قاراعاندىدا قارجى ماحياناتسيالارىنا بايلانىستى تاعى دا قىرعىن اڭىگىمە شىقتى. بۇل جولعى اڭگىمەنىڭ باستى كەيىپكەرى – كەزىندە اتاعى ايعا شاپشىعان باياعى «ۆاليۋت-ترانزيت بانكتىڭ» بۇرىنعى باس بۋحگالتەرى ولگا ەۆلانوۆا دەگەن حانىم. ءسويتىپ، كوپتەن بەرى «قازانىنىڭ قاقپاعى» جابىلىپ، ءۇن-ءتۇنسىز بولىپ قالعان وسىناۋ بانكتىڭ توڭىرەگىندەگى سەڭ تاعى قوزعالدى. قالاداعى قازىبەك بي اۋداندىق سوتىنىڭ شەشىمىنە سايكەس ەۆلانوۆا حانىم 1,7 ميلليارد تەڭگە شاماسىندا بولاتىن سومانى بانكتىڭ تاراتۋ كوميسسياسىنا قايتارۋعا ءتيىستى. البەتتە، جالعىز ەمەس، «بانكتىڭ بانكروت  بولۋىنا سەپتىگى تيگەن» وزگە دە تۇلعالارمەن بىرىگە وتىرىپ قايتارۋعا ءتيىستى. ال ەندى «نەگە ءبىر جارىم ميلليارد تەڭگە؟» دەگەنگە كەلەتىن بولساق، تاراتۋ كوميسسياسىنىڭ ايتۋىنا قاراعاندا، بانكتىڭ ەكس-پرەزيدەنتى ايتباقى ءبىلالوۆ (اندرەي بەلياەۆ) پەن ونىڭ التى بىردەي ارىپتەسى سوتتالىپ كەتكەلى بەرى تۋرا وسىنشا سوما بانكتىڭ موينىنداعى قارىزىن جابۋعا جەتپەي تۇر ەكەن.

ەگەر ەسىمىزگە تۇسىرە كەتەتىن بولساق، ءبىلالوۆ پەن ونىڭ ارىپتەستەرى سوتتالعان كەزدە سوت ولارعا 6,5 ميلليارد تەڭگە قارىزدارىن جابۋدى مىندەتتەگەن بولاتىن. سول قارىزداردى جابۋ ماقساتىندا ەكس-بانكير كەنشىلەر استاناسىنداعى باس كەڭسەسىن، سونىمەن بىرگە «چايكا» جانە «قازاقستان» دەپ اتالاتىن قوناق ۇيلەرىن، وعان قوسا «بالالار سارايىن» ساتقان بولاتىن، الايدا ولاردان تۇسكەن قارجى قارىزدى جابۋعا جەتە قويماعاسىن ايتباقى ءبىلالوۆ (مارقۇم) تۇرمەدە تاۋىپ جاتقان ەڭبەكاقىسىن دا قارىزى ەسەبىنە اۋدارىپ وتىرعان. ونىڭ سوتتى بولعان ارىپتەستەرى دە وسىلاي ىستەگەن. بىراق قارىز سوندا دا جابىلماپتى. سوتتىڭ مالىمەتىنە قاراعاندا، بانكروت بانكتىڭ موينىنداعى قارىزى، ەۆلانوۆا حانىمعا شىعارىلعان شەشىمدە كورسەتىلگەندەي، 1,7 ميلليارد تەڭگە ەكەن.

ەۆلانوۆا حانىم سوتتا ءوز كىناسىن مويىنداعان جوق. حانىمنىڭ ايتۋىنا سەنەتىن بولساق، ونىڭ ءوز باسى ءبىر دە ءبىر ادامعا ماتەريالدىق تۇرعىدا زيان كەلتىرمەپتى، سونىمەن بىرگە بانك قارجىسىن ءبولۋ-تاراتۋ ماسەلەلەرىنە دە ەشقانداي قاتىسى (؟!) بولماپتى. دەسە دە... اۋداندىق سوتتىڭ شەشىمى بويىنشا ايتباقى ءبىلالوۆ، عابيدەن ساناۋباروۆ، ماكسيم شۆاچكو، بوتاگوز كوپەەۆا، لاريسا كيم، سۆەتلانا پانفيلوۆا جانە سۆەتلانا پاۋل سياقتى ولگا ەۆلانوۆا دا «ۆاليۋت-ترانزيت بانكتەگى» قارجى ماحيناتسيالارىنا كىنالى دەپ تابىلدى. سوندىقتان بانك قارىزىن جابۋ ءۇشىن ول دا وزگەلەرمەن بىرگە جاۋاپكەرشىلىك جۇگىن ارقالاۋعا ءتيىستى. ايتسە دە اۋداندىق سوت شەشىمى ازىرگە كۇشىنە ەنگەن جوق، ويتكەنى ولگا ەۆلانوۆا قاراعاندى وبلىستىق سوتىنا اپەللياتسيالىق شاعىم ءتۇسىردى.

مارات ماداليموۆ.

اباي.kz