بىرلىگىمىز نىعايىپ، بەرەكەمىز ارتا بەرسىن!
اسا قامقور، ەرەكشە مەيىرىمدى اللانىڭ اتىمەن باستايمىن!
ۇلىستىڭ ۇلى كۇنى سانالعان ناۋرىز – تۇركى جۇرتىنىڭ مەرەيلى مەرەكەسى. مۇسىلماندىقتى بەكەم ۇستانعان قازاق حالقى بۇل كۇندى ەرەكشە دايىندىقپەن وتكىزەدى. اقساقالدى قاريالار، اق سامايلى اجە-اپالار اق داستارحان جايىپ، قوناق كۇتىپ، باتا بەرەدى. «ۇلىس وڭ بولسىن، اق مول بولسىن!» – دەگەن تىلەك-دۇعالار ايتىلاتىن ناۋرىز – بىرلىكتىڭ، ىنتىماقتىڭ، بەرەكە مەن تاتۋلىقتىڭ مەرەكەسى. بۇل كۇنى ارازداسقاندار – ادامگەرشىلىك، رەنجىسكەندەر – راقىمدىلىق جولىن ۇستانادى. اسىلىندا مۇسىلماندار ءۇشىن بىرەۋگە رەنجۋگە دە، وزگەنى رەنجىتۋگە دە بولمايدى. الايدا وسىناۋ ىزگىلىك مەرەكەسىندە ادامدار كەشىرىمدىلىككە، تاتۋلىققا ۇيىسادى. ويتكەنى، اللا تاعالا قاسيەتتى قۇراندا «كەشىرىم جولىن ۇستان» دەپ بۇيىرعان.
ناۋرىزدى حالقىمىز ءدىني دەپ ەمەس، اتا-بابامىزدان جالعاسىن تاۋىپ كەلە جاتقان ۇلتتىق مەرەكە، سالت-ءداستۇرىمىزدىڭ جالعاسى دەپ تويلايدى.
يماندىلىقپەن ۇشتاسقان، ۇلت جادىنان ۇمىتىلا باستاعان ۇلتتىق قۇندىلىقتاردى جانداندىرۋعا ءدىن وكىلدەرى دە اتسالىسۋدا. قازاقستان مۇسىلماندارى ءدىني باسقارماسى 2014 جىلدى ء«دىن مەن ءداستۇر» جىلى دەپ جاريالادى.
حالقىمىزدىڭ ۇعىمىنداعى «كورىمدىك، ەرۋلىك، ءسۇيىنشى، سىباعا، بازارلىق، جىلۋ، اسار، قول ۇزدىك» سىندى اسىل سوزدەر مۇسىلمان قازاقتىڭ دارحان مىنەز، كەڭپەيىل، قوناقجاي، باۋىرمالدىعىنىڭ بۇلتارتپاس دالەلى. داستۇرىنە بەكەم ۇرپاق اسىل دىنىمىزدەگى ىزگىلىككە باستايتىن قۇندىلىقتارعا قۇرمەتپەن قارايتىن بولادى. مىنە، ۇلتتىق مەرەكەمىز ءاز ناۋرىز ۇرپاقتى ۇيىمشىلدىققا ۇيىتادى، ۇلكەن-كىشىنى سىيلاي بىلۋگە تاربيەلەيدى.
اللا تاعالا ىرىزدىق-نەسىبەمىزدى مولايتىپ، بىرلىك-بەرەكەمىزدى ارتتىرعاي. ناۋرىز مەرەكەسى قۇتتى بولسىن! اق مول بولسىن! جاراتۋشى يەمىز ەل يگىلىگى ءۇشىن قىزمەت ەتىپ جۇرگەن، ءدىنىمىز بەن ءدىلىمىزدىڭ جاناشىرى بولعان ەلباسىنا، حالىق قامىن ويلاعان ازاماتتارعا كۇش-قۋات، ىنتىماق ءناسىپ ەتكەي!
راببىمىز مەملەكەتىمىزدىڭ تاۋەلسىزدىگىن ماڭگىلىك ەتىپ، ءدىنىمىز بەن ءداستۇرىمىزدى، ەلىمىزدىڭ ەڭسەسىن بيىكتەتسىن! يماندى ۇرپاق ساباقتاستىعى جالعاسىن تاۋىپ، ۇلى مۇراتتارعا ۇمتىلعان حالقىمىزدىڭ تىلەگى قابىل، مۇراتى اسىل بولعاي! ءاۋمين!
ەرجان قاجى مالعاجىۇلى،
قازاقستان مۇسىلماندارى ءدىني
باسقارماسىنىڭ توراعاسى،
باس ءمۇفتي
Abai.kz
