ەلوردادا استانا قالاسى اكىمدىگى قالا كۇنىنىڭ قۇرمەتىنە وسىمەن ءتورتىنشى رەت وتكىزىپ وتىرعان ءداستۇرلى ءمۇشايرا ءوز مارەسىنە جەتتى. بيىلعى «ماڭگىلىك ەل – ۇلت مۇراتى» ايدارىمەن جاريالانعان جىر بايگەسىنە ەلىمىزدىڭ تۇكپىر-تۇكپىرىنەن، قىتاي حالىق رەسپۋبليكاسىنان، مونعوليادان 60-تان استام اقىننىڭ شىعارمالارى كەلىپ تۇسكەن ەدى. ماڭگىلىك ەل تاقىرىبى – وتانشىلدىق، ۇلتتىق رۋحتىڭ مەرەيىن اسىراتىن، ەلدىككە، بىرلىككە ۇندەيتىن، جاس ۇرپاقتىڭ جىگەرىن جانىپ، نامىسىن قايرايتىن، تۋعان ەل مەن تۋعان تىلگە دەگەن سۇيىسپەنشىلىگىن وياتاتىن، قيىننان قيىستىرىپ جىرلاي بىلگەن اقىنعا تولعاعان سايىن كوكجيەگى كەڭەيە تۇسەتىن تۇعىرلى دا عۇمىرلى تاقىرىپ. بايگەدە باعىن سىناعان اقىنداردىڭ بەرىلگەن تاقىرىپتى تەرەڭنەن قوزعاپ، كەڭىنەن قامتىپ جىرلاۋعا بارىن سالعاندىعى بايقالادى. اسىرەسە، بيىلعى ءمۇشايرادا ەلباسىنىڭ «ماڭگىلىك ەل» ۇلتتىق يدەياسىنا بەلسەنە ءۇن قوسقان جاڭا ەسىم – جاس اقىندار قاتارىنىڭ كوپ بولۋى قۋانتادى. مىسالى، سەمەيلىك جاس تالانت ارمان شەريزاتوۆ «سايىپقىران» دەگەن ولەڭىندە تاۋەلسىزدىك تاعدىرىن:

تاڭىرگە ءتان رۋحىممەن اسپاندىق،

تاريحىمدى تاسقا جازعام داستان عىپ.

قازىر ءبىزدى جەر ۇستىندە تەربەپ تۇر،

قازتۋعان مەن اسان كۇتكەن بوستاندىق!

بودان بولعان ءومىردىڭ قاي بار ءمانى،

قۇسا قىسقان قۇس سەكىلدى تورداعى؟! 

قىران بولىپ قالىقتادى اسپانعا،

ازاتتىقتى كۇتكەن ەلدىڭ ارمانى، -

دەپ تولعاسا; «سەندەي بولسىن بارلىق وتان، بار انا» اتتى ولەڭىمەن قاتىسقان الماتىلىق جاڭا ەسىم اقسۇيرىك ىزمۇقانوۆا:

مەيىرىمىڭ مۇحيتتان دا مول بىلسەم،

جىلاعانعا جىلى قۇشاق بولدىڭ سەن.

تۋعان وتان، شۋاق تۇنعان شاراڭا،

سەندەي بولسىن بارلىق وتان، بار انا!

قاسيەتتى قازاقستان - نۇرلى ەلىم،

قۇشاعىڭدا شەشەك اتتىم، بۇرلەدىم!-

دەپ، جاستىعىنا قاراماستان پەرزەنتتىك ماحابباتپەن بيىكتەن ءۇن قاتىپ، تەبىرەنە جىرلايدى. جاس  اقىنداردىڭ ءسوز ونەرىن ەركىن يگەرىپ، ەلدىك رۋحتى، مەملەكەتتىك مۇددەنى توگىلە جىرلاپ، قيىن دا كۇردەلى تاقىرىپتى جان-جاقتى اشا ءبىلۋى بولاشاقتارىنان مول ءۇمىت كۇتتىرەدى. سونداي-اق، قاراعاندىلىق ابزال بوكەن، ءىلياس مۇقاەۆ، جەزقازعاندىق كەنجەباي احمەتوۆ، الماتىلىق رافاەل نيازبەكوۆ، استانالىق تالعات ەشەنۇلى سياقتى تانىمال اقىندار دا ءوز بيىكتەرىنەن كورىنە ءبىلدى. جالپى العاندا، ەل تاۋەلسىزدىگىن ۇلت بولاشاعىن، حالقىمىزدىڭ ازاتتىق جولىنداعى ەرلىك تاريحىن، جاڭا زاماننىڭ جارقىن كەلبەتىن ولەڭمەن ورنەكتەپ، ەلباسىمىز ءوز قولىمەن ورناتقان استانانىڭ جىر-شەجىرەسىن جاساۋدى ماقسات ەتكەن ءمۇشايرا دىتتەگەن جەرىنە جەتتى. 

اكادەميك، فيلولوگيا عىلىمدارىنىڭ دوكتورى، پروفەسسور، ەۋرازيا ۇلتتىق ۋنيۆەرسيتەتىنىڭ فيلولوگيا كافەدراسىنىڭ مەڭگەرۋشىسى  سەيىت قاسقاباسوۆ توراعالىق ەتكەن، قۇرامىندا جازۋشى، مەملەكەتتىك سىيلىقتىڭ لاۋرەاتى قويشىعارا سالعاراۇلى، اقىن، مەملەكەتتىك سىيلىقتىڭ لاۋرەاتى نەسىپبەك ايتۇلى، حالىقارالىق «الاش» سىيلىعىنىڭ يەگەرى سەرىك اقسۇڭقارۇلى، اقىن، «تۇمار» جۋرنالىنىڭ باس رەداكتورى وڭايگۇل تۇرجان بار قازىلار القاسى مۇشايرعا تۇسكەن شىعارمالاردى مۇقيات وقىپ، ساراپتاپ، سارالاپ، اقىلداسا كەلە تومەندەگىدەي شەشىم شىعاردى:

باس جۇلدە – تەمىر تۇلپاردى سەمەيلىك جاس اقىن ارمان شەريزاتوۆ تاقىمىنا باستى. ءبىرىنشى ورىندى (1 ميلليون 500 مىڭ تەڭگە) الماتىلىق تالانتتى قىزىمىز اقسۇيرىك ىزمۇقانوۆا قانجىعاسىنا بايلاندى. ەكى ەكىنشى ورىندى (800 مىڭ تەڭگەدەن) قاراعاندىلىق  قوس اقىن - ابزال بوكەن مەن ءىلياس مۇقاەۆ يەلەندى. ءۇشىنشى ورىنعا تىگىلگەن ءۇش جۇلدەنى (400 مىڭ تەڭگەدەن) حالىقارالىق «الاش» سىيلىعىنىڭ يەگەرى، «شەشەنستاننىڭ حالىق باتىرى»، الماتىلىق رافاەل نيازبەكوۆ، جەزقازعاندىق  كەنجەباي احمەتوۆ جانە استانالىق بەلگىلى اقىن تالعات ەشەنۇلى ءوزارا ءبولىستى. بەس ىنتالاندىرۋ سىيلىعىن (150 مىڭ تەڭگەدەن) مونعوليالىق قارت اقىن شىناي راحمەتۇلى، الماتىلىق باتىق ءماجيتۇلى, قىتاي حالىق رەسپۋبليكاسىنىڭ ازاماتى سەرىك ءتۇسىپحانۇلى, اقتوبەلىك بالتابەك نۇرعاليەۆ, اياگوزدىك جاس تالاپكەر ءبىرجان احمەر قاتارلى اقىندار ەنشىلەدى. سونداي-اق، ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، استانا قالالىق ءتىل باسقارماسىنىڭ باستىعى ەربول تىلەشەۆ، استاناداعى «فوليانت» باسپاسىنىڭ ديرەكتورى نۇرلان يسابەكوۆ تاعايىنداعان ءۇش ارنايى سىيلىق (100 مىڭ تەڭگەدەن) استانالىق باقىتجان توباياقوۆقا، شىمكەنتتىك جارىلقاسىن بورانباەۆقا، اقتوبەلىك گۇلجاينار قالديناعا بۇيىردى.

جۇلدە العان جانە ءمۇشايرا قورجىنىنا كەلىپ تۇسكەن شىعارمالاردىڭ تاڭداۋلىلارى جىل اياعىنا دەيىن جەكە كىتاپ بولىپ باسىلادى.

جۇلدەگەرلەردى ماراپاتتاۋ ءراسىمى استاناداعى «كونگرەسس حولل» سارايىندا 1 شىلدە كۇنى كەشكى 18.00 ساعاتتا ونەر جۇلدىزدارىنىڭ قاتىسۋىمەن وتەدى.

سەرىكحان سابىربەكوۆ،

س.سەيفۋللين مۇراجايى

ديرەكتورىنىڭ ورىنباسارى،

قازىلار القاسىنىڭ

جاۋاپتى حاتشىسى

Abai.kz