ۇرپاق سالاۋاتتىلىعى ءۇشىن بىزگە اراق-شاراپتان گورى قىمىز بەن شۇبات تۋرالى زاڭ كەرەك.  بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەتيل ءسپيرتى مەن الكوگول ءونىمىنىڭ ءوندىرىلۋىن جانە اينالىمىن مەملەكەتتىك رەتتەۋ ماسەلەلەرى بويىنشا وزگەرىستەر مەن   تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا دەپۋتات الدان سمايىل وسىنداي ماسەلە كوتەردى دەپ حابارلايدى «قازاقپارات».

دەپۋتاتتىڭ ايتۋىنشا، ورتالىق ازياداعى اراقتى ەڭ كوپ ىشەتىن ەل قازاقستان ەكەن. «بۇل كۇلدىرەتىن ەمەس، جىلاتاتىن ماسەلە. بىزدە اراقتىڭ كەسىرىنەن قانشاما شاڭىراق شايقالدى. قانشالىقتى ۇرپاق اراق كەسىرىنەن اۋرۋشاڭ، قابىلەتسىز بولىپ جاتقانى تۋرالى بىردە-ءبىر زەرتتەۋ جوق. مۇنى زەرتتەيتىن ءتۇرىمىز دە جوق»، - دەدى ول.

نورۆەگيا مەملەكەتىن ءسوز ەتكەن الدان مىرزا ول ەلدە دەمالىس كۇندەرى ەشقانداي اراق-شاراپتىڭ ساتىلمايتىندىعىن، ۇرپاعىن ويلاعان ەلدىڭ سول قادامعا بارۋ كەرەكتىگىن تىلگە تيەك ەتتى.

شىندىعىندا، ءبىر ەلدىڭ ەكونوميكاسى تەك اراق-شاراپقا تاۋەلدى بولىپ قالمايدى. ياعني ونىڭ پايداسىنان گورى جۇرتقا تيگىزەر زيانى كوپ. ءتىپتى سوڭعى جىلدارى قىمىز بەن شۇبات تۋرالى ارنايى زاڭ قابىلداۋ قاجەتتىگىن، ۇرپاقتى ۇلتتىق سۋسىندارمەن قاماتاماسىز ەتۋ كەرەكتىگىن قازاق ءباسپاسوزى جازۋىنداي جازىپ، الدان سمايىل مىرزا ايتۋىنداي ايتىپ كەلەدى. بىراق قۇلاق تۇرەتىن ۇكىمەت جوق. ەسەسىنە قايتا-قايتا اراق-شاراپتى ءسوز ەتىپ، سپيرتتىك ىشىمدىكتەر تۋرالى زاڭدى تولىقتىرۋعا باس قاتىرىپ ءجۇر.

كوزقاراقتى وقىرمان بىلەدى. بىرنەشە جىلدان بەرى احمەتبەك نۇرسيلا مىرزا باسشىلىق ەتەتىن «سارجايلاۋ» كومپانياسى وسى ماسەلەنى ۇزدىكسىز كوتەرىپ، ءتىپتى اۋىل-شارۋاشىلىق ءمينيسترى اسىلجان مامىتبەكوۆتىڭ دە نازارىن اۋداردى. دەگەنمەن سەڭ قوزعالعان جوق. كەرىسىنشە، دۇنيەجۇزىلىك دەنساۋلىق ساقتاۋ ۇيىمىنىڭ جۇرگىزگەن زەرتتەۋلەرىنە سايكەس، سپيرت ىشىمدىكتەرىن تۇتىنۋ دەڭگەيى جونىندەگى رەيتينگتە قازاقستان 188 ەلدىڭ  اراسىندا 34-ورىندى يەلەنىپ وتىر. قر پرەمەر-ءمينيسترىنىڭ ورىنباسارى - قارجى ءمينيسترى باقىت سۇلتانوۆتىڭ مالىمەتىنشە، ەلىمىزدىڭ ءاربىر ازاماتى جىلىنا ورتا ەسەپپەن شامامەن 5,5 ليتر تازا ەتيل ءسپيرتىن نەمەسە 11 ليتر اراق تۇتىناتىن كورىنەدى.

Abai.kz