شىعىس قازاقستان وبلىسىنىڭ اكىمى بەردىبەك ساپارباەۆ وڭتۇستىك وڭىرگە بارىپ قايتتى. اكىمنىڭ باستاماسىمەن شىمكەنت جۇرتىنا كەلگەن توپ قۇرامىندا ءتيىستى ماماندار مەن اۋدان اكىمدەرى بار.  

شىندىعىن ايتقاندا، ەڭبەكشىلدىگىمەن، جاتپاي-تۇرماي قىزمەت ەتەتىن قاجىرلىلىعىمەن اتى شىققان وڭتۇستىك جۇرتى قازاقستاننىڭ بارلىق وبلىستارىنا ۇلگى بولۋعا لايىق.  گۇلدەنگەن ايماقتى، تۇراقتى ەكونوميكانى، قازاقى ورتانى ويلاساڭىز، ويىڭىزعا بىردەن شىمكەنت كەلەتىنى جاسىرىن ەمەس. بۇل ءۇردىس بەلگىلى جۋرناليست بەرىك ءۋاليدىڭ وڭتۇستىك ءباسپاسوزىن قولعا الۋىمەن تىپتەن قارقىن الدى.

وزدەرىڭىز بىلەتىندەي، سوڭعى كەزدەرى قازاق ۇكىمەتى شەتەلدەگى قازاقتار مەن حالىق ءجيى قونىستانعان وڭتۇستىك قازاقستان جۇرتىن  شىعىس-سولتۇستىك ايماقتارعا شاقىرا باستادى. ويتكەنى سولتۇستىك وڭىرلەردە ەڭبەك كۇشى جەتكىلىكسىز.

ءدال وسى يگى باستامانى شىعىس قازاقستان وبلىسىنىڭ اكىمى بەردىبەك ساپارباەۆ ءىلىپ اكەتتى. بۇل تۋرالى شىعىس قازاقستان وبلىستىق «ديدار» گازەتى جازدى.
- ءبىز وڭتۇستىك قازاقستان وبلىسىنىڭ ونشاقتى اۋدانىندا جانە شىمكەنت قالاسىندا بولدىق. نەگىزگى ماقساتىمىز – شىبىق شانشىساڭ، كوكتەي بەرەتىن جەرىمىزدىڭ ارتىقشىلىقتارى تۋرالى ايتىپ، وڭتۇستىك شارۋالارىن مەملەكەتتىك باعدارلاماعا ۇلەس قوسۋعا شاقىرۋ، ولاردى ۇلان اۋدانىندا جەر شارۋاشىلىعىمەن اينالىسۋعا، كوكونىس وسىرۋگە ۇندەۋ بولاتىن. وڭتۇستىك شارۋالارىنىڭ بۇل كاسىپتىڭ شەبەرى ەكەنىن ءبىز جاقسى بىلەمىز. وزدەرىنىڭ قۇنارى از جەرلەرىنىڭ وزىندە زور تاجىريبەنىڭ ارقاسىندا ولار كول-كوسىر ءونىم الادى. ال شىعىسقا قونىس اۋداراتىن بولسا، ولاردىڭ الدىنان جاڭا كوكجيەكتەر اشىلماق، - دەيدى شىعىسقازاقستاندىقتار.

اكىمدىك وكىلدەرىنىڭ ايتۋىنشا، ەگەر وڭستۇتىك ەگىنشىلەرى شىعىس قازاقستانعا كەلسە «اگروبيزنەس-2020» مەملەكەتتىك باعدارلاماسى اياسىندا كوپتەگەن جەڭىلدىكتەر جاسالماق. سونىڭ ارقاسىندا وبلىس ەكونوميكاسى العا ىلگەرلەپ قانا قويماي، سەمەي مەن وسكەمەن تۇرعىندارى ەكولوگيالىق تازا ونىمدەردى تۇتىنۋعا مۇمكىندىك الادى. سايكەسىنشە ءوندىرۋشى دە كول-كوسىر پايداعا كەنەلمەك.

«ديدار» گازەتىنىڭ جازۋىنشا، بەردىبەك ساپارباەۆتىڭ تىكەلەي قولداۋىمەن بىرنەشە جىل بۇرىن ۇلان اۋدانىنا قونىس اۋدارعان وڭتسۇتىك تۇرعىنى اراپباي ورىنباەۆ بۇل كۇندە ۇلكەن كاسىپكەر، «نۇرمۇاحممەد» شارۋا قوجالىعىنىڭ تىزگىنىن ۇستاپ، كاسىبىن دوڭگەلەنتىپ وتىر.   

ءسويتىپ، وڭتسۇتىك تۇرعىندارىنا شىعىس قاقپا ايقارا اشىلدى. ەڭبەكشىل اعايىن ەندىگى جەردە ۇلان-بايتاق دالاعا جان ءبىتىرىپ، ەگىن-شارۋاشىلىعىن دامىتپاق.

ىسكەر اكىم بەردىبەك ساپارباەۆتىڭ ۇكىمەت قاۋلىسىنا سايكەس بەلسەندى جۇمىس جاساۋى سولتۇستىك اكىمدەرىنە ۇلگى بولسا يگى. بوس جاتقان ايماقتارعا ەڭبەك كۇشىن تارتىپ، ەل ەكونوميكاسىن كوتەرۋ پرەزيدەنت نۇرسۇلتان نازارباەۆتىڭ تىكەلەي قاداعالاۋىندا. سوندىقتان الداعى ۋاقىتتا ەلىمىزدىڭ بارلىق ايماقتارىندا اۋىلشارۋاشىلىعى جاڭا بەلەسكە كوتەرىلىپ، جۇرت تىرشىلىگى وڭالسا،  ول – ورالمان اعايىن مەن وڭتۇستىك جۇرتىنىڭ تىكەلەي ىقپالى دەپ ءبىلىڭىز.

Abai.kz