ەلىمىزدىڭ باس قالاسى – استانا كۇنى مەرەكەسى قارساڭىندا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «شاڭىراق» ستۋدەنتتىك تەاترى ۇجىمى بەلگىلى دراماتۋرگ، قازاقستاننىڭ ەڭبەك سىڭىرگەن قايراتكەرى جولتاي ءالماشۇلى جۇماتتىڭ «مۇڭمەن الىسقان ادام» اتتى سپەكتاكلىن اعىلشىن تىلىندە ساحنالادى. اتالعان سپەكتاكل جىل باسىنان بەرى قوستاناي، سەمەي تەاترلارىندا قويىلىپ، كورەرمەندەردىڭ ىستىق ىقىلاسىنا بولەنىپ، انشلاگپەن وتكەن بولاتىن. ونىڭ ۇستىنە قوستاناي وبلىستىق قازاق دراما تەاترى سول قويىلىمدى ءساۋىر ايىندا ەلوردامىزعا گاسترولدىك ساپارمەن الىپ كەلىپ، تالعامپاز قاۋىمنىڭ نازارىنا ۇسىنىپ، قويىلىم كورەرمەندەردىڭ كوڭىلىنەن شىققان ەدى.

ەندى، مىنە، سول سپەكتاكل ۋنيۆەرسيتەتتىڭ ونەرپاز جاستارىنىڭ ىنتا-جىگەرىمەن اعىلشىن تىلىندە ساحناعا شىعارىلۋى ۇلكەن مادەني جاڭالىق بولدى. بۇل اۆتوردىڭ مەرەيى عانا ەمەس، بۇكىل قازاق دراماتۋرگياسى، قازاق ونەرى ءۇشىن دە ۇلكەن جەتىستىك دەسە بولادى. مۇنى تاۋەلسىزدىكتىڭ ارقاسىندا قول جەتكەن ەلىمىزدىڭ رۋحاني تابىستارىنىڭ ءبىرى، ەلباسىمىزدىڭ ء«ۇش تۇعىرلى ءتىل» يدەياسىنىڭ ىسكە اسقان ءبىر ءساتى. ءبىز شەتەل كلاسسيكتەرىنىڭ درامالارىن انا تىلىمىزگە كوپتەپ اۋدارىپ، ءجيى-ءجيى ساحنالاپ كەلەمىز، ال ەندى ءتول تۋىندىمىزدى شەتەل تىلدەرىنە اۋدارىپ - كورسەتۋ – كوركەمدىك كوكجيەگىمىزدى كەڭىتەتىنى ءسوزسىز. بۇل رەتتە كاسىبي تەاتر ەمەس، جاستارىمىزدىڭ ءوزى تالپىنىپ، دراماتۋرگتىڭ وسى شىعارماسىن تاڭداپ الىپ، ونى اعىلشىن تىلىندە ءساتتى قويىپ شىعۋى قۋانا قوستاۋدى قاجەت ەتەدى. تۋىندىنىڭ تاعى ءبىر ەرەكشەلىگى، ونىڭ تاقىرىبىنىڭ ءوزى شەتەلدە تۇرىپ قالعان قانداستارىمىزدىڭ تاعدىرىمەن تىعىز بايلانىستى. وقىرمانعا تۇسىنىكتى بولۋى ءۇشىن تۇيىندەپ ايتار بولساق، ولاردىڭ تاعدىرى، سپەكتاكلدە كوتەرىلگەن ماسەلە بىلايشا ءوربيدى. 

تاعدىر تالكەگىمەن 20 عاسىردىڭ 30-جىلدارى شەتەلگە اكە-شەشەسىمەن بىرگە كەتىپ قالعان جاس اساننىڭ ارادا 70-80 جىل وتكەندە تۋعان ەلىن ساعىنىپ-اڭساۋى، قازاق توپىراعىنا قايتۋدى ارمان ەتۋى وزەك بولعان. فرانتسيانىڭ پاريج قالاسىنىڭ تۇبىندەگى ءبىر پروۆينتسيادا ۇزاق جىل مەكەندەپ تۇرىپ قالعان قاريا ءوز ۇلدارى مارات پەن ەلجانعا «مەنى تۋعان جەرگە الىپ بارىڭدار» دەپ ءوتىنىش ايتادى. مىنە، وسى تۇستا شەتەلشە تاربيەلەنىپ، شەتەلشە ءبىلىم العان مارات پەن از دا بولسا كەۋدەسىندە قازاققا دەگەن شىنايى سەزىمى بار ەلجان اراسىنداعى پىكىر تايتالاسى باستالىپ جۇرە بەرەدى. اقىرى ەلجان ءوز دەگەنىن ىستەپ، اساندى قازاقستانعا جەتكىزەدى. الايدا، قازاق جەرىندە العاش جولىققان ءبىر ازاماتتىڭ وتە اششى، اۋىر سوزدەرى (بۇگىنگى قازاقتىڭ باسىنداعى ءتۇرلى كەمشىلىكتەر تۋرالى ايتقانى) اسان شالدىڭ كەۋدەسىنە ينەدەي قادالادى... پەسانىڭ ايتار ويى – تۋعان ەلدى ءسۇيۋ، ونى قۇرمەتتەۋ.

كەشكە سىرتقى ىستەر، مادەنيەت جانە ءبىلىم مينيسترلىگىنىڭ، اقپارات اگەنتتىگىنىڭ وكىلدەرى، سونداي-اق شەتەلدىك ەلشىلىكتىڭ جاۋاپتى قىزمەتكەرلەرى قاتىسىپ، شەت ءتىلدى شەبەر مەڭگەرگەن جاس ونەرپاز ۇجىمنىڭ ونەرىنە ءتانتى بولدى. كورەرمەندەر قويۋشى رەجيسسەر جامبىل تىلەپوۆ، كوركەمدىك جەتەكشى ەسبول توكەەۆ، جارىقپەن جانە دىبىسپەن كوركەمدەۋشى ەرحان ورداباەۆ، سول سەكىلدى جاس اكتەرلەر ءداۋىر نۇربولاتوۆ، امانبەك ماعزۇمحان، انار ىزەت، دانا جانابەكقىزى، ەسبول توكەەۆ، اينۇر الىبەكقىزى، الديار جاپارحانوۆتاردىڭ ونەرلەرىنە ءوز ريزاشىلىقتارىن ءبىلدىردى.

ء–بىز بۇل قويىلىمدى الداعى ۋاقىتتا استاناداعى بارشا شەتەلدىك ەلشىلەردىڭ قاتىسۋىمەن ساحنالانعانىن قالايمىز، ونى بولاشاقتا شەتەلدەرگە ۇيالماي الىپ بارۋعا بولاتىنىن دا بايقادىق،–دەيدى سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى ر. ۆاسيلەنكو.

وسىنداي جاستاردىڭ جاڭا باستاماسى ءوز جالعاسىن تاپسا، نۇر ۇستىنە نۇر.

اينۇر نايمانباي,

مادەنيەتتانۋشى   

اباي-اقپارات