ەلىنە ۇران بولعان ەر جانىبەك
11 مامىر كۇنى الماتىدا XVIII عاسىرداعى قازاق حالقىنىڭ جوڭعارلارعا قارسى ۇلت-ازاتتىق قوزعالىسىندا قول باستاعان قاھارمان باتىرلاردىڭ ءبىرى - ەر جانىبەك بەرداۋلەتۇلىنىڭ 300 جىلدىعىنا وراي جارىق كورگەن باسىلىمداردىڭ تۇساۋكەسەرى ءوتتى.
تۇساۋكەسەر بارىسىندا "ەر جانىبەك" حالىقارالىق قورىنىڭ دەمەۋشىلىگىمەن جارىق كورگەن «ەر جانىبەك – 300 جىل» انىقتامالىق-بيبليوگرافيالىق عىلىمي جيناعى، موڭعولياداعى قازاق جازۋشىسى سۇلتان تاۋكەيۇلىنىڭ «اقىر جانىبەك» رومانى، «كەرەيدە باتىر جانىبەك" اتتى اۋديوبەينە جيناق جۇرتشىلىققا تانىستىرىلدى.
تۇساۋكەسەر راسىمىنە عالىم، سىنشى، ادەبيەتتانۋشى، پروفەسسور تۇرسىنبەك كاكىشەۆ، دۇنيەجۇزى قازاقتارى قاۋىمداستىعى توراعاسىنىڭ ورىنباسارى تالعات ماماشەۆ، الماتى قالاسى ءماسليحاتىنىڭ حاتشىسى تولەۋبەك مۇقاشەۆ، "ەر جانىبەك" حالىقارالىق قورىنىڭ پرەزيدەنتى ماقسۇت تەمىرباەۆ، تاريح عىلىمدارىنىڭ كانديداتى جانىمحان وشان، فيلولوگيا عىلىمدارىنىڭ كانديداتى، قر مادەنيەت قايراتكەرى بازاربەك اتىعاي قاتىستى.
تۇساۋكەسەردەن باتىردىڭ رۋحىنا ارنالىپ، اس بەرىلدى. اس بارىسىندا قوعام قايراتكەرى بالتاش تۇسىنباەۆ، بەلگىلى ساياساتتانۋشى ايدوس سارىم مىرزالار ءسوز الىپ، ەلدىڭ كەشەگىسى مەن بۇگىنگى جايلى ءسوز سويلەدى.
