دۇيسەنبى, 8 ناۋرىز 2021
تۇلعا 3632 0 پىكىر 8 شىلدە, 2014 ساعات 10:51

ساتتاردىڭ ورنى قاي جەر؟

...ءالى ەسىمدە، 1994 جىلدىڭ قىركۇيەك ايى ەدى. تۇركىستان قالاسىندا تالانتتى جازۋشى ساتتار ەرۋباەۆتىڭ تۋعانىنا 80 جىل تولۋى سالتاناتتى تۇردە اتالىپ ءوتىپ جاتقان. سودان بىرەر جىل بۇرىن «قازاق ادەبيەتى» گازەتىندە «ساتتار سۇيگەن سۇلۋ» اتتى دەرەكتى وچەركىم جاريالانعان مەنى ۇيىمداستىرۋشىلار وسى مەرەيتويعا ارنايى شاقىرعان ەدى.

ومىردەن ەرتە ءوتىپ كەتكەن قازاقتىڭ تاعى ءبىر تالانتتى قالامگەرى، جازۋشى مارات قابانباي اعامىزبەن توي كۇندەرى مەيمانحانا بولمەسىندە بىرگە تۇرىپ، مەرەيتوي شارالارىنا بىرگە بارىپ ءجۇردىم.

توي شارالارى اياقتالىپ، قايتار كۇنى كەشكىسىن سىيلى مەيماندارعا ارنايى داستارقان جايىلىپ، بانكەت بەرىلدى. توردەگى ستول باسىندا – ەلگە تانىمال اقىن-جازۋشىلار، ونەر ادامدارى، اكىم-قارالار. اۋەلەگەن اندەر مەن كۇمپىلدەگەن سوزدەردەن قۇلاق تۇنادى.

مارات اعا ءوزىنىڭ قاراپايىم قالپىمەن شەتكەرى تۇرعان ءبىر ستولعا بارىپ، وتىرا سالدى. مەن دە قاسىنا جايعاستىم. كەشتى باسقارىپ جۇرگەن جىگىت الدەن ۋاقىتتا جازۋشى مارات قابانبايعا ءسوز كەزەگىن بەردى. سوندا مارات اعا ماڭعاز قالپىمەن ورنىنان تۇردى دا، بىلاي دەدى:

-اناۋ دەپ، مىناۋ دەپ جاتىرسىزدار عوي. ال مەندە ءبىر وي بار. ەگەر ءدال قازىر ساتتار ەرۋباەۆ مىنا ەسىكتەن كىرىپ كەلسە، ونىڭ ورنى قاي جەر بولار ەدى؟ مىنە، پارادوكس!     

وسىلاي دەدى دە، مارات اعا ورنىنا وتىردى. جۇرت جىم-جىرت. مەن دە ويلانىپ قالدىم. شىنىندا، ساتتار وسى مەيرامحاناعا كىرىپ كەلسە، ورنى قاي جەردەن بولار ەدى؟

بيىل ساتتار ەرۋباەۆتىڭ تۋعانىنا 100 جىل. ءوزى ايتپاقشى، ء«ومىر دەگەندە وكسىگىن باسا الماي، ونەرىنىڭ بارلىق گۇلىن اشا الماي» ارماندا كەتكەن تاماشا تالانت يەسىنىڭ بۇل مەرەيتويى قانداي دەڭگەيدە اتالىپ وتپەكشى؟ ساتتاردىڭ تويى تۇركىستان قالاسىنىڭ عانا تويى ما؟ نەگە ونى رەسپۋبليكا كولەمىندە سالتاناتپەن اتاپ وتپەسكە؟

 

تولەۋباي ەرمەكباەۆ،

 قازاقستان جۋرناليستەر وداعىنىڭ مۇشەسى.

 قاراعاندى قالاسى 

Abai.kz

0 پىكىر