شىعىسقازاقستان وبلىسىنىڭ اكىمى د.ك. احمەتوۆقا اشىق حات

قۇرمەتتى دانيال كەنجەتايۇلى!

وسكەمەندە جاڭا تەاتر عيماراتىنىڭ سالىنا باستاۋىنا بايلانىستى وسى كۇنگە دەيىن جىر الىبى جامبىلدىڭ اتىمەن اتالىپ، ءبىر شاڭىراق استىنا قازاق جانە ورىس ترۋپپالارىن سىيدىرا بىلگەن 80 جىلدىق تاريحى بار دراما تەاترى بۇرىنعى وبلىس اكىمى ب.م. ساپارباەۆتىڭ 2014 جىلدىڭ 28 قازانىنداعى №287 قاۋلىسىمەن رەورگانيزاتسياعا ۇشىراعان. اتالعان قاۋلى ساياسي قاتەلىككە جول بەرىپ، ۇلتتىق رۋحاني پاتريوتتىق تاربيەگە وراسان زور نۇقسان كەلتىرۋدە. بۇل قاتەلىكتىڭ ورىن الۋىنا سەبەپ – ب.م. ساپارباەۆ مىرزانىڭ بۇعان دەيىنگى جىبەرگەن ولقىلىقتارى.

         اتاپ ايتار بولساق:

1. 2014 جىلدىڭ 21-ءشى تامىزىندا (رەسپۋبليكالىق «زاڭ» گازەتىنىڭ 158 سانىندا) تابيعاتتا جوق، ەشقايدا تىركەلمەگەن تەاتردىڭ ديرەكتورلىق لاۋازىمىنا كونكۋرس جاريالانىپ، ناتيجەسىندە پاۆلودار قالاسىنىڭ تۇرعىنى  د.م. ۇياباي ديرەكتور بولىپ تاعايىندالعان.

2. د.م. ۇياباي مىرزاعا بيۋدجەتتىك ەسەپتەن ەڭباكاقى تولەۋ ماقساتىندا 2014 جىلدىڭ 9 قىركۇيەگىندە ب.م. ساپارباەۆ ءوزىنىڭ №236 قاۋلىسىمەن جوق تەاتردى بار ەتىپ، شىعىس قازاقستان وبلىستىق دراما تەاترىن قۇرۋ تۋرالى قاۋلى شىعارعان.

3. قۇرىلىسى بىتپەگەن تەاتردىڭ زاڭدى مەكەن جايى جوق جانە تەاتر ەكسپلۋاتاتسياعا قابىلدانباعان. ال، جاڭا تەاتردىڭ زاڭدى مەكەن جايى دەپ شىعىس قازاقستان وبلىستىق مادەنيەت باسقارماسىنىڭ جالداپ وتىرعان مەكەن تۇراعى كورسەتىلگەن.

  4. ب.م. ساپارباەۆ مىرزا جاڭا تەاتردىڭ قۇرىلىسى باستالعان ۋاقىتتان باستاپ وسى كۇنگە دەيىن بۇقارارالىق اقپارات قۇرالدارى ارقىلى، حالىق الدىنا شىعىپ بەرگەن جىلدىق ەسپتەرىندە جانە ءار ءتۇرلى قوعامدىق كەزدەسۋلەردە شىعىس قازاقستان وبلىستىق جامبىل اتىنداعى دراما تەترىنا ارنالىپ سالىنىپ جاتقاندىعىن مالىمدەۋدەن تانباعان.

مىنە، وسى اتالعان سوراقىلىقتاردى زاڭداستىرۋ ماقساتىندا جوعارىدا اتالعان №287 قاۋلى شىعارىلعان. بۇل جەردە ەرىكسىز تۋىندايتىن سۇراق، ەگەر، 80 جىلدىق تاريحى بار تەاتر ءوزىنىڭ بيۋدجەتتىك بالانسىمەن، شتاتتىق كەستەسىمەن جانە ءوز رەپەرتۋارىمەن سول جاڭا تەاترعا باراتىن بولسا، وندا جاڭا تەاتر قۇرۋدىڭ قانداي قاجەتتىلىگى تۋىنداپ تۇر؟ سەبەبى 2 تەاتر اراسىنداعى بار ايىرماشىلىق جامبىل اتاۋىنىڭ جوعالىپ كەتۋىندە عانا. سوندا جاسى 100-گە جەتكەنشە تۋعان حالقىنا جالىندى جىرلارىمەن رۋح بەرگەن ابىز اقىننىڭ ەسىمى كىمنىڭ تاقياسىنا تار كەلدى؟ الدە مۇنىڭ استارىندا جاسىرىن، ساياسي يدەولوگيالىق «ويىن» جاتىر ما؟»

ءبىز تاۋەلسىز قازاقستاننىڭ ۇلتجاندى ۇل-قىزدارى مۇنداي وزىمبىلەمدىك پەن باسسىزدىققا ەشقاشان جول بەرمەيتىندىگىمىزدى مالىمدەيمىز. وسىعان بايلانىستى جوعارىدا اتالعان زاڭسىز كونكۋرس ناتيجەسى  مەن قاۋلىلاردىڭ كۇشىن جويىپ، 80 جىلدىق تاريحى بار جامبىل اتىنداعى شىعىس قازاقستان وبلىستىق تەاترىنىڭ قۇرىلىمىن وزگەرىسسىز جاڭا عيماراتقا كوشىرۋگە مۇرىندىق بولۋىڭىزدى سۇراي وتىرىپ، جىبەرىلگەن ولقىلىقتاردىڭ زاڭسىزدىعىن اشكەرەلەۋ ءۇشىن ءتيىستى قۇقىقتىق ورگاندارعا تاپسىرما بەرۋىڭىزدى جانە ونىڭ ناتيجەسىن بۇقارارالىق اقپارات قۇرالدارىندا جاريالانۋىن قاداعالاۋىڭىزدى وتىنەمىز.

   P.S. ەگەر ءبىزدىڭ جانايقايىمىز ەسكەرىلمەگەن جاعدايدا مەملەكەت باسشىسى – قازاقستان رەسپۋبليكاسىنىڭ پرەزيدەنتى ن.ءا. نازارباەۆقا اشىق حاتپەن جۇگىنۋ قۇقىعىمىزدى پايدالاناتىندىعىمىزدى دا ەسكەرتەمىز.

شىعىس قازاقستان وبلىسىنىڭ اكىمى د.ك. احمەتوۆتىڭ اتىنا جولدانعان، جاڭادان زاڭسىز جانە نەگىزسىز اشىلعان شىعىس قازاقستان وبلىستىق دراما تەاترىن جويىپ، جامبىل اتىنداعى شىعىس قازاقستان وبلىستىق دراما تەاترىنىڭ قۇرىلىمىن وزگەرىسسىز جاڭا عيماراتقا كوشىرۋ تۋرالى اشىق حاتىن قولداۋشىلار ءتىزىمى:

اباي.kz