سارسەنبى, 30 قىركۇيەك 2020
COVID-19 قازاقستاندا. جۇقتىرعاندار — 107833. جازىلعاندار — 102805. قايتىس بولعاندار — 1725
الەۋمەت 10490 0 پىكىر 21 ناۋرىز, 2014 ساعات 12:39

قاجىمۇقان عابدوللا. داۋىل الدىنداعى دامىل ما؟..

ۇلت پەن قوعام ىسىندە رۋحاني تابىسقان  ارىپتەسىمىز ساياساتتان  كەتتى... ۇرىس الاڭىن قايسار قاھارمان، باتالى باتىر تاستاپ كەتكەندەي، جالعىزسىراعان سەزىمدە قالدىم...
ساياساتكەر، قوعام قايراتكەرى، ۆارشاۆا ۋنيۆەرسيتەتىنىڭ حالىقارالىق ەكونوميكالىق جانە ساياسي قاتىناستار ماگيسترى، ەكونوميست، بولاتحان تايجان قورىنىڭ پرەزيدەنتى مۇحتار تايجاننىڭ ۋاجىنە قۇلاق ءتۇردىم: «...قازىر مەنىڭ ارىم تازا. مەن حالىقتى وياتۋ ءۇشىن، بيلىككە اسەر ەتۋ ءۇشىن بارىمدى سالدىم. قوعامدىق ومىرگە ارالاسقان ساتتەن باستاپ ايتقان ءار ءسوزىم مەن ءار ىسىمە ءوزىم جاۋاپ بەرەمىن. ءتىپتى، بۇگىنگى مالىمدەمەمە دە ەشكىمنىڭ، بيلىكتىڭ دە، وپپوزيتسيانىڭ دا، وليگارحتىڭ دا، قاشقىن ساياساتكەرلەردىڭ دە قاتىسى جوق.

...ساياساتقا كەلەتىن زامان بولادى، ساياساتتان كەتەتىن ۋاقىت بولادى. ويتكەنى، وسى جۇمىسپەن ۇنەمى اينالىسۋ ماڭگى ەمەس. مەنىڭ ساياساتتان كەتۋىممەن ءبىزدىڭ ۇلتتىق دەموكراتيالىق، پاتريوتتىق يدەيالارىمىز ءوشىپ، جۇمىسىمىز توقتايدى دەپ ويلامايمىن.

ءبىر ادامنىڭ كۇشى شەكتەۋلى. قوعامدىق-ساياسي جۇمىستاردا ءتورت جارىم جىل ءجۇردىم. سوندىقتان، كەتەتىن ۋاقىت كەلدى دەپ سانايمىن. «حالىقتىق اليانس» ۇيىمىمىز بار. ولار پوليگوندار مەن گەپتيلگە قارسى جۇمىستار جاساپ جاتىر. جىگىتتەر، ارىپتەستەرىمىز ەۋرازيالىق وداققا قارسى شىعىپ جاتىر. مۇنىڭ ءبارى جۇمىستىڭ جالعاسا بەرەتىنىنىڭ كورىنىسى. مەن جەكە سەبەپتەرگە بايلانىستى ساياساتتان كەتتىم. ال، ويىممەن وسى باعىتتامىن. ءارى قاراي قالاي بولاتىنىن ۋاقىت كورسەتەدى.

...بالا كەزدەن بويىما سىڭگەن ومىرلىك تاربيەم مەن ءبىلىمىمدى جانە ەلىمە دەگەن ماحابباتىمدى ەشكىم وزگەرتە الماس. كەز-كەلگەن نارسەگە ءبىر سۇراقپەن: «مۇنىڭ ەلگە پايداسى بار ما، جوق پا؟ - دەپ قاراۋ كەرەك. سوندا ءبارى ءوز ورنىنا كەلەدى.

...ارا سالماققا تۋرا كوزبەن قاراعان ءجون. مەن وتباسىما جاۋاپ بەرۋگە مىندەتتىمىن.

...حالىق ءبارىن جاقسى ءبىلىپ وتىر. بىراق ۇندەمەيدى. كۇتەدى. ءارى قورقادى. ولار ءۇشىن باسقا بىرەۋ ىستەپ بەرسە ەكەن دەيدى. ولاي بولمايدى، بولعان دا ەمەس. بىلەك سىبانىپ، جەڭدى ءتۇرىپ، قارا جۇمىستى ءبارى بىردەي ىستەۋى كەرەك. باسقا جول جوق. ءبىز وسىنى جاقسىلاپ تۇسىنۋگە ءتيىسپىز. سوندا عانا ىلگەرى جۇرە الامىز...»

...ءتۇسىندىم. تۇيسىك ءتۇيدىم...

قازىرگى قازاق قوعامىندا جارىق جۇلدىزداي جاڭعىرىپ، ءارتۇرلى ۇلتتىق مۇددەلەرگە قاتىستى ايرىقشا كوزقاراس، وراسان ويلارىن اشىق ايتىپ، جانىبەك پەن كەرەي ەسكەرتكىشىن قىزعىشتاي قورعاعان، قازاق مۇددەسىن قاعىس قالدىرعان ۇلتتىق بىرلىك دوكتريناسى مەن قىتايعا قازاق جەرىن جالعا بەرۋگە جان-جۇرەگىمەن قاسقايا قارسى شىققان، كەدەن وداعىنىڭ قازاققا قاي جاعىنان دا تيىمسىزدىگىن ايۋعا تاياق ۇستاتقانداي دالەلدەپ بەرگەن، قىتايدىڭ ەكونوميكالىق قاۋپى مەن جاڭاوزەن قاسىرەتىنە، يادرولىق پوليگوندار مەن گەپتيلدىڭ زاردابتارىنا جانى اۋىرعان مۇحتار تايجان باۋىرىم ەدى، بۇل!..

بيلىكتىڭ ۇلت تاعدىرى بەزبەنگە تۇسەتىن كەزدەردەگى ارەكەتسىزدىگىنە قارسىلىق بىلدىرگەنى ءۇشىن تالاي ايىپپۇلدار سالىنىپ، جاۋاپقا تارتىلعان مۇحتار تايجان باۋىرىم ەدى، بۇل!..

«ورداباسى» كورپوراتسياسىندا، «قازاقستان تەمىر جولى» ۇلتتىق كومپانياسىندا، ستراتەگيا­لىق جوسپارلاۋ جانە رەفورمالار اگەنتتىگىندە، پرەزيدەنت اكىمشىلىگىندە لاۋىزىمدى قىزمەتتەر اتقارسا دا، جىلى بولمە، جۇمساق تاعىن تاستاپ، قازاعىنىڭ قامىنا قابىرعاسى قايىسىپ-قاۋىشقان مۇحتار تايجان باۋىرىم ەدى، بۇل!..

...اقتاي دا المايمىن، داتتاي دا المايمىن، مۇقا، اتامىز قازاق: ء«ۇمىتسىز – شايتان» دەگەن، ءۇمىتتى ۇزبەسەك قانا ءوزىڭ ايتپاقشى: «...ىلگەرى جۇرە الامىز...»

...كىم ءبىلسىن، شالىمدى شابۋىل ءۇشىن شەگىنۋ دە قاجەت شىعار...

(الدە، بۇل – داۋىل الدىنداعى دامىل ما؟!. )

 Abai.kz

0 پىكىر