اق ساۋىتىن كيىنىپ، اتا بابانىڭ اق تۋىن كوتەرىپ، قازاق دالاسىنىڭ اۋماقتىق تۇتاستىعى مەن شەكارا شەبىنىڭ بۇتىندىگىن قاس قاقپاي كۇزەتىپ، قاسىق قانى قالعانشا جوڭعار دۇشپاندارىمەن ايقاسىپ، قاسيەتتى اتامەكەننىڭ سىنىق سۇيەم توپىراعىن جاۋعا تاپتاتپاي ازات ەتكەن ارۋاقتى باتىر، قاھارمان حاندار، اقىلمان بيلەر بۇگىنگى الەۋەتتى دە ساۋلەتتى قازاق ەلىنىڭ تەرەڭ تامىرىنا ءنار بەرەتىن سارقىلماس قۋات دەسەك بولادى. سونداي باتىرلاردىڭ ءبىرى – بيىل تۋعانىنا 300 جىل تولىپ وتىرعان جاۋجۇرەك ساردار، قابىرعالى بي، كورەگەن قولباسى ەر جانىبەك بەرداۋلەتۇلى.

ەلىم دەپ ەڭىرەگەن، جەكپە-جەكتە تۋى جەلبىرەگەن  نار نامىستى مارعاسقالار تۋرالى تاريحشى  قۇربانعالي حاليدي «تاۋاريح حامسا» دەگەن ايگىلى ەڭبەگىندە «ابىلاي زامانىندا باتىر، ساردار بولعاندار –  قاراكەرەي قابانباي، التىباي باتىر، اقتانبەردى باتىر، ەسپەنبەت باتىر، ماتاي شوڭكەي باتىر، كەرەي جانىبەك باتىر، بۋرا اقپانتاي باتىر، قانجىعالى بوگەنباي باتىر، باسەنتيىن مالايسارى باتىر» دەپ قاس باتىرلاردىڭ ەسىم سويلارىن مەرۋەرتتەي ءتىزىپ، مارجانداي ءسۇزىپ، قاستەرلەپ-قادىرلەپ اتايدى.

حان ابىلاي، باس ساردار قابانبايلاردىڭ دانا باسشىلىعىندا جۇرگىزىلگەن اتاجۇرتتى ازات ەتۋ سوعىسىنا باستان-اياق قاتىسىپ،  باسقىنشى جوڭعارلاردى تۇرە قۋىپ، ەلىن ەجەلگى اتا بابا قونىسى التاي، تارباعاتايعا ورنالاستىرۋعا ۇلەس قوسقان ەر جانىبەكتىڭ ەسىمى ەلىنە ۇران بولۋى زاڭدى ەدى. جاۋگەرشىلىك زامان اياقتالعان سوڭ كورشى ەلدەرمەن مامىلەگەرلىك ءبىتىم جاساسىپ، ساۋدا-ەكونوميكالىق قاتىناستى نىعايتۋعا شاراپاتى تيگەن ەر جانىبەكتى حالقى وت اۋىزدى، وراق ءتىلدى بي شەشەن رەتىندە دە قادىرلەگەن. اقىرى ەلىن ەجەلگى قونىسقا ورنىقتىرعان باتىردىڭ  عازيز رۋحى قازىرگى شىعىس قازاقستان وبلىسى، جارما اۋدانى، ورتابۇلاق دەگەن جەردە ماڭگىلىك دامىلداپتى.  

شىعىس قازاقستان وبلىسىنىڭ اكىمشىلىگى مەن ەلجاندى زيالى قاۋىم، ىسكەر ازاماتتار باس قوسىپ، باتىردىڭ باسىنا 2009 جىلى كۇمبەزدى ەسكەرتكىش كەشەن ورناتۋى – بۇگىنگى ۇرپاقتىڭ بابا الدىنداعى تاعزىمى ءارى جاستارعا پاتريوتتىق رۋحتىڭ ءدانىن ەگەتىن، وتانىمىزدىڭ شەكاراسىن قاس قاقپاي قورعاپ تۇرعان قازىرگى ەرجۇرەك ساربازدارىمىز بەن ساردارلارىمىزدىڭ نامىسىن قايراپ، جىگەرىن شىڭدايتىن داڭقتى شارا بولدى.

مىنە، بيىل باتىر بابانىڭ تۋعانىنا 300 جىل تولۋىنا وراي ءداستۇر ساباقتاستىعىن جالعاستىرىپ، ەلباسى ايتقان «ماڭگىلىك ەل» رۋحى باعىتىندا حالىقتى جۇمىلدىرۋ ماقساتىندا شىعىس قازاقستان وبلىسى اكىمشىلىگى «ەل قورعانى – ەر جانىبەك» اتتى رەسپۋبليكالىق اشىق ءمۇشايرا جاريالايدى.

ءمۇشايرانىڭ ماقساتى – ەرەگەسكەن جاۋىن جەر جاستاندىرعان، ەلىنىڭ شەكاراسىن كەۋدەسىمەن قورعاعان باتىر بابا ەر جانىبەكتىڭ جەڭىمپازدىق جولىن جىر جولىمەن ورنەكتەۋ، سونىمەن قاتار ەر جانىبەكپەن بىرگە ەل نامىسىن قورعاعان قولباستاعان كوسەم، ءسوز باستاعان شەشەن حان ابىلاي، قاراكەرەي قابانباي، قانجىعالى بوگەنبەي، شاپىراشتى ناۋرىزباي، تولە، ايتەكە، قازىبەك بي سەكىلدى كوپتەگەن تاريحي تۇلعالاردىڭ ىنتىماعى مەن ەلدى بىرىكتىرۋ جولىندا اتقارعان ولشەۋسىز ەڭبەگىن  ولەڭمەن دارىپتەپ، جاستارعا ۇلگى ەتۋ; ەر جانىبەكتىڭ سوڭىندا قالعان اڭىز-ءاپسانالار، شەشەندىك سوزدەر، قر مۋزەيدە ساقتالعان جورىق ساپتىاياعى، قحر-داعى قازاقتار اراسىندا ساقتالعان تۋى سالىنعان ساندىق، كەزدىك سەكىلدى مۇرالارىن ولەڭ جىرعا وزەك ەتە وتىرىپ، باتىردىڭ داڭقتى جولى بۇگىنگى ۇرپاققا جالعاسقانىن ماداق ەتۋ; ەر جانىبەكتىڭ ەلىنىڭ بىرلىگى مەن ىنتىماعى، جەرىنىڭ اۋماقتىق تۇتاستىعى، حالقىنىڭ  ىرىس-بەرەكەسى جولىندا ءومىرىن سارپ ەتكەن قابىرعالى بي، كورەگەن قولباسشى رەتىندەگى تۇلعاسىن سومداپ، ولەڭمەن ورنەكتەۋ; ەڭ نەگىزى – ەل باسىنا كۇن تۋعان القاكول سۇلاما، اقتابان شۇبىرىندىدان حالقىن قۇتقارىپ، ۇرپاعىن بۇگىنگى كۇنگە ەسەن-امان جەتكىزۋگە نەگىز قالاعان قاھارمان تۇلعالاردىڭ جيىنتىق بەينەسىن، زامانا بەدەرىن ەر جانىبەك بەرداۋلەتۇلىنىڭ اينالاسىنا توپتاستىرا سومداۋ ارقىلى ەرجۇرەك باتىر، قابىرعالى بيلەرىمىزدىڭ، داۋىلپاز جىراۋلارىمىزدىڭ دانالىق، گۋمانيستىك قۇندىلىقتارىن ۇرپاق زەردەسىنە ۇيالاتۋ; وسى ارقىلى تۇپكىلىكتى ناتيجەدە «ماڭگىلىك ەل» ۇلتتىق يدەياسىنا اقىنداردىڭ جىرمەن ۇلەس قوسۋىنا جاعداي تۋعىزۋ.

باتىر بابانىڭ كەسكىن-كەلبەتىن جىر تىلىمەن ايشىقتى سومداپ، وقىرماننىڭ پاتريوتتىق سەزىمىنە اسەر ەتىپ، جۇرەگىن تەربەتە الاتىن كوركەم تۋىندىعا جۇلدە بەرىلەدى. مۇشايراعا ەش جەردە جارىق كورمەگەن ولەڭدەر، تولعاۋلار، پوەمالار قابىلدانادى. 

باس جۇلدە – جەڭىل اۆتوكولىك.

ءبىرىنشى ورىن – بىرەۋ

ەكىنشى ورىن – ەكەۋ

ءۇشىنشى ورىن – ۇشەۋ

ىنتالاندىرۋ سىيلىقتارى – بەسەۋ

مۇشايراعا قاتىسۋشىلاردىڭ شىعارمالارى كومپيۋتەرگە باسىلعان بەس دانادان كەم ەمەس جانە ەلەكتروندى نۇسقاسىمەن 2014 جىلدىڭ 1 تامىزىنا دەيىن مىنا مەكەنجايعا كەلىپ ءتۇسۋى كەرەك:

يندەكس: 010000, استانا قالاسى، اۋەزوۆ كوشەسى، 20 «ا»، ساكەن سەيفۋللين مۇراجايى. تەل.: 32-84-67, 53-34-03, e-mail:astanakalamger@mail.ru.

ءمۇشايرا قورىتىندىسى 2014 جىلدىڭ 15 تامىز كۇنى شىعارىلادى. جۇلدەگەرلەردىڭ وسكەمەن قالاسىنا كەلىپ-كەتۋ جول شىعىنى مەن جاتار ورنى ماسەلەسىن ۇيىمداستىرۋ كوميتەتى موينىنا المايدى. قازىلار القاسىنىڭ شەشىمى قايتا قارالمايدى.

 Abai.kz