7 مامىر بىلتىر ەلباسىنىڭ جارلىعىمەن مەملەكەتتىك مەرەكەلەر قاتارىنا ىلىكتى. بۇل شەشىمنىڭ – ساياسي سيپاتى باسىم، ءوز ارمياسى مەن ونىڭ قۇرىلعان كۇنىن ارنايى مەملەكەتتىك مەرەكە رەتىندە تۇتۋ، باسقا ەلدىڭ ارمياسىنا جۇگىنبەۋدىڭ ءبىر مەگزەمى، كورسەتكىشى.

ارينە، رەسەي تاراپىنان قازاق دالاسىن قورعاۋدى سىلتاۋراتىپ، ونىڭ شەكاراسىن نە اۋە كەڭىستىگىن ورتاق اسكەري كەڭىستىككە اينالدىرۋدىڭ نەشە الۋان قيتۇرقىسى ۇسىنىلۋدا. ازىرگە بۇلقىنۋدامىز...

وعان دايەك كەشە عانا وتكەن اسكەري شەرۋ. بۇل جولى حالىق تاراپىنان قازاق اسكەرىنە دەگەن ىنتا ەرەكشە بولدى. كەيبىر ساراپشىلاردىڭ پىكىرىنشە 100 مىڭعا تارتا استانالىقتار مەن قوناقتار قازاق ەلى الاڭىنا، تاۋەلسىزدىك داڭعىلىنا جينالعان. جەڭىل كولىكتەردىڭ ۇزىن سانى بىرنەشە مىڭعا تاياپ، سول ماڭايدىڭ قۋىس-قولتىعىن تولتىردى.

7 مامىر - حالىق پەن اسكەر بىرىككەن كۇنگە اينالدى. جۇرت اسكەري تەحنيكاعا قىزىعا قاراپ، ساربازدارمەن بىرگە فوتوعا ءتۇسىپ جاتتى...

شەرۋ جيناقى، ۇيىمشىلدىقپەن ءوتتى. ادۋىن جەلدىڭ ۇيىتقىسى جينالعانداردىڭ ءبىرشاما كۇدىگىن كەلتىرگەنىمەن، ۇشاقتاردىڭ ۇشىسىنا كەدەرگى بولعان جوق، كەرىسىنشە اسپاندا جادىراعان كۇن، اۋادا ەسكەن سامال ونداعان اۋىر اسكەري تەحنيكا وتىنىنىڭ ءيىسىن لەزدە الاستاپ تۇردى.

اسكەر باسىلارى تۇگەلىمەن قازاقتانعانى الاڭعا جينالعان ءبىرشاما قازاق ەمەس جاندارعا عانا ەمەس، الەمگە ايان ەتىلدى. دەمەك، اسكەري ماماندار قازاقتاندىرىلۋ ساتىسىنا ءوتتى دەگەن ءسوز. ول ساتىدان ءوتىپ قويماي، اسا بيىك ۇشۋ دەڭگەيىن اسپانعا بايتەرەك بەينەسىن سىزعان اسكەري  ۇشقىشتاردىڭ شەبەرلىگى كورسەتتى. حالىق پەن اسكەر ءبىر بىرىمەن وسىلاي تابىستى: مىڭداپ جينالعان جۇرت  اسكەرگە ۇلكەن مىندەت پەن جاۋاپ جۇكتەسە، اسكەر ءوز تاراپىنان ءبىرشاما كۇدىكتى سەيىلتتى. ەنتەلەگەن الدەكىمگە بىلەك كورسەتىپ، ىشكى-سىرتقى ارانداتۋعا ءازىر ەكەنىمىزدى بايقاتتى.

Abai.kz