جەكسەنبى, 20 ماۋسىم 2021
قىرداعى اڭگىمە 4413 0 پىكىر 8 جەلتوقسان, 2014 ساعات 00:15

ەكى تاراپتىڭ ويى ەسەپ ايىرىسۋ ما؟

رەداكتسيادان:

وسىدان از كۇن بۇرىن رەداكتسيانىڭ ەلەكتروندى پوشتاسىنا كەلگەن ساتپاەۆ قالاسىنىڭ تۇرعىنى ءحانبيبى ابۋوۆا ەسىمدى ازاماتشانىڭ حاتىن جاريالاعان بولاتىنبىز. («سەكتانتتاردىڭ قاسىندا سەيسەنباي نەگە ءجۇر؟» http://abai.kz/post/view?id=2308) ول جاريالانىمدا زيارات ەتۋشىنىڭ كورگەن-بىلگەنى مەن جەكە پىكىرى ستيلدىك جانە قارىپتىك ەرەكشەلىگى ساقتالىپ بەرىلگەن بولاتىن. رەداكتسيا ءوز تاراپىنان «پىكىر ەركىندىگى بار جەردە اقيقات تۋادى دەگەن ۇستانىمعا ساي، وقىرماننان ەلەكتروندى پوشتا ارقىلى كەلگەن حاتتى وزگەرىسسىز، قاز قالپىندا جاريالاپ وتىرمىز» دەپ ەسكەرتكەن بولاتىن. دەي تۇرعانمەن، وقىرمان پىكىرى جاريا بولعاسىن «ازىرەت سۇلتان» مەملەكەتتىك تاريحي-مادەني قورىق-مۇراجايىنىڭ ديرەكتورى ماۋلەن سادىقبەكوۆ مىرزادان بازىنالى حات كەلدى. ءبىز ەكى تاراپقا تەڭ قاراپ، ديرەكتوردىڭ حاتىنا ورىن بەرىپ وتىرمىز.

جالپى، بۇل «ازىرەت سۇلتان» مەملەكەتتىك تاريحي-مادەني قورىق-مۇراجايىنا قاتىستى كوتەرىلىپ وتىرعان ءسوزدىڭ باسى ەمەس، اياعى دا وسى جەردەن توقتايتىن كورىنبەيدى. ءبىزدى الاڭداتاتىنى، ەكى تاراپتىڭ دا اشىق پىكىر الاڭىن  ەسەپ ايىرىسۋ ماقساتىنا قاراي بۇرۋدى كوزدەيتىندىكتەرى. مۇمكىن، شىنىمەن ەكى تاراپقا ءبولىنۋدىڭ ەندىگى اق-قاراسىن ءتيىستى ورىندار اجىراتۋى ءتيىس شىعار؟ ال، اقپاراتتى جاريالاۋ ايىپ ەمەس...

اباي.kz 

  

«وتىرىكتىڭ قۇيرىعى ءبىر-اق تۇتام»

قۇرمەتتى اباي.كز  اقپاراتتىق پورتالىنىڭ باسشىلىعى!

قورىق-مۇراجاي ۇجىمى سىزدەردەن مەكەمەگە قاتىستى ماسەلەنى ەرەكشە ىجداھاتتىلىقپەن قاراپ، ابدەن تەكسەرىپ بارىپ قانا ەلدىڭ نازارىنا ۇسىنۋدى ءوتىنىپ سۇراپ ەدى. الايدا، ۇجىمنىڭ تىلەگى ەسكەرۋسىز قالدى. ارينە، مۇندا دا ءبىر سەبەپتىڭ بارى انىق. 

            «اباي.kz» پورتالىندا جاريالانعان «سەكتانتتاردىڭ قاسىندا سەيسەنباي نەگە ءجۇر؟» دەگەن ماتەريال ارقىلى قوعامعا تاعى ءبىر وتىرىك ۇسىنىلدى.   «ازىرەت سۇلتان» مەملەكەتتىك تاريحي-مادەني قورىق- مۇراجايى رەسپۋبليكالىق مەملەكەتتىك مەكەمە بولىپ تابىلادى. مەكەمە قازاقستان رەسپۋبليكاسىنىڭ زاڭ تالاپتارىنا سايكەس قىزمەت اتقارادى. مەكەمەدە ەشقانداي دا  سەكتا جوق. ۇكاشا اتانىڭ باسىندا مۇراجاي قىزمەتكەرلەرى جينالىپ زىكىر سالادى دەگەن جالا جابۋ، بوس ءسوز.  

 ال مىنا ءحانبيبى ابۋوۆا دەگەن ايەلدىڭ ايتقاندارى شىندىقپەن مۇلدە جاناسپايتىندىعى ءوز جازباسىنان-اق كورىنىپ تۇر. بىرىنشىدەن، «مادەنيەت مينيسترلىگىنە وسى وقيعاعا بايلانىستى سان مارتە حات جازدىم، بىراق جاۋاپ الا المادىم» دەيدى. بۇل شىلعي وتىرىك. ەگەر حات جازىلعاندىعى راس بولسا، قر زاڭ تالاپتارى بويىنشا مينيسترلىك مىندەتتى تۇردە جاۋاپ بەرگەن بولار ەدى. بۇعان قوسا حاتتا كورسەتىلگەن ماسەلەلەر بويىنشا مەنەن دە تۇسىنىكتەمە الىنادى. مادەنيەت مينيسترلىگى  ح.ابۋوۆانىڭ ارىزى بويىنشا مەنەن تۇسىنىكتەمە سۇراعان ەمەس، ياعني ابۋوۆا مينيسترلىككە ارىز جازباعان. ال ارىز جازباسا مينيسترلىك وعان قالاي جاۋاپ بەرەدى؟ ءحانبيبى ابۋوۆا دەگەن ايەل ومىردە بار ادام بولعان كۇننىڭ وزىندە ونىڭ ارىز جازۋ نيەتى بولماعاندىعىنا وسى دا جەتكىلىكتى دالەل بولا الادى. ەكىنشىدەن، ارىز جازۋ نيەتى جوق ايەل بىرنەشە مۇراجاي قىزمەتكەرلەرىنىڭ اتتارىن، قىزمەتتەرىن  دالمە-ءدال قالاي جاتتاپ العان جانە ونى سەگىز اي بويى ۇمىتپاي، شاتاستىرماي قالاي ەسىندە ساقتاپ كەلگەن؟ ۇشىنشىدەن مۇراجاي قىزمەتكەرى مۇسا امانقۇلوۆتىڭ قۇجاتتاعى ەسىمى مۇساماحامبەت ەكەندىگىن ەڭ جاقىن ەت جاقىندارى عانا ايتا الاتىن شىعار. شىن مانىسىندە مۇسانىڭ تولىق اتىن مۇراجاي قىزمەتكەرلەرى دە بىلە بەرمەيدى. سوندا ساتپاەۆ قالاسىنان كەلگەن ايەل مۇنى قايدان ءبىلىپ وتىر؟

 قۇرمەتتى اباي.كز اقپاراتتىق پورتالىنىڭ رەداكتسياسى! ەل قۇلاعىن كوتەرگەن سوڭ،  ماسەلەنى سوڭىنا دەيىن جەتكىزگەن دۇرىس شىعار. وتكەندەگى جامبىل وبلىسى بايزاق اۋدانىنىڭ تۇرعىندارى  اقىلجانوۆا دىلداكۇل، مايماقوۆا گۇلبارام، سەيىتوۆا ايىمدى جانە  مىنا سوڭعى ساتپاەۆ قالاسىنىڭ تۇرعىنى  ءحانبيبى ءابۋوۆانى تاۋىپ جۇزبە-ءجۇز كەزدەسىپ، ءمان-جايعا جەتىڭىزدەر. سودان سوڭ اتالعان كىسىلەر ناقتى بار بولسا،  «ازىرەت سۇلتان» مەملەكەتتىك تاريحي-مادەني قورىق-مۇراجايىنىڭ ديرەكتورى مەنى شاقىرىڭىزدار دا  ءبارىمىز سىزدەردىڭ رەداكتسيادا باس قوسايىق. اقپاراتتىق پورتال ادىلەتتىڭ شىن جاناشىرى بولسا  ايتارىم وسى. 

سادىقبەكوۆ ماۋلەن،

«ازىرەت سۇلتان» مەملەكەتتىك تاريحي-مادەني قورىق-مۇراجايىنىڭ ديرەكتورى.

 

0 پىكىر