سەنبى, 27 اقپان 2021
قوڭىراۋ 5134 0 پىكىر 3 جەلتوقسان, 2014 ساعات 12:24

رەسەيدەن ءۇي ساتىپ الىڭىز. ارزان

سولتۇستىكقازاقستاندىقتار قالتالارىنداعى تەڭگەلەرىن رۋبلگە ايىرباستاپ رەسەيگە تۇپقوپارىلا بارىپ جاتىر. ولاردىڭ قايسىبىرى كيىم-كەشەك پەن وزگە دە ۇساق-تۇيەككە قارىق بولىپ جۇرسە، قايسىبىرى اۆتوكولىك پەن پاتەر ساتىپ الۋدا. قۇرىلىس ماتەريالدارى مەن ءۇي-جيحازدارىن، ءتىپتى، ازىق-تۇلىك ساتىپ الىپ جۇرگەندەر دە بار دەپ حابارلايدى كتك ارناسى. سونداي ساتىپ العىشتىڭ ءبىرى يۋري اۋباكيروۆ دەيتىن جىگىت: «پەتروپاۆلسكدەگى ءۇيڭىدى قانداي باعاعا ساتساڭ، سونداي باعاعا ومسكدەن ءۇي ساتىپ الاسىڭ»، - دەپ ءماز. ورىس اقشاسىنىڭ قۇلاۋىنا بايلانىستى قازىر دۇنيەنىڭ ەسەبىن تۇگەندەپ وتىراتىن پىسىقتار وسىلايشا تىرلىك جاساپ، جيعان- تەرگەن قارجى-قاراجاتىن جىلجىمايتىن مۇلىككە، كاپيتالعا اينالدىرۋدا.

ەستەرىڭىزگە سالا كەتەيىك، رف ۆاليۋتاسى جىل باسىنان بەرى 30 پايىزعا قۇلادى. ەسەسىنە، رۋبلگە دەگەن سۇرانىس قازاقستاندا بەس ايدان بەرى جوعارى. ۆاليۋتا ايىرباستايتىن پۋنكتتەردە ورىس اقشاسى تۇگەسىلىپ قالۋدا. «بۇل جايت ەلىمىزدىڭ وڭتۇستىگىنەن گورى سولتۇستىك وبلىستارىندا بىردەن بايقالۋدا»، - دەيدى جاعدايدى باعىمداپ جۇرگەن ساراپشىلار.

رەسەيدە باسپانامەن قاتار اۆتوكولىكتەر دە ارزانداي تۇسۋدە. قازىر اۆتوبازارلاردا جۇرگەن ساۋداگەرلەر رەسەيگە اعىلۋدا. «ارزان، ءتىپتى ارزان. اميانىمداعى قاراجاتىمنىڭ ءبىرازىن ۇنەمدەپ قالدىم»، - دەيدى كتك ارناسىنا سۇحبات بەرگەن گۇلنارا ماديەۆا.

  ورىس اقشاسى قۇنسىزدانا تۇسۋدە. كەشە (02.12.2014) ،1 دوللار 54 رۋبلگە، ەۋرو  67 رۋبلگە جەتتى.

رەسەيدە پاتەرلەردىڭ ارزانداۋىنا بايلانىستى ەلىمىزدىڭ سولتۇستىك وبلىستارىندا تۇرىپ جاتقان ەتنيكالىق ورىستاردىڭ كوشۋى دە جيلەي باستاعانى تۋرالى اقپارات الىپ وتىرمىز.   

Abai.kz    

 

 

0 پىكىر