استانا. قازاقپارات -  ەلباسى نۇرسۇلتان نازارباەۆ قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىنعا قاتىستى، دەپ حابارلادى اقوردانىڭ ءباسپاسوز قىزمەتى.

مەملەكەت باسشىسى جينالعانداردى مەرەكەمەن قۇتتىقتاپ، قازاقستان بۇگىندە ءوز تاريحىنىڭ تاعى ءبىر بەلەسىنە سەنىمدى تۇردە وتكەنىن ايتتى.

- ۋاقىت اعىسى ءبىزدى قازاقستان رەسپۋبليكاسى تۇڭعىش رەت ءوزىن تاۋەلسىز مەملەكەت رەتىندە جاريالاعان 1991 جىلعى 16 جەلتوقسانداعى ۇلى كۇننەن تەز الىستاتىپ بارادى. حالىق جاساعان تاڭداۋدىڭ سارقىلماس تاريحي كۇشىن ءبىز جىل وتكەن سايىن تەرەڭ سەزىنىپ كەلەمىز. ول - ەركىن، ەگەمەن ەلدە تاتۋلىقتا، ءبىر-بىرىنە دەگەن سەنىم جانە كەلىسىمدە ءومىر ءسۇرۋ تاڭداۋى، ءوز تاعدىرىن قاشاندا ءوزى ايقىنداپ، بولاشاعىن جاساۋ، - دەدى قازاقستان پرەزيدەنتى.

نۇرسۇلتان نازارباەۆ «نۇرلى جول» جاڭا ەكونوميكالىق ساياساتى جاھاندىق سىن-قاتەرلەرگە لايىقتى جاۋاپ بولعانىن اتاپ ءوتتى.

- بىرىنشىدەن، الەمدىك الماعايىپ جاعدايدا ينفراقۇرىلىمدىق دامۋعا دەن قويۋ - قازىرگى الەمدەگى تابىستى ەلدەرگە ءتان ورتاق ترەند. ەكىنشىدەن، ساپالى جولدار مەن كوممۋنيكاتسيالار سالۋ ارقىلى ءبىز وڭىرلىك جانە جاھاندىق ەكونوميكالىق بايلانىستارعا تەرەڭىرەك بويلايمىز. ۇشىنشىدەن، ينفراقۇرىلىم قۇرىلىسىنىڭ ءىرى جوبالارى شەتەلدىك ينۆەستيتسيالاردىڭ تۇراقتىلىعىن ساقتايدى. ولار ۇزاقمەرزىمدى ەكونوميكالىق ءوسىمدى قامتاماسىز ەتەدى. تورتىنشىدەن، بۇل - لايىقتى ەڭبەكپەن قامتۋدىڭ، ەڭبەك ونىمدىلىگى مەن حالىقتىڭ ءال-اۋقاتىن ارتتىرۋدىڭ بەرىك كەپىلى. بەسىنشىدەن،  «نۇرلى جول» - بارلىق وڭىرلەر ءۇشىن جاڭا مۇمكىندىكتەر، - دەدى مەملەكەت باسشىسى.

  سونىمەن بىرگە، قازاقستان پرەزيدەنتى جاھاندىق ەكونوميكا ءۇشىن كۇشەيىپ كەلە جاتقان قاتەرلەردىڭ بار ەكەنىنە توقتالدى.

- بۇگىندە بارلىق ەلدەرگە قيىن. الەمدىك نارىقتا كومىرسۋتەك، مەتالل جانە باسقا ەكسپورتتىق ونىمدەردىڭ باعاسى قۇلدىراۋدا. بىزگە دە قيىن بولادى. وسىنى قاپەرگە العان ءجون. سوندىقتان بەكىتىلىپ قويعان بيۋدجەتتىڭ شىعىس بولىگىن بىزگە دە قىسقارتۋعا تۋرا كەلەدى. بىراق ول الەۋمەتتىك شىعىستارعا اسەر ەتپەيدى، - دەدى نۇرسۇلتان نازارباەۆ.

مەملەكەت باسشىسى ءوزىنىڭ تاپسىرماسىنا سايكەس ۇكىمەتكە حالىق الدىنداعى بارلىق مىندەتتەمەلەردى قامتاماسىز ەتۋى تيىستىگىن ەسكە سالدى. سونىمەن قاتار قازاقستان پرەزيدەنتى  ۇكىمەت پەن ۇلتتىق بانكتىڭ الدىنا ماڭىزدى ماڭىزدى ەكى مىندەت قويدى، ول: ەكونوميكانى دوللارسىزداندىرۋ جانە ينفلياتسيالىق تارگەتتەۋگە كوشۋ. بۇلار «نۇرلى جول» جاڭا ەكونوميكالىق ساياساتىنىڭ قۇرامداۋىشىنا اينالۋى ءتيىس. 

ەلباسى قازاقستاندىقتاردىڭ قازىرگى بۋىنىنىڭ ەڭبەگى ەل تاريحىندا ايرىقشا ورىن الاتىنىن ايتتى.

- بۇل - 1995 جىلى ناۋرىزدا قازاقستان حالقى اسسامبلەياسىنىڭ قۇرىلۋى، 1995 جىلى 30 تامىزدا ەل كونستيتۋتسياسىن بۇكىلحالىقتىق قابىلداۋ، 1998 جىلى استانانى ەلورداسى دەپ جاريالاۋ. بىزدەر، قازاقستاندىقتاردىڭ قازىرگى بۋىنى، ءبىرتۇتاس حالىق رەتىندە بولاشاقتىڭ باستى باعدارىن ايقىندادىق. ءبىز الدىمەن 2030 ستراتەگياسىن، سوسىن «قازاقستان-2050» ستراتەگياسىن ازىرلەۋ ارقىلى تاريحتا العاش رەت وقيعالاردىڭ سوڭىنان ىلەسپەي، العا وزاتىن بولدىق، - دەدى نۇرسۇلتان نازارباەۆ.

مەملەكەت باسشىسى بىرنەشە ماڭىزدى داتالار اتاپ وتىلەتىن الداعى جىلدىڭ ەرەكشەلىگىنە توقتالدى. اتاپ ايتقاندا، قازاقستان حالقى اسسامبلەياسى جىلىنىڭ اياسىنداعى ءىس-شارالار جانە قازاقستان رەسپۋبليكاسى كونستيتۋتسياسىنىڭ بۇكىل حالىق تاراپىنان قابىلدانۋىنىڭ 20 جىلدىعى وتەدى. سونىمەن قاتار ۇلتتىق تاريحىمىز بەن مادەنيەتىمىزدىڭ ماڭىزدى داتاسىن - قازاق حاندىعى قۇرىلۋىنىڭ 550 جىلدىعىن اتاپ وتەتىن بولامىز.

سونداي-اق قازاقستان تمد ەلدەرىمەن جانە بۇكىل الەممەن بىرگە ۇلى وتان سوعىسىنداعى ءفاشيزمدى جەڭگەن جەڭىستىڭ 70 جىلدىعىن مەرەكەلەيدى.

- ءبىز ءۇشىن سوعىسقا قاتىسقان بۋىننىڭ ەرلىگى تۋرالى ەستەلىك ارقاشان قاسيەتتى. ءبىز - ءاردايىم ءوز وتكەنىنە العىس سەزىمىمەن جانە كەشىرىممەن قارايتىن حالىقپىز. تاريحي وتكەن شاقتى ءبىز قاشاندا تۇتاس كۇيىندە جانە وڭ كوزقاراسپەن قابىلداۋىمىز كەرەك. ول بارلىق قازاقستاندىقتاردى بولۋگە ەمەس، بىرىكتىرۋگە ءتيىس، - دەدى مەملەكەت باسشىسى.

 نۇرسۇلتان نازارباەۆ تاۋەلسىز قازاقستاننىڭ بۇكىل تاريحى تۇتاسۋ مەن بىرىگۋگە نەگىزدەلگەنىن ايرىقشا اتاپ ءوتتى.

- بىرلىكتى ساقتاۋ جانە نىعايتۋ - ەڭ يگى ءىس. ححI عاسىردا تەك بىرلىگى بەكەم، ەڭبەگىنەن راحات تاپقان، ازاماتتارى تاتۋ ەل عانا باقىتتى ءومىر سۇرەدى. بىزدەر، قازاقستاندىقتار ونى جۇرەگىمىزبەن سەزىندىك. تاۋەلسىزدىك جىلدارى ءبىز رۋحاني تۇرعىدان شىنىعىپ، شىڭدالدىق، - دەدى قازاقستان پرەزيدەنتى.

مەملەكەت باسشىسى ماڭگىلىك ەل يدەياسى مىزعىماس تۇراقتىلىقتىڭ سيمۆولى بولا وتىرىپ، ەرتەڭگى كۇنگە جول سىلتەيتىن، بولاشاققا سەنىمدى بىلدىرەتىن يدەيا ەكەنىنە نازار اۋداردى.

قازاقستان پرەزيدەنتى قازىرگى زامانداعى حالىقتىڭ تاعدىرىن ايقىندايتىن ەكى باستى قاعيداتتى اتادى.

- بۇل - ۇرپاق جانە قۇندىلىقتار ساباقتاستىعى، سونداي-اق ۇلتتىڭ شيراقتىعى، جاستاردىڭ يننوۆاتسياعا بەيىمدىگى. ءبىز ءوز تاريحىمىزدى باتىل ءارى لايىقتى تۇردە يگەرۋگە ءتيىسپىز. ءاردايىم بىرلىگىمىز بولسا، ءبىز بۇدان دا قۋاتتى بولا تۇسەمىز. ءبىزدىڭ جالپىۇلتتىق ماڭگىلىك ەل يدەيامىزدىڭ، ماڭگىلىك وتانىمىزدىڭ ءمان-ماڭىزى وسىندا، - دەدى مەملەكەت باسشىسى.