نەسىن ايتاسىڭ، بيىلعى قوي جىلىنىڭ قاپتاعان جاڭالىقتارى، شىنىن ايتقاندا، كوپشىلىككە ەس جيعىزباي جاتىر. اۆتوكرەسلو پەن «جول ءجۇرۋ ەرەجەلەرىنىڭ» قايتا-قايتا وزگەرىستەرگە ۇشىراۋى، كۋالىك-پۋالىك سياقتىلاردىڭ تاعى وزگەرۋى قاراپايىم حالىقتى اڭ-تاڭ قىلىپ تاستادى. حالىق قازىر جۇمىس ەمەس، «وزگەرىستەرگە ۇشىراعان كوپتەگەن وزگەرىستەردى» رەتتەۋ ءۇشىن كوشەگە شىعاتىن سياقتى. كۇلەتىن نارسە ەمەس، راسىندا دا وسىلاي. قاپتاعان وزگەرىستەردى «قانىمىزعا سىڭىرەمىز» دەپ ءجۇرىپ... قازاقستاندىقتار تاعى ءبىر جاڭالىقتى ەستەرىنەن شىعارىپ العانعا ۇقسايدى – وزگە جاڭالىقتار سياقتى، بۇل جاڭالىق تا بيىلعى جىلدىڭ ءبىرىنشى قاڭتارىنان باستاپ كۇشىنە ەنگەن بولاتىن.

ىشكى ىستەر مينيسترلىگىنىڭ رەسمي مالىمەتتەرىنە قاراعاندا، بۇدان بىلاي قاراي قازاقستاندىقتارعا ءوز كولىكتەرىنىڭ الدىڭعى-ارتقى جانە بەلدەۋ جاقتارىن تەمىر زاتتارمەن (رەسمي تىلدە «مەتالليچەسكي پرەدمەت» دەسە، قاراپايىم حالىق ونى «كەنگۋرياتنيك» دەيدى) جيەكتەپ، قورشاپ قويۋعا رۇقسات جوق. ەگەر 2015-ءشى جىلعا دەيىن اۆتوكولىكتەردەگى «كەنگۋرياتنيكتەرگە» جول پوليتسياسىندا ارنايى بەلگىلەنىپ بارىپ رۇقسات ەتىلەتىن بولعان بولسا، بۇدان بىلاي قاراي بۇل ماسەلە دە ەرەجە بۇزۋ بولىپ ەسەپتەلەدى. ال ەگەر، «اباي.KZ-ءنىڭ» قۇرمەتتى وقىرمانى، ءسىزدىڭ اۆتوكولىگىڭىزدەگى قورشاۋ تەمىرلەر (كەنگۋرياتنيكتەر) 2015-ءشى جىلعا دەيىن جول پوليتسياسى بولىمىندە ارنايى بەلگىلەنىپ قويىلعان بولسا، وندا البەتتە، ول «كەنگۋرياتنيكتەرىڭىزدى» تالقانداپ، بۇزباي-اق قويۋىڭىزعا ابدەن بولادى.

مارات ماداليموۆ.

اباي.kz