بۇگىن اقش-تا ازامات تاجاياقوۆ پەن دياس قادىرباەۆتىڭ ءىسىن قارايتىن سوت باستالادى.

ەستەرىڭىزگە سالا كەتەيىك، ازامات پەن دياس – اقش-تىڭ ماسساچۋسەتسك ۋنيۆەرسيتەتىندە وقىپ جاتقان قازاقستان ازاماتتارى. ول ەكەۋى 2013 جىلى بوستوندا بولعان تەراكتىگە قاتىستى قاماۋعا الىنعان ەدى. وقيعانى ناقتىلاي تۇسەيىك.

نەگىزى تەراكتىنى جاساعان اعايىندى تسارناەۆتاردىڭ ءبىرى – دجوحار تسارناەۆ جانە  ازامات، دياس ۇشەۋى قاتار وقيدى. 2013 جىلى ءساۋىر ايىندا تسارناەۆتار جاساعان سۇمدىق ءىستى تەلەارنالاردان كورىپ قالعان دياس پەن ازامات ءۇش كۇننەن سوڭ دجوحار تسارناەۆتىڭ ريۋكزاگىندەگى نوۋتبۋك پەن پيروتەحنيكالىق قۇرالداردان ادا-كۇدە قۇتىلماق بولىپ ونى قوقىسقا اپارىپ لاقتىرىپ تاستايدى. بۇل، ارينە، بىزگە جەتىپ وتىرعان ءسوزدىڭ ۇزىن-ىرعاسى. ونىڭ ءوزىن تەرگەۋ امالدارىنىڭ بارىسىنداعى بولجام رەتىندە عانا قابىلداعان ءجون. ويتكەنى ەكى بالانىڭ ءسوزىن تىڭداپ،  جۇزدەسكەن جان بولماي تۇر. قر سىرتقى ىستەر مينيسترلىگى ءىستىڭ ءمان-جايىن نازاردا ۇستاپ وتىرعانىن ايتسا، ازامات پەن دياستىڭ اتا-اناسى ۇلدارىنىڭ جازىقسىزدىعىن دالەلدەي الماي تەك ءباسپاسوز وكىلدەرىنە عانا شاعىنىپ ءجۇر.

شىلدەنىڭ 7-ءسى كۇنى تاجاياقوۆ پەن قادىرباەۆتىڭ ادۆوكاتتارىنا ءسوز تيەدى.

ايتپاقشى، ازامات تاجاياقوۆقا قارسى بايان كۇمىسقالي دەگەن قىز ءسوز الىپ، ايعاق بەرەدى. ەگەر تاجاياقوۆتىڭ قىلمىسى دالەلدەنسە، 25 جىلعا باس بوستاندىعىنان ايرىلۋى مۇمكىن.

اقش وكىمەتى قازاق ستۋدەنتتەرىنە بوستونداعى تەراكتنىڭ بولۋى مۇمكىن ەكەندىگىن بىلە تۇرا جاسىرىپ قالدى دەگەن ايىپ تاعىپ وتىر.

Abai.kz