2007 جىلى باستالعان الەمدىك ەكونوميكالىق  داعدارىس كەزىندە ەل ءىشىن ارالاپ شىققان ەلباسىمىز: «مەن اۋىل ادامدارىمەن جۇزدەستىم. ولار ماعان: «سەندەر «داعدارىس-داعدارىس» دەيسىڭدەر، سول داعدارىستى ءبىز ءتىپتى سەزىنىپ تە وتىرعان جوقپىز» دەدى» دەپ كۇلگەن ەدى. ءيا، ول داعدارىستى كوڭىلى داعارداي توق قازەكەڭ داڭعىرلاپ ءجۇرىپ وتكىزگەن-ءدى. الگى اتالعان داعدارىس 2007-2009 جىلدار ارالىعىندا ءبىر جاقتى تياناق تاپقانداي بولعان. سويتسەك تياناق تاپپاتى، كەرىسىنشە بۇگىنگى داعدارىستىڭ بۇلىك باسى سول داعدارىستان باستالىپ جاتقانعا ۇقسايدى.

بۇگىن استاناداعى ورتالىق كوممۋنيكاتسيالار ۇيىندە «جاھاندىق سىناق ۋاقىتى: جاڭا سىن-قاتەرلەر» اتتى دوڭگەلەك ۇستەلدە قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ءبىرىنشى ورىنباسارى ءلاززات مۇزاپاروۆا (سۋرەتتە) الەمدىك ەكونوميكالىق داعدارىستىڭ بەس نەگىزگى سەبەبىنىڭ ءبىرى رەتىندە وسىنى  اتادى.

«الەمدىك ەكونوميكانى شارپىعان قازىرگى داعدارىس 2007-2009 جىلدارداعى  قارجىلىق-ەكونوميكالىق داعدارىستىڭ جالعاسى بولىپ تابىلادى. سەبەبى جاھاندىق جۇيەنىڭ كەسىرىنەن تۋىنداعان 2007-2009 جىلدارداعى داعدارىستىڭ فۋندامەنتالدىق كەمشىلىكتەرى  دەر كەزىندە شەشىلگەن جوق»، - دەدى ول.

بۇدان كەيىن  ءلاززات مۇزاپاروۆا حانىم الەمدىك قارجىلىق-ەكونوميكالىق داعدارىستىڭ  سەبەبى مەن سالدارىنا اينالعان   نەگىزگى بەس ماسەلەگە توقتالدى.

«بىرىنشىدەن، الەمدىك نارىقتى ورتالىقتاندىرىپ، رەتتەپ تۇراتىن مۇمكىندىكتىڭ جوقتىعى، ەكىنشىدەن، الەمدىك ەكونوميكانىڭ ناقتى سەكتورىمەن سالىستىرعاندا قارجىلىق سالانىڭ وزىق دامۋى. بۇنداي جاعدايدا اقشا وندىرىسكە ەمەس، الەمدىك نارىقتارداعى سپەكۋلياتسياعا تۇسەدى. ۇشىنشىدەن، شيكىزاتقا باعانىڭ دەفورماتسياسى  ىقپال ەتتى»، - دەدى ول.

وسى ورايدا ينستيتۋت وكىلى شيكىزات باعالارى الەمدىك قارجى نارىقتارىنداعى اقشا كولەمىنە كوبىرەك تاۋەلدى بولا باستاعانىن اتاپ ءوتتى.

ءتورتىنشى كەمشىلىك - قازىرگى قولدانىستاعى قارجىلىق جۇيەنىڭ جۇمىسى - بۇل ينۆەستيتسيالىق تالاپتاردىڭ بۇرمالانعان جۇيەسى.  بۇل جۇيە الەمدىك رەيتينگتىك اگەنتتىكتەردىڭ وبەكتيۆسىز رەيتينگتەرىنە نەگىزدەلگەنىن اشكەرەلەدى. سونداي-اق، بەسىنشى كەمشىلىك - دامىعان ەلدەردىڭ شارۋاشىلىق سۋبەكتىلەرى مەن ءۇي شارۋاشىلىقتارىنىڭ شامادان ارتىق نەسيلەندىرىلۋى جانە شەكتەن تىس قارىزدارعا قىزمەت كورسەتۋدىڭ كۇردەلەنە ءتۇسۋى.

قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ءبىرىنشى ورىنباسارى ءلاززات مۇزاپارۆا داعدارىستىڭ بەس سەبەبىن وسىلايشا ءتىزىپ شىقتى. ارينە، كەز كەلگەن داعدارىستىڭ شەگى بولادى. بۇل داعدارىستان دا الەم جول تابۋى ىقتيمال. ەڭ باستىسى: داعدارىستى الەم حالقىمەن بىرىگە وتىرىپ جەڭگەن ءجون شىعار. الايدا، تۇيىققا تىرەلگەن رەسەي ەكونوميكاسىمەن بىرگە بۇگىنگى جاڭا سىن-قاتەرلەردى  كەشىپ ءوتۋ ەۋرازيالىق وداق جاعدايىندا مۇمكىن بە؟ قازاق حالقىن، مىنە، وسى جايت بارىنەن بۇرىن قاتتى تولعاندىرىپ تۇر.

Abai.kz