پۋگاچەۆا اندرەي ماكارەۆيچتىڭ باسىنداعى جاعدايدى ايتىپ پۋتينگە حات جازدى. پۋگاچەۆانىڭ حاتى تۋرالى رەسەي ءباسپاسوزى جاريا ەتۋدە. رەسەيدىڭ پوپ-جۇلدىزى، پريمادونناسى – اللا بوريسقىزى پۋگاچەۆانىڭ مەملەكەت باسشىسىنا جازعان حاتىندا ايتىلعان جايتتاردى ليا احەدجاكوۆا، اننا تەرەشكوۆا، يرينا پروحوروۆا سياقتى ونەر مايتالماندارى قولداپ جاتقان كورىنەدى.

ەستەرىڭىزگە سالا كەتەيىك، «ماشينا ۆرەمەني» توبىنىڭ جەتەكشىسى، مۋزىكانت-ءانشى اندرەي ماكارەۆيچ رەسەي بيلىگىنىڭ ۋكرايناعا جاساعان قياناتىن سىنعا الىپ، قاتتى ايىپتاعان بولاتىن. ول ءتىپتى ورىس حالقىنىڭ ءوزىن دە اياماي: «ورىس ازاتتىقتى، بوستاندىقتى بىلمەيتىن حالىق. قولىنان ناقتى ءىس تە كەلمەيدى. بۇيرىقپەن جۇمىس ىستەپ، بۇيىرعان ەڭبەكاقىسىن الىپ جۇرە بەرەدى» دەگەن بولاتىن. ماكارەۆيچ ءبىر سۇحباتىندا پۋتينگە دە ءتىلىنىڭ ءبىزىن سۇعىپ العان-دى. «رەسەيدىڭ جاڭا ترەنتى قازىر كسرو كەزىندەگىدەي بەسىنشى كولوننانى وياتۋ بولىپ تابىلادى. بۇعان كانىلى – بۇگىنگى بيلىك. شاماسى، پرەزيدەنتىمىز ءپۋتيندى ءبىلىم العان ورتاسى سولاي تاربيەلەسە كەرەك»، - دەدى ول.( ۆ.ۆ. پۋتينگە 1975 جىلى كسرو كگب-سىنىڭ اتتەستاتى بەرىلگەن. وقي ءجۇرىپ بارلاۋ سالاسىندا قىزمەت ەتكەن ول كەيىن وفيتسەرلىك كۋرستى تاماماداعان سوڭ كگب-نىڭ جوعارى مەكتەبىنە قابىلدانعان. - رەد).

وسىنداي سوزدەرى ءۇشىن قازىر ماكارەۆيچ قۋعىنعا تۇسە باستاعانعا ۇقسايدى. ارىپتەسىنىڭ باسىنداعى قيىندىققا الاڭداعان اللا بوريسقىزى ونى نوبەل سىيلىعىن الۋعا كەلىسىم بەرگەنى ءۇشىن قۋعىنعا ۇشىراعان ايگىلى ورىس اقىنى بوريس پاستەرناكقا تەڭەيدى. «اۋعان جەرىنە سوۆەت تانكسىن كىرگىزۋگە قارسى بولعان اندرەي ساحاروۆ تا ءبىر كەزدەرى ماكارەۆيچتىڭ ءسوزىن ايتقان ەدى» دەيدى پۋگاچەۆا.

ۋكرايناداعى احۋالعا بايلانىستى ماكارەۆيچ ءوزىنىڭ ويىن ايتۋعا، پىكىرىن بىلدىرۋگە حاقىلى، سول ءۇشىن ونى بۇرىنعى ماراپپاتارىنان ايىرۋعا بەلسەنە كىرىسكەن ساياسي تۇلعالار مەن ءباسپاسوز وكىلدەرىنىڭ ءىسى قاتە دەي كەلىپ پۋگاچەۆا: «ماكارەۆيچ وسى ۋاقىتقا دەيىنگى سىي-سىياپاتتىڭ ءبارىن ساياسي قايراتكەرلىگى ءۇشىن ەمەس، ونەرى ءۇشىن الىپ كەلدى»، - دەپ جازىپتى ءپۋتيننىڭ قۇزىرىنا ارناعان اشىق حاتىندا.

پۋگاچەۆانىڭ ەرى، بەلگىلى شوۋمەن-ارتيست ماكسيم گالكين دە «ساياسات پەن شىعارماشىلىق جۇمىستى شاتاستىرماۋ كەرەك» دەگەن ءسوزدى ايتىپ ءجۇر.

ساياسي بيلىكتىڭ شەشىمدەرىمەن، ءىس-ارەكەتىمەن كەلىسپەۋ ءوزىن سىيلايتىن، ونەرىنە بەك سەنەتىن، حالقىن حان كورەتىن جۇرتتاردىڭ انشىلەرىندە، ونەر قايراتكەرلەرىنىڭ اراسىندا بولىپ تۇراتىن مىنەز. وسىندايدا رەسەيدىڭ جوعارى ءبىر ماراپاتىنان باس تارتقان ۆاحتانگ كيكابيدزەنىڭ ەرلىگى ەسكە تۇسەدى. سويتەدى دە ءوزىمىزدىڭ بيبيگۇل اپامىزدىڭ: «مەنىڭ نەمەرەم يت سياقتى، قازاقشا تۇسىنەدى، بىراق سويلەي المايدى» دەگەن ءسوزى ويعا ورالادى. سودان كەيىن ومىراۋىنا وردەن-مەدالدارىن سامساتىپ تاعىپ الىپ، «كسرو ءارتىسى» دەگەن اتاقتى بارىنەن ارتىق باعالايتىن اپا-اتالارىمىز كوز الدىمىزعا كەلىپ تۇرا قالادى.

Abai.kz