سەنبى, 18 قاڭتار 2020
وسى عوي ەندى... 6079 0 پىكىر 30 مامىر, 2014 ساعات 13:04

قوستاناي كۇلدى-بادام ەسكەرتكىشتەردىڭ مەكەنى مە؟

كەيىنگى كەزدەرى قوستانايدى اشىق اسپان استىنداعى  ەسكەرتكىشتەردىڭ كۇلدى-بادام قوقىسىن ساقتايتىن مۇراجايىنا ۇقساتاتىن بولدىم. ويپىر-اي، ءبىزدىڭ شاھاردا نە جوق دەيسىڭ. شالتيگەن چاپلين ءتورىمىزدى بەرمەۋگە اينالدى. ماڭعاز ناپولون دا وسىندا كەلىپ جايعاسقان. نايزاسىن شوشايتقان جاننا دارك تا بىزگە سۇس كورسەتەدى. ۇسقىنسىز ستۋدەنت تە، دولبارلاپ جاساي سالعان بولات قۇيۋشى دا قوستانايدى ۇناتقان سىڭايلى.

ءجا، مۇنىڭ ءبارىن تالعامسىزدىقتىڭ تايراڭداۋى دەگەنگە سايالىق. جاقىندا وبلىستىق اكىشمشىلىكتىڭ جانىندا بوي كوتەرگەن ەسكەرتكىشتى قويۋشىلار ەگەمەندى ەلىمىزدىڭ نىشانىن بەينەلەدىم دەپ ويلاسا كەرەك. ال شىن مانىندە بۇل ەسكەرتكىشسىماق بىلە-بىلگەن ادامعا سول ەگەمەندىگىمىزدى مازاق ەتىپ تۇرعانداي. ايتپەسە كىپ-كىشكەنە باكەنە بويلى، كوزگە قوراش ەسكەرتكىشتە قانداي دۇنيەلەر بەينەلەنگەنىن ۇعۋ قيىن. قالپاعى كوزىن جاۋىپ تۇرعان، ساقالى ساپسيعان شال نەنى اڭعارتادى؟ ال، باتىرىمىز جاپوندىقتاردىڭ جاۋىز جاۋىنگەرى—نينزيانى كوزگە ەلەستەتەدى. قازاق باتىرى ارقاسىنا قاشان قىلىش اسىنىپ ەدى. اقساقالىمىزدىڭ اياعىنىڭ استىندا تۇرعان كەسەنە كىمنىڭ ويىنشىعى؟ ءبىر وكىنىشتىسى، وسى ءبىر سيىقسىز كورىنىستى وسى ۋاقىتقا دەيىن ەشكىم دە كوڭىل اۋدارىپ، «اۋ، بۇلارىڭىز نە؟» دەگەن جان تابىلماپتى. اتامىز قازاق «جانى اشىماستىڭ قاسىندا باسىڭ اۋىرماسىن» دەگەندى وسىندايدا ايتسا كەرەك.

 

تاۋەلسىز ەل اتانعانىمىزعا 20 جىلدان اسسا دا ەلدىگىمىزدىڭ بەلگىسى—وسى ەسكەرتكىشتەردى وي تالقىسىنان وتكىزۋگە ەشكىمنىڭ دە قولى تيەر ەمەس. ەسكىرگەن، بۇگىنگى تالاپقا ساي كەلمەيتىن ەسكەرتكىشتەردى قايتا جاڭارتۋ نەمەسە جاڭادان سالۋدى قولعا الاتىن ۋاقىت جەتكەن سەكىلدى. ماسەلەن، اتاقتى ىبىراي اتامىزدىڭ ەسكەرتكىشى شىتىناپ جارىلىپ، ابدەن توزىعى جەتتى. ونى بيلىك باسىنداعىلار كوز الداۋ ەتىپ، جارىلعان جەرىن بىردەڭەمەن سىلاپ-سيپاپ اۋرە بولىپ ءجۇر. ەسكەرتكىشكە جارىماي، تەك باسى عانا قويىلعان امانكەلدىنىڭ بەينەسىن جاڭارتسا، كىم قولىن قاعىپتى؟ جوق، بىزدە بۇعان ەشكىم دە كوڭىل بولمەيدى. ال ەندى لەنين ەسكەرتكىشىن الديلەپ، كۇتىپ ۇستاۋدا، بولماسا ونى قايتا جاعىرتىپ، كاسىپورىندار اۋلاسىنا قويۋعا كەلگەندە ۋاقىت تا، قارجى دا، ىقىلاس تا تابىلادى. پۋشكيندى دە الپەشتەپ قالا اكىمدىگىنىڭ قارسى الدىنا ورناتىپ، كورشى ەلدىڭ ۇلى اقىنىنا دەگەن ىستىق سۇيىسپەنشىلىگىمىزدى بايتاق ەلگە ايعاقتادىق.

  

جالپى، ءبىز قوستانايدا ەسكەرتكىشتەردىڭ قانداي يدەياعا سۇيەنىپ قويىلاتىندىعىن تۇسىنە المادىق. شەتەلدىڭ باتىرلارى مەن اقىندارىنا دەگەن ىقىلاسىمىز الابوتەن. بىراق، وزىمىزگە كەلگەندە تارىلا قالامىز. مىسالى، ءتۇبى قوستانايلىق بولىپ سانالاتىن شوقانعا دا ءبىر ەسكەرتكىش بۇيىرمادى. ايگىلى باتىرىمىز سۇلتان بايماعامبەتوۆتىڭ بەينەسىن كورۋگە زار بولىپ ءجۇرمىز. باس اقىنىمىز اباي تۋرالى ءتىپتى ايتۋعا دا ۇيالامىز.

وزگە جەرلەردى بىلمەيمىن، بىزدەگى ەسكەرتكىشتەرگە قاتىستى جايت وسىنداي.

بىلە-بىلگەن جاندارعا ەسكەرتكىش دەگەنىمىز وسكەلەڭ ۇرپاقتى پاتريوتتىق رۋحتا تۋربيەلەۋدىڭ تاپتىرماس قۇرالدارىنىڭ ءبىرى ەكەندىگى تايعا تاڭبا باسقانداي انىق دۇنيە.

Abai.kz

0 پىكىر