بايقوڭىر عارىش ايلاعىنا قاتىستى بەرىش بولىپ قاتقان توڭ ءجىبي باستاعان سىڭايلى. وسىعان دەيىن ءوزىم بىلەمدىككە سالىپ كەلگەن رەسەي تاراپى قازاقستاننىڭ تالابىنا مويىنسۇنعانداي كەيىپ تانىتىپ وتىر.

كورشى ەل جالعا العان ايلاقتا وسىعان دەيىن ورىس زاڭى ۇستەمدىك ەتىپ تۇرعان بولاتىن. قالاداعى تۇرعىنداردىڭ 65 پايىزى قازاقستاندىق ازاماتتار ەكەندىگىنە قاراماستان، ءبىلىم بەرۋ مەن الەۋمەتتىك نىساندارى رەسەيلىك ستاندارتتار بويىنشا جۇمىس جاساۋدا. ءتىپتى، بايقوڭىر مەكتەپتەرىندەگى وقۋشىلار «مەنىڭ پرەزيدەنتىم - پۋتين» دەپ وقىپ وتىرعانىن قىزىلوردا وبلىسىنىڭ اكىمى قىرىمبەك كوشەرباەۆتىڭ ءوزى قىنجىلا ايتقان بولاتىن. ونىڭ سىرتىندا عارىش ايلاعىنداعى ەكولوگيالىق قاۋىپ-قاتەردى باعالاۋ رەسەيدىڭ ەكولوگيالىق كودەكسىنە ساي جۇزەگە اسىپ وتىر. قازاق دالاسىنا ءجيى ء–جيى قۇلاپ تۇسەتىن «پروتون-م» زىمىران-تاسىمالداعىشىنىڭ ۇشۋىن ازايتۋ ماسەلەسىنە دە كورشىلەر جۇرە قارايتىن-دى...

ەندى وسى ماسەلەلەردىڭ بىرقاتارىنا جاۋاپ تابىلاتىن سياقتى. قازاقستان-رەسەي ۇكىمەتارالىق كوميسسياسىنىڭ وتىرىسىندا بايقوڭىر تۇرعىندارى ءۇشىن قۋانىشتى جاڭالىق ايتىلىپ قالدى.

بۇيىرسا، كەلەر جىلدان باستاپ قالاداعى 6 مەكتەپ قازاقستاندىق ءبىلىم بەرۋ ستاندارتتارىنا كوشەدى.

سونداي-اق، رەسەي تاراپى عارىش ايلاعى اۋماعىندا قازاقستاندىق ەكولوگيالىق كودەكسىن قولداناتىن بولدى.

تاعى ءبىر قۋانىشتى حابار، الداعى ۋاقىتتا «پروتون-م» زىمىران-تاسىمالداعىشىنىڭ ۇشۋىن ازايتۋ جايى دا وڭ شەشىم تاۋىپ قالۋى مۇمكىن.

Abai.kz