سانكت-پەتەربۋرگ وتەلدەرىنىڭ بىرىندەگى مەيرامحانادا قازاقستاننىڭ رەسەيدەگى ءومىر بويعى توتەنشە جانە وكىلەتتى ەلشىسى بەكجاسار نارباەۆتى توناپ كەتتى، - دەپ حابارلايدى Tengrinews.kz «Life News» اقپاراتىنا سىلتەمە جاساپ.  وقيعا ساعات 08.00 شاماسىندا گونچارنايا كوشەسىندەگى "پاركينگ" قوناقۇيىنىڭ مەيرامحاناسىندا بولعان.

ەلشىنىڭ ماڭىزدى قۇجاتتارى، ديپلوماتيالىق تولقۇجاتى، ەكى فوتوكامەراسى جانە اقشاسى سالىنعان سومكەسى ۇرلانعان. شىعىن كولەمى تولىق انىقتالماعان. بەكجاسار نارباەۆ كەزدەسۋگە دايىندالىپ جاتقان ەكەن، سومكەسىن ۇستەل ماڭىنا قالدىرىپ، ءسال الىستاعان ساتتە مۇلكىن تاپپاي قالىپتى.

وقيعا 30 شىلدە كۇنى بولعان كورىنەدى. ناقتىلانعان مالىمەت بويىنشا، ەلشى سانكت-پەتەربۋرگتە جەكە ساپارمەن جۇرگەن. بۇل دەرەك بويىنشا قىلمىستىق ءىس قوزعالعانىمەن، كۇدىكتى ءالى تۇتقىندالماعان.

71 جاستاعى بەكجاسار نارباەۆ - قازاقستاننىڭ رەسەيدەگى ءومىر بويعى توتەنشە جانە وكىلەتتى ەلشىسى. ول بۇرىن تۇركيادا جانە پاكىستاندا ەلشى قىزمەتىن اتقارعان. 2005-2006 جىلدارى قازاقستان سىرتقى ىستەر ءمينيسترىنىڭ كەڭەسشىسى بولدى. 2007 جىلدان بەرى قازاق ۇلتتىق اگرارلىق ۋنيۆەرسيتەتى رەكتورىنىڭ كەڭەسشىسى بولىپ جۇمىس ىستەيدى، ۋنيۆەرسيتەتتىڭ الەۋمەتتىك-گۋمانيتارلىق پاندەر كافەدراسىنىڭ پروفەسسورى. 2003 جىلدىڭ ماۋسىم ايىندا ەكونوميكالىق ىنتىماقتاستىق ۇيىمىنا (وەس) مۇشە ەلدەر سىرتقى ىستەر مينيسترلەرىنىڭ كەڭەسىندە بەكجاسار نارباەۆ وسى حالىقارالىق ۇيىمنىڭ باس حاتشىسى بولىپ سايلانعان.

اباي-اقپارات