ءساۋىردىڭ 29-ى مەن 30-ى كۇندەرى الماتىدا قازاقستان ونكولوگتارى مەن راديولوگتارىنىڭ V سەزى وتەدى. ەلىمىزدىڭ شالعاي ايماقتارى مەن شەتەلدەن كەلەتىن 500 جەتەكشى مامان ونكولوگيانىڭ مۇمكىندىكتەرى مەن دامۋ ماسەلەلەرىن تالقىلايدى. «13 جىلدىق ۇزىلىستەن سوڭ وتكىزىلەتىن بۇل كونفەرەنتسيا – وتاندىق ماماندار ءۇشىن اسا ماڭىزدى بولماق. ءبىز، ەڭ الدىمەن، ءبارىمىز ەڭبەك جولىمىزدى العاش باستاعان اۋدان ورتالىقتارى مەن وبلىستارىنداعى مامانداردى جيناۋدى ماقسات ەتىپ وتىرمىز»، - دەيدى قازاق ونكولوگيا جانە راديولوگيا عزي ديرەكتورى قۋانىش نۇرعازيەۆ.     

بۇل سەزدە قاتەرلى ىسىكتى العاشقى ساتىسىندا انىقتاۋ تاسىلدەرى مەن ونى ەمدەۋ، سونداي-اق، جيىرما ءبىرىنشى عاسىردىڭ باستى دەرتىمەن كۇرەسۋدەگى مەديتسينا جەتىستىكتەرى تۋرالى ايتىلىپ، ماماندار ءوزارا پىكىر الماسادى.

كونفەرەنتسيانىڭ نەگىزگى تاقىرىپتارى:

- جىلىك مايىن اۋىستىرۋدىڭ جاڭا مۇمكىندىكتەرى;

- سوڭعى ۇلگىدەگى اپپاراتتارمەن جابدىقتاۋ جانە ساۋلەلى، حيميالىق، گورموندىق تەراپياداعى جاڭا ادىستەر;

- قاتەرلى ىسىكتى العاشقى ساتىسىندا انىقتاۋدىڭ سكرينينگتىك باعدارلامالارى;

- ورتاق عىلىمي زەرتتەۋلەر مەن ماماندار بىلىكتىلىگىن ارتتىرۋ ماقساتىندا ولاردى شەتەلگە وقۋعا جىبەرۋ;

- ناۋقاسقا پاللياتيۆتىك (پسيحولوگيالىق) كومەك كورسەتۋ جانە ساۋىقتىرۋ  مەديتسيناسىن دامىتۋ;

- حالىقتىڭ ونكولوگيالىق ساۋاتىن كوتەرۋ ءارى دارىگەرلەر بىلىكتىلىگىن ارتتىرۋ;

قۋانىش نۇرعازيەۆتىڭ ايتۋىنشا، ناۋقاستارعا پاللياتيۆتىك كومەك كورسەتۋدى دامىتۋ – كونفەرەنتسيا كۇن تارتىبىندەگى نەگىزگى ماسەلەلەردىڭ ءبىرى. «كەڭەس زامانىنان بەرى ناۋقاسقا پسيحولوگيالىق جاە رۋحاني كومەك بەرۋ جاعى اقساپ كەلەدى. ال قازىرگى كەزدە ساۋىقتىرۋ مەن پاللياتيۆتىك كومەك جۇيەسى ءبىر ىزگە ءتۇسىپ، دامۋ ۇستىندە. 2013 جىلدان باستاپ ءاربىر ونكولوگيالىق ديسپانسەرلەردە دارىگەر-پسيحولوگتاردىڭ جەكە بولىمشەلەرى اشىلىپ، ونكولوگيالىق دەرتكە شالدىققان جاندارعا كومەكتەسەتىن الەۋمەتتىك جۇمىسشىلار توبى قۇرىلدى».

اتالعان سەزدە تمد ەلدەرى اسسوتسياتسياسىنىڭ پرەزيدەنتى ميحايل داۆىدوۆ، قاتەرلى ىسىكپەن كۇرەس حالىقارالىق وداعىنىڭ پرەزيدەنتى فرانكو كاۆاللي جانە اقش، جاپونيا، وڭتۇستىك كورەيا، يزرايل ەلدەرىنەن بىلىكتى عالىمدار كەلەدى دەپ جوسپارلانىپ وتىر.

كونفەرەنتسيا قر دەنساۋلىق ساقتاۋ مينيسترلىگىنىڭ، قازاق ونكولوگتارى مەن راديولوگتارىنىڭ عىلىمي زەرتتەۋ ينستيتۋتى جانە «قازاقستان ونكولوگتارى مەن راديولوگتارى» قوعامدىق بىرلەستىگىنىڭ قولداۋىمەن وتەدى. 

انىقتاما:

دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنە سۇيەنسەك، ەۋروپا ەلدەرىندە قاتەرلى ىسىك جۇرەك-قان تامىرلارى اۋرۋلارىمەن بىردەي كورسەتكىشكە جەتكەن. جىل سايىن ادامدارىڭ 71%-ى وسى دەرتتىڭ سەبەبىنەن كوز جۇمادى. ءولىم-ءجىتىم دەڭگەيى بويىنشا، قازاقستاندا قاتەرلى ىسىك اۋرۋلارى ەكىنشى ورىندا تۇر. جىل سايىن قاتەرلى ىسىك 17 000 ادامنىڭ ءومىرىن جالمايدى. ال ونىڭ 42%-ى ەڭبەككە جارامدى جاستاعى جاندار ەكەن. بۇگىنگى تاڭدا 146 400 ادام تىركەۋدە تۇر.

قازاقستاندىقتاردىڭ ءومىر ءسۇرۋ جاسىن ۇزارتۋ مەن ءومىر ساپاسىن ارتتىرۋ ماقساتىندا 2012-2016 جىلدارعا ارنالعان ونكولوگيالىق كومەك كورسەتۋدى دامىتۋدىڭ تورتجىلدىق مەملەكەتتىك باعدارلاماسى قابىلداندى. وعان بيۋدجەتتەن 211 ميلليارد تەڭگە بولىنگەن. قازىرگى تاڭدا قر دەنساۋلىق ساقتاۋ مينيسترلىگى جاتىر موينى قاتەرلى ىسىگى، ءسۇت بەزى قاتەرلى ىسىگى، قۋىقاستى بەزدىڭ قاتەرلى ىسىگى،وڭەش جانە اسقازان، باۋىر قاتەرلى ىسىگى، وعان قوسا، قاتەرلى ىسىكتى العاشقى ساتىسىندا انىقتاۋ مەن ونى تولىق ەمدەۋ جانە ءولىم كورسەتكىشىن ازايتۋعا باعىتتالعان التى سكرينينگتىك باعدارلامانى ىسكە قوستى.

اككرەديتاتسيا مەن وزگە دە سۇراقتار بويىنشا قازاقستان ونكولوگتارى مەن راديولوگتارىنىڭ V سەزى ءباسپاسوز حاتشىسى ايگەرىم اعىلتاەۆاعا حابارلاسۋعا بولادى.

تەل.: +7701 360 66 63 

E-mail onco.congressV@gmail.com 

اباي-اقپارات