بۇگىن پارلامەنت ءماجىلىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەتيل ءسپيرتى مەن الكوگول ءونىمىنىڭ ءوندىرىلۋىن جانە اينالىمىن مەملەكەتتىك رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى. قازاقپاراتتىڭ دەرەگىنە ساي اتالعان زاڭ جوباسى ءسپيرتتى ىشىمدىكتەردىڭ ساتىلۋ ۋاقىتىن 15 ساعاتقا دەيىن شەكتەيدى. كۇشتى الكوگول ونىمدەرىن ساتۋ ۋاقىتى ون بەس ساعاتقا دەيىن، ياعني مەيرامحانالاردى، ءدامحانالار مەن بارلاردى قوسپاعاندا، كەشكى ساعات 21-دەن باستاپ، كەلەسى كۇنگى 12-گە دەيىن جۇمىس جانە دەمالىس كۇندەرىنە بولىنبەستەن ساتۋعا تىيىم سالىنادى. بۇل تىيىم  30 گرادۋستان جوعارى بولاتىن ءسپيرتتى ىشىمدىكتەرگە بايلانىستى سالىنعان. ال الكوگولدىك ۇلەسى 30 گرادۋستان  تومەن ىشىمدىكتەردى ساتۋعا بۇرىنعىشا تۇنگى 23-تەن تاڭعى 8-گە دەيىن تىيىم بولادى. سونداي- اق ىشىمدىكتەردىڭ ساتىلۋ ورىندارى سانى دا شەكتەلەتىن بولادى. جاڭا زاڭ جوباسىمەن دۇڭگىرشەك، دۇكەندەردە عانا ەمەس دەنساۋلىق ساقتاۋ، ءبىلىم بەرۋ، بالالار مەكەمەلەرىنىڭ عيماراتتارىندا، دەنە شىنىقتىرۋ-ساۋىقتىرۋ، سپورت جانە سپورتتىق-تەحنيكالىق قۇرىلىستاردا دا ىشىمدىك ساتۋعا تىيىم سالىناتىن بولادى. سونىمەن قاتار اۆتوجانارماي قۇيۋ ستانسالارىندا تىيىم سالۋ بەلگىلەنەدى. زاڭدى ازىرلەۋشىلەر: «زاڭ جوباسىن ازىرلەۋ ەلىمىزدىڭ ەكونوميكالىق مۇددەلەرىن، ەكونوميكالىق قاۋىپسىزدىگىن، ازاماتتاردىڭ ءومىرى مەن دەنساۋلىعىن قورعاۋ قاجەتتىگىنەن تۋىنداپ وتىر»- دەيدى.

اباي-اقپارات