالعان «سۇزگى» ەنگىزىلىپ، سايكەسىنشە بارلىق تاڭبالانباعان جانە تەكسەرىلمەگەن تسيفرلىق جانە اقپاراتتىق ونىمدەر، قوسىمشالار، ويىندار بالاعا قول جەتىمسىز بولادى. سونداي-اق، پلاتفورمالارعا بارلىق تسيفرلىق ونىمدەردى، سونىڭ ىشىندە قوسىمشالار مەن ويىنداردى تاڭبالاۋ، ولاردى ۆەريفيكاتسيالاۋ، سونداي-اق قاۋىپتەر مەن بۇزۋشىلىقتار انىقتالعان جاعدايدا بۇعاتتاۋ جونىندەگى تالاپتاردى ەنگىزۋ ۇسىنىلادى. بارلىعى 120-دان استام تۇزەتۋ ازىرلەندى، – دەپ اتاپ ءوتتى دينارا زاكيەۆا.

ءوز كەزەگىندە قۇرىلتاي دەپۋتاتى، جاساندى ينتەللەكت زەرتحاناسىنىڭ جەتەكشىسى ەكاتەرينا سمىشلياەۆا AI-Quryltai جۇيەسىن ەنگىزۋ ارقىلى زاڭ شىعارۋ قىزمەتىنىڭ ساپاسىن ارتتىرۋعا ارنالعان ينتەللەكتۋالدى ورتا قالىپتاستىرىلىپ جاتقانىن اتاپ ءوتتى.

– ەگەر تسيفرلاندىرۋ قۇجاتتاردى، راسىمدەردى جانە ءوزارا ءىس-قيمىلدى ەلەكتروندىق ورتاعا كوشىرۋگە مۇمكىندىك بەرسە، AI-Quryltai اقپاراتپەن جۇمىس ىستەۋ ءتاسىلىن ساپالى تۇردە وزگەرتۋگە كومەكتەسۋى ءتيىس. بۇل قولدانىستاعى تسيفرلىق ينفراقۇرىلىم نەگىزىندە جاڭا ينتەللەكتۋالدى قابات – زاڭ شىعارۋ قىزمەتىنىڭ ءارتۇرلى كەزەڭدەرىندە دەپۋتاتتار مەن قۇرىلتاي اپپاراتىنىڭ قىزمەتكەرلەرىنە كومەكتەسەتىن ءوزارا بايلانىستى جاساندى ينتەللەكت اگەنتتەرى مەن مامانداندىرىلعان مودۋلدەر جۇيەسىن قالىپتاستىرۋ تۋرالى بولىپ وتىر، – دەدى دەپۋتات.

ەكاتەرينا سمىشلياەۆانىڭ ايتۋىنشا، AI-Quryltai ەكوجۇيەسى ءوزارا بايلانىستى بەس باعىتتى قامتيدى. ولار – ينتەللەكتۋالدى اناليتيكا، زاڭگەرلىك مودۋل، ينتەللەكتۋالدى ساراپتاما، رەتتەۋشىلىك اسەردى باعالاۋ جانە ونىڭ سالدارىن مودەلدەۋ، سونداي-اق قۇقىق قولدانۋ تاجىريبەسىنە مونيتورينگ جۇرگىزۋ. الداعى ۋاقىتتا جاساندى ينتەللەكت قۇرالدارى اۋقىمدى دەرەكتەردى وڭدەۋگە، قۇقىقتىق قايشىلىقتاردى انىقتاۋعا، ىقتيمال تاۋەكەلدەردى باعالاۋعا جانە قابىلدانعان نورمالاردىڭ قولدانىلۋ ناتيجەلەرىن باقىلاۋعا مۇمكىندىك بەرەدى.

بۇل رەتتە دەپۋتات جاساندى ينتەللەكت زاڭ شىعارۋ قىزمەتىندە ادامدى الماستىرمايتىنىن اتاپ ءوتتى.

– جاساندى ينتەللەكت مەملەكەتتىك ساياساتتىڭ مازمۇنىن ايقىندامايدى جانە قۇقىقتىق شەشىمدەر قابىلدامايدى. ول مامانعا نورماتيۆتىك-قۇقىقتىق جاعدايدى تولىق كورۋگە جانە قۇقىقتىق ماتەريالدى ساپالىراق دايىنداۋعا كومەكتەسەدى، – دەدى ەكاتەرينا سمىشلياەۆا.

دەپۋتاتتىڭ ايتۋىنشا، زاڭ جوباسىن ازىرلەۋ بارىسىندا AI-Quryltai كومەگىمەن قالىپتاستىرىلعان بارلىق ۇسىنىستار شاقىرىلعان زاڭگەرلەر مەن ساراپشىلاردىڭ قاتىسۋىمەن ازىرلەۋشى دەپۋتاتتاردىڭ تەكسەرۋىنەن جانە قوسىمشا پىسىقتاۋىنان ءوتتى.

قازىرگى ۋاقىتتا زاڭ جوباسى ۇكىمەتتىڭ قورىتىندىسىن الۋعا جولدانۋدا. ونى پىسىقتاۋ قۇرىلتايداعى جۇمىس توبى اياسىندا جالعاسادى.

Abai.kz

0 پىكىر