بەيسەنبى, 28 ناۋرىز 2024
قوعام 4764 0 پىكىر 20 تامىز, 2014 ساعات 11:41

ياگو فەرناندەس: قازاقستانعا فۋتبول ءۇشىن بارماڭىزدار!

قاراعاندىلىق «شاحتەردىڭ» بيىلعى ەۋروپا ليگاسىنداعى جەتىستىگىن كورىپ، ءوزىنىڭ ىستىق ۇياسىن سىنعا العان فۋتبولشىنىڭ ءبىرى – پورتۋگاليالىق ياگو فەرناندەس (سۋرەتتە). 26 جاستاعى فەرناندەس جىل باسىندا «شاحتەردىڭ» ساپىنا قوسىلعان ەدى. ەل بىرىنشىلىگىندە پورتۋگاليالىق قورعاۋشى توعىز كەزدەسۋ وتكىزىپ، ءبىر گول سوققان. جازعى ماۋسىمارالىق ۇزىلىستە قاراعاندىلىق كلۋب ويىنشىمەن كەلىسىمشارتتى ءۇزىپ تاستادى. ۇزبەسىنە لاج جوق. كوماندا ساپىندا توعىز ويىندا جالقى گول سالعان فەرناندەستىڭ ويىنى جۇرمەدى. ءوزىنىڭ ەۋروپا جاسىل الاڭدارىندا دوپ تەپكەنىن ەسكەرگەن فەرناندەس ءوزىن كريشتيانۋلارداي سەزىندى. بىراق قايدا دوپ تەپسە دە، ءبارىبىر ول – كريشتيانۋ ەمەس قوي. جاي عانا ورتانقول شابۋىلشى بولاتىن. ەندى ءوزىن ەۋروپا تۇگىل، قازاق ەلىنە تانىتا الماعان فەرناندەس قازاق فۋتبولىن سىنعا الىپتى: «قازاقستان فۋتبولىندا جالاقى ماسەلەسى عانا ورىندى. بۇل جاقتا فۋتبول ءۇشىن ينفراقۇرىلىم جوق. قازاقستاندا ءومىر ءسۇرۋدىڭ ءوزى قيىن. مەن وسى جاقتا ءبىراز ۋاقىتىمدى وتكىزگەنىمە وكىنەمىن. جانە پورتۋگاليالىق ويىنشىلارعا ايتارىم – ول جاققا فۋتبول ءۇشىن بارماڭىزدار». «شاحتەردە» ءجۇرىپ، قابىلەتسىز ويىنشى اتانعان فەرناندەستىڭ قىزعانىشى ءبىز ءۇشىن تۇك ەمەس. 

مەكتەپتە قابىلەتسىز وقۋشىنى كەلەسى سىنىپقا كوشىرمەيتىن قاعيدا بار. ەندەشە، قازاق فۋتبولىندا قابىلەتسىز ويىنشى بولعان فەرناندەس ءبىزدىڭ ۇجىمعا لايىقتى بولمادى. سوندىقتان ونى كەلەسى ويىنعا كوشىرە المادىق. وسى ورايدا وتاندىق فۋتبولعا كوڭىلى تولماي جۇرگەن ءماجىلىس دەپۋتاتى ايقىن قوڭىروۆتىڭ: «قازاق ويىنشىلارىن جاسىرىپ قالاتىن قازاقستاندىق پاسپورتى بار لەگيونەرلەر. ياعني، قابىلەتسىز شەتەلدىك ويىنشىلار»، – دەگەن پىكىرى ياگو فەرناندەسكە قاراتا ايتىلعان سىڭايلى.

سونداي-اق بىلتىر «اقتوبەنىڭ» قازاقستان فۋتبولىنداعى ەڭ قىمبات ويىنشى اتانعان رەسەيلىك سەرگەي داۆىدوۆ تا  (سۋرەتتە) ءدال وسىلاي وتتاپ كەتكەن بولاتىن. ول: «قازاقستان پرەمەر-ليگاسى ەڭ تومەنگى ويىندار ساناتىندا. وندا ويىنشىلاردى الداپ، جالاقىسىن بەرمەيدى. مەن بۇل چەمپيوناتتا ەندى ونەر كورسەتپەيمىن»، – دەپ كوكىگەن بولاتىن. ەندەشە، سۋ ىشكەن قۇدىعىنا تۇكىرگەن ەكى لەگيونەرىمىز دە قازاقستان فۋتبولىنداعى قىمبات ويىنشىلار قاتارىنا ەنگەن.

جالپى، تاۋەلسىزدىك العالى بەرى ەلىمىزگە شەتەلدەن 402 فۋتبولشى كەلىپ، سولاردىڭ 283-ءى قايتىپ كەتىپتى. قازاقستانعا كەلگەن فۋتبولشىلاردىڭ جالپى قۇنى  2,08 ميلليون ەۋرو دەپ كورسەتىلگەن. ال سىرتقا ساتىلعانداردىڭ قۇنى 450 مىڭ ەۋروعا تەڭ. وسىنشاما ايىرما مەن ولاردىڭ وتتاعان سوزدەرىنە كونىپ وتىرعان وتاندىق فۋتبولدىڭ ورنى ءالى دە بولسا سول كەلىمسەكتەردىڭ قولىندا قالا بەرەدى. ايقىن قوڭىروۆ مالىمدەگەندەي: «قازاقستان لەگيونەرلەرىنىڭ ترانسفەرلەرى جالپىەۋروپالىق رەيتينگىدە توپ 20-عا كىرسە، ناتيجەگە كەلگەندە، مىقتى دەگەن جۇزدىك ىشىنە ارەڭ كىرەدى. ەڭ جوعارعى ترانسفەر – 900 000 ەۋرو، ەڭ قاراپايىم – 350 000». قاراپ وتىرساڭىزدار، وسىنشاما قارجىنى قالتاعا باسقان لەگيونەرلەردىڭ ءبىزدىڭ فۋتبولدى ەۋروپا تورىنە كوتەرىپ جاتقانى شامالى. ءتىپتى، جاتتىقتىرۋشىنى دا شەتەلدىك ماماندارعا بەرىپ وتىرمىز. وتاندىق فۋتبولدىڭ ۇڭعىل-شۇڭعىلىن بiلەتiن ءوزiمiزدiڭ باپكەرلەر نەگە جۇمىسسىز ءجۇر؟ نەگە سولارعا قولقا سالمايمىز؟ جانكۇيەر كوكەيiندە جۇرگەن وسى ساۋالدارعا جاقىن ارادا جاۋاپ تابىلا قويۋى دا نەعايبىل. ويتكەنi ۇلتتىق قۇراما تۇگiلi, قازاقستان پرەمەر-ليگاسىندا ونەر كورسەتەتiن 12 كوماندانىڭ جەتەۋiن شەتەلدiك جاتتىقتىرۋشى باپتايدى. تەك اقشا تابۋ ءۇشiن عانا كەلگەن باپكەرلەر مەن ويىنشىلاردى قازاق فۋتبولىنىڭ كوسەگەسiن كوگەرتەدi دەگەنگە سەنۋ قيىن. دەمەك وسى ولقىلىقتارعا جول بەرگەن فەدەراتسيا باسشىلارى مەن كوماندالاردىڭ اتقارۋشى جەتەكشىلەرى ءوز قارا دومالاقتارىمىزدى قۇراما ساپىنا الۋدى كوزدەۋى كەرەك. ايتپەسە تاعى ءبىر فەرناندەس پەن سەرگەيدىڭ شىقپاسىنا كىم كەپىل.

التىنبەك قۇمىرزاقۇلى

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2254
عيبىرات

قايسار رۋحتى عازيز جان

مۇحتار قۇل-مۇحاممەد 3521