ەۋرازيالىق ينتەگراتسيا مادەني-گۋمانيتارلىق بايلانىستاردى، ءتۋريزمدى جەمىستى دامىتۋ ءۇشىن كوپتەگەن باسىمدىقتار بەرەدى. وسىنىڭ بارلىعى ميلليونداعان ادامدار ءۇشىن ناقتى تيىمدىلىك بولماق،- دەدى ەلباسى نۇرسۇلتان نازارباەۆ 28 ساۋىردە م. لومونوسوۆ اتىنداعى ممۋ-ىندە سويلەگەن سوزىندە. قازىرگى كەزدە قازاقستان ۇكىمەتى تۋريستىك سالانى دامىتۋعا ەرەكشە كوڭىل بولۋدە. ماسەلەن، جۋىردا مينيسترلەر كابينەتى وتاندىق تۋريستىك سالانى دامىتۋدىڭ 2020 جىلعا دەيىنگى كەزەڭگە ارنالعان تۇجىرىمداماسىن قابىلدادى.

اتالعان تۇجىرىمدامانىڭ نەگىزگى ستراتەگيالىق ماقساتى – قازاقستاندى 2020 جىلعا قاراي جاھاندىق دەڭگەيدە تۋريستىك ورتالىقتىڭ بىرىنە اينالدىرۋ. ول ءۇشىن بەس اۋماقتىق كلاستەرلەر – استانا، الماتى، شىعىس قازاقستان، باتىس قازاقستان جانە وڭتۇستىك قازاقستاندى دامىتۋ ۇسىنىلعان. اتاپ ايتقاندا، استانا مەن الماتىنى ىسكەرلىك ءتۋريزمنىڭ، شىعىس قازاقستاندى – ەكولوگيالىق ءتۋريزمنىڭ، وڭتۇستىك قازاقستاندى – مادەني ءتۋريزمنىڭ، باتىس قازاقستاندى – جاعاجاي ءتۋريزمىنىڭ ورتالىعى رەتىندە وركەندەتۋ كوزدەلگەن. سالا ماماندارىنىڭ ايتۋىنشا، اتالعان جوبالار تولىعىمەن ىسكە اسىرىلعان جاعدايدا ەلىمىزگە كەلەتىن تۋريستەردىڭ اعىنى جىلىنا 8 ملن-نان استام ادامدى قۇراپ، 200 مىڭنان استام جاڭا جۇمىس ورىندارىن اشىلادى.

جالپى العاندا، قر پرەمەر-ءمينيسترىنىڭ ورىنباسارى - يندۋستريا جانە جاڭا تەحنولوگيالار ءمينيسترى اسەت يسەكەشەۆتىڭ پىكىرىنشە، تۋريستىك سالانى ءتيىمدى ءارى جەدەل دامىتۋ ءۇشىن بەس باعىتتاعى ءىس-شارالاردى جۇزەگە اسىرۋىمىز كەرەك. بىرىنشىدەن، ءتۋريزمدى الەۋمەتتىك سالادان شىعارىپ، ەكونوميكانىڭ باسىمدىققا يە سەكتورىنا اينالدىراتىن كەز كەلدى. «تۋريستىك سالا ءتىپتى، ءجىو-ءنىڭ وسۋىنەن دە تەز وركەندەيدى. ارتىقشىلىقتاردىڭ ءبىرى، تۋريزم سالاسىنداعى ءبىر جۇمىس ورنى وندىرىسكە قاراعاندا 10 ەسەگە ارزان. الەمدە قازىر تۋريزمدە ءاربىر 11-12-ءشى ادام جۇمىس ىستەيدى. حالىقارالىق تۋريزم ەڭ الدىمەن، جاستار مەن ايەلدەردى جۇمىسپەن قامتىپ وتىر»،- دەيدى ءا. يسەكەشەۆ.

ەۋرازيالىق ينتەگراتسيانىڭ قارقىن الۋى بۇل سالاعا تەك جاعىمدى جاعىنان ىقپال ەتەدى. مىسالعا، قازىرگى كەزدە قىتاي، رەسەي، ءۇندىستان سياقتى جەدەل دامىپ كەلە جاتقان الەۋەتتى نارىقتار قازاقستانعا قىزىعۋشىلىق تانىتىپ وتىر. بۇعان قازاقستان مەن قىتايدىڭ ۇلى جىبەك جولىن قايتا جاڭعىرتۋ باعىتىنداعى ۇمتىلىستارى پايداسىن تيگىزەدى. تەك شەكارامىزدى اشىپ، تۋريستەرگە قولايلى جاعداي تۋعىزاتىن بولساق، ءىس وڭعا باسادى. حالىقارالىق ساراپشىلار قازاقستاندا تۋريستىك سالانىڭ 2020 جىلعا دەيىن دامۋىنىڭ ءۇش ءتۇرلى ستسەناريىن ۇسىنۋدا. پەسسيميستىك نۇسقاسى: 50-60 مىڭ جۇمىس ورىندارىن اشۋ، جەكەمەنشىك ينۆەستيتسيالار ۇلەسى – 2 ملرد دوللار، ءجىو-دەگى ۇلەسى – 1 پايىز. باتۋالىق نۇسقاسى: 150-170 مىڭ جۇمىس ورنى، 6-6,5 ملرد دوللار ينۆەستيتسيا، ءجىو-دەگى ۇلەس – 1,5 پايىز. وپتيميستىك نۇسقا: 270-300 مىڭ جۇمىس ورىندارى، 6-6,5 مرلد جەكەمەنشىك ينۆەستيتسيالار، ءجىو-دەگى ۇلەسى – 3 پايىز. ياعني، وسى ۇشەۋىنىڭ ءبىرىن تاڭداۋىمىز كەرەك. ۇشىنشىدەن، جوبالار مەملەكەتتىك-جەكەمەنشىك ارىپتەستىك اياسىندا ىسكە اسىرىلىپ، ءىرى قوسالقى ينۆەستور تاعايىندالادى. ءتورتىنشى باعىت ءىرى كەشەندىك جوبالاردى قارجىلاندىرۋدى قاراستىرادى. بەسىنشىدەن، قولدانىستاعى نورماتيۆتىك-قۇقىقتىق اكتىلەرگە وزگەرىستەر ەنگىزىلەدى. بۇل ەڭ الدىمەن، ەكونوميكالىق جانە ساياسي تۇراقتى ەلدەردىڭ ازاماتتارىنا ۆيزالىق ءتارتىپتى الىپ تاستاۋ، ارنايى تۋريستىك ايماقتاردى قۇرۋ جانە ت.ب. ماسەلەلەردى قامتيدى.

تۋريزم يندۋسترياسى كوميتەتىنىڭ توراعاسى مارات يگاليەۆتىڭ ايتۋىنشا، اتالعان تۇجىرىمدامانى ىسكە اسىرۋ ءۇشىن بىرقاتار جۇيەلى ماسەلەلەردى شەشىپ العان ابزال. سونىڭ ءبىرىنشىسى – تۋريزم ينفراقۇرىلىمىن جاقسارتۋ. بۇعان جول، كوممۋنيكاتسيالار، ەنەرگەتيكا جانە ت.ب. جاتادى. ەگەر دە ەلباسىمىز ايتقانداي، مينسك-ماسكەۋ-استانا-الماتى باعىتىندا جۇردەك تەمىر جول ماگيسترالى سالىناتىن بولسا، سونداي-اق، بولاشاق ەۋرازيا ەكونوميكالىق وداعىنىڭ اۋمىعىمەن وتەتىن اۆتوكولىك جولدارىن جاڭعىرتاتىن بولساق، بۇل سەرىكتەس-ەلدەر اراسىنداعى ءتۋريزمدى دامىتۋعا ەرەكشە سەرپىن بەرەدى. ونىڭ ۇستىنە، ادام كاپيتالىنىڭ ەركىن قوزعالىسى ناتيجەسىندە بىلىكتى كادرلار تارتۋ، جۇمىسقا ورنالاسۋ، سەرىكتەس-ەلدىڭ اۋماعىندا بيزنەس اشۋ سياقتى ماسەلەلەر وڭاي شەشىلەدى. وسىلايشا، بىرلەسكەن تۋريستىك جوبالاردى جۇزەگە اسىرۋعا جول اشىلادى.

ءامىرلان ءالىمجان.