كانادا بيلىگى رەسەيدىڭ ۋكرايناداعى داعدارىسقا الىپ كەلگەن  ارەكەتتەرىن ايىپتاپ، 6 مامىردا جاريالاعان سانكتسيالارىن كەڭەيتە ءتۇستى.  BBC-دىڭ اقپاراتىنا ساي كانادا ۋكرايناداعى جاعدايدى حالىقارالىق بەيبىتشىلىك پەن قاۋىپسىزدىك تالاپتارىنىڭ ورەسكەل بۇزىلۋى دەپ سيپاتتاپ، پۋتين رەجيمى اگرەسسياسىن جاۋاپسىز قالدىرمايتىنىن ەسكەرتكەن.  مالىمدەمەگە ساي ەندى سانكتسيالار ساياسي جاۋاپكەرشىلىگى بار تۇلعالارعا سالىنۋدا.  اتاپ ايىتساق رەسەي قارۋلى كۇشتەرىنىڭ شتاب باستىعى ۆالەري گەراسيموۆ، ۋكراينا شىعىسىنداعى رەسەيشىل سەپەراتيس جەتەكشىلەرىنىڭ ءبىرى يگور سترەلكوۆ، سونداي-اق رەسەي مەملەكەتتىك دۋماسىنىڭ ورىنباسار حاتشىسى - سەرگەي نەۆەروۆ پەن ليۋدميلا شۆەتسوۆا(ەكەۋى دە "ەدينوي روسسي" پارتياسىنان.) سياقتى تۇلعالار قارا تىزىمگە ىلىككەن.

سونىمەن قاتار بۇل تىزىمدە ۋكراينا ازاماتتارى دا بار. ولار -  جاريالانعان جاڭا ايماقتاردىڭ بيلىگىنە كەلگەن، لۋگانسك وبلىسىنىڭ گۋبەرناتورى گەرمان پروكوپيۆ، «دونەتسك حالىق رەسپۋبليكاسىنىڭ» باسشىسى اندرەي پۋرگين مەن دەنيس پۋشيلين، «دونباسس حالىق جاساعى» باسشىسى سەرگەي تسىپلاكوۆ.

ەستەرىڭىزدە بولسا 6 مامىردا جاريالانعان كانادا سانكتسياسىنا رەسەيلىك 16 كومپانياعا كىرگەن. ول تىزىمدە ءپۋتيننىڭ جاقىن جاقتاستارى جانە 23 ناۋرىزدا اقش جاريالانعان سانكتسيانىڭ قارا  تىزىمىنە ەنگەندەر بار بولاتىن.

بۇگىن سونداي-اق ەۋرووداق تا قارا تىزىمگە جاڭادان ەنگەن تۇلعالاردىڭ ەسىمىن جاريالادى. «ازاتتىقتىڭ» حابارلاۋىنشا تىزىمدە رەسەيدىڭ قىرىمدى اننەكتسيالاپ الۋىنا قاتىسى بار شەنەۋنىكتەر - رەسەي پرەزيدەنتى اپپاراتى باسشىسىنىڭ ءبىرىنشى ورىنباسارى ۆياچەسلاۆ ۆولودين، رەسەي اۋە دەسانتى كۇشتەرىنىڭ قولباسشىسى ۆلاديمير شامانوۆ، رەسەي مەملەكەتتىك دۋماسى كونستيتۋتسيالىق كوميتەتىنىڭ باسشىسى ۆلاديمير پليگين، رەسەي فەدەرالدىق ميگراتسيالىق قىزمەتى باسشىسىنىڭ مىندەتىن اتقارۋشى پەتر ياروش بار. سانكتسيالار بۇلارعا قوسا ۋكراينانىڭ شىعىسىنداعى سەپاراتيستەردىڭ جەتەكشىلەرىنە - سلاۆيانسكىنىڭ ءوزىن-ءوزى جاريالاعان ۆياچەسلاۆ پونومارەۆكە، دونەتسكىدەگى سەپاراتيستىك اسكەري وتريادتىڭ باسشىسى يگور بەزلەرگە جانە ءوزىن-ءوزى جاريالاعان دونەتسك حالىق رەسپۋبليكاسى ورتالىق سايلاۋ كوميسسياسىنىڭ باسشىسى رومان لياحينگە دە سالىنعان.  تىزىمدە رەسەي قىرىمدى اننەكسيالاپ العاننان كەيىن قىرىمنىڭ جاڭا بيلىگى تاركىلەگەن چەرنومورنەفتەگاز جانە فەودوسيا كومپانيالارى دا بار.

اباي-اقپارات