قىستىڭ العاشقى كۇنى، ياعني، 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى. كۇنتىزبەگە قىزىل بەلگىمەن ەنەتىن بۇل كۇننىڭ ەلىمىز ءۇشىن ورنى ەرەكشە. بۇگىندە الەم مويىنداعان تاۋەلسىز ەلىمىزدىڭ ۋىعىن قاداپ، شاڭىراعىن كوتەرىپ، ىرگەسىن بەكىتكەن تۇڭعىش پرەزيدەنتىمىز نۇرسۇلتان نازارباەۆتىڭ حالىق الدىندا، مەملەكەت الدىندا ەڭبەگى وراسان زور.

كسرو كۇيرەگەن شاقتا جەرىمىزدىڭ تۇتاستىعىن ساقتاپ، ەل ىرگەسىن سوكپەي، تاتۋلىق پەن بىرلىكتى، دوس­تىق پەن سىيلاستىقتى تۋ ەتىپ، تاۋەلسىزدىگى تۇ­عىر­­لى، جاسام­پاز قازاقستان مەملەكەتىن قۇردى. كۇرمەۋى قيىن شاق­تاردا وزىنە سەنىم ارتقان جۇرتىن بەرەكەلى بىرلىك پەن وركەنيەتكە باستاپ، قازاق­ستاندى دامىعان الەۋەتتى مەم­لەكەتتەردىڭ الدىڭعى قاتارىنا قوسا بىلگەن پرەزي­دەنتتىڭ حالىق ءۇشىن ەتكەن قىزمەتى ەرەن. قازىرگى كەز­دە ەسىمى ەلىمەن قاتار اتالىپ، الىس-جاقىن مەملە­كەتتەردە مارتەبەسى تاسىعان تۇڭعىش پرەزيدەن­تىمىزدىڭ كۇنىن اتاپ ءوتۋ ءار­بىر قازاقستاندىق ءۇشىن مەرەيلى مەرەكە ەكەنى انىق.

ءىلياس جانسۇگىروۆ اتىنداعى مادەنيەت سا­رايىن­دا تۇڭعىش پرەزيدەنت كۇنىنە ارنالعان سالتاناتتى شارا ءوتتى. وندا وبلىس اكىمى اماندىق باتالوۆ ءسوز سويلەپ، زالعا جينالعان قاۋىمدى مەرەيلى مەرەكەمەن قۇتتىقتادى. ءوز قۇتتىقتاۋىندا ءوڭىر باسشىسى قازاقستان رەسپۋبليكاسىنىڭ تۇڭ­عىش پرەزيدەنتى نۇرسۇلتان ءابىشۇلى نازار­باەۆ­تىڭ قازاقستان رەسپۋبليكاسىن قۇرىپ، ونى دامى­تۋداعى، بۇكىل الەمگە تانىتۋداعى ءرولىن ەرەكشە تولعانىسپەن باياندادى.

– مەملەكەت دامۋىنىڭ باسىم باعىتتارىن ايقىنداعان بولاشاقتىڭ باعدارلاماسى رەتىندە ەلباسىنىڭ «قازاقستان – 2050» ستراتەگياسى جارىق كورىپ، وندا پرەزيدەنت الدىمىزعا دامىعان وتىز ەلدىڭ قاتارىنا ەنۋ مىندەتىن قويدى. وسى ماق­ساتقا جەتۋدىڭ جولى رەتىندە الداعى جوس­پارىمىزدى جۋىردا عانا جاريالاعان «نۇرلى جول – بولاشاققا باستار جول» اتتى كەزەكتى جولداۋىندا اتاپ ايتتى. جولداۋدا دۇنيە­جۇزىلىك داعدارىستىڭ سالدارى كورسەتىلىپ، جاڭا ەكو­نو­ميكالىق ساياساتتىڭ باسىم­دىق­تارى انىقتالدى.

«نۇرلى جول» – حالىقتىڭ الەۋمەتتىك جاعدايىن جاقسارتۋعا باعىتتالعان ناقتى باعدارلاما. ەلباسى جولداۋىندا «ماڭگىلىك ەل» يدەياسىن تاعى دا شەگەلەپ ايتتى. قازاقستان – ماڭگىلىك ەلدىڭ وتانى. جاستار اراسىندا وسى ۇلى يدەيانى قالىپتاستىرىپ، ماڭگىلىك ەل ۇعىمىن قوعامنىڭ قوزعاۋشى كۇشىنە اينالدىرۋعا ءتيىسپىز، – دەگەن وبلىس اكىمى پرەزيدەنتتىڭ سارابدال ساياساتى ارقاسىندا ەلىمىز ەش قيىندىقتان سۇرىنبەي شىققاندى­عىن، سونداي-اق، الەمدىك ارەناداعى بەدەلىنىڭ زور ەكەنىن دە اتاپ ءوتتى.

«ەڭ العاش تاۋەلسىز مەملەكەتتەر دوستاس­تىعىن قۇرۋعا باستاماشى بولعان دا – ەلباسى. بۇدان باسقا كەدەن وداعى مەن شانحاي ىنتىماق­تاستىق ۇيىمىنىڭ، باسقا دا حالىقارالىق ۇيىمداردىڭ دۇنيەگە كەلۋىنە دە قازاق ەلىنىڭ كوشباسشىسى سەبەپشى بولدى.

2010 جىلى قازاقستان رەسپۋبليكاسى پرەزي­دەن­تىنىڭ باستاماسىمەن ەۋروپاداعى قاۋىپسىزدىك جانە ىنتىماق­تاستىق ۇيىمىنا توراعالىق ەتتى. سونىمەن بىرگە، ءبىز يسلام ىنتىماقتاستىق ۇيىمىنا ۇلكەن ابىرويمەن باسشىلىق جاسادىق. مۇنىڭ بارلىعى ەلباسىنىڭ حالىقارالىق ارەنا­داعى بيىك بەدەلىن كورسەتەدى. ءبىز ەلباسى نۇرسۇلتان ءابىشۇلى نازارباەۆتىڭ جەرلەستەرى ەكەنىمىزدى ماقتان تۇتامىز. جانە بۇل بىزگە ۇلكەن جاۋاپكەر­شىلىك جۇكتەيدى»، – دەگەن اماندىق باتالوۆ ماڭىزى زور مەملەكەتتىك مەرەكە – قازاقستان رەسپۋبليكاسى تۇڭعىش پرەزيدەنتىنىڭ كۇنىمەن قايتالاي قۇتتىقتاپ، ءاردايىم بولاشاعى­مىزدىڭ جارقىن بولا بەرۋىنە ىزگى نيەتىن ءبىلدىردى.

مەرەكەلىك جيىندا وبلىستىق ارداگەرلەر كەڭەسىنىڭ توراعاسى ارداق سىدىق، كوكسۋ اۋدا­نىنداعى ب. قۇنداقباەۆ اتىنداعى مەكتەپتىڭ مۇعالىمى ل. حامزينا، ءى. جانسۇگىروۆ اتىنداعى مەملەكەتتىك ۋنيۆەرسيتەتىنىڭ تۇلەگى د. ديگاي قۇتتىقتاۋ ءسوز سويلەپ، ەلباسىنىڭ ەرەن ەڭبەگى جايىندا تۇششىمدى ويلارىمەن ءبولىستى.

سالتاناتتى جيىن ءسۇيىنباي اتىنداعى وبلىس-تىق فيلارمونيانىڭ كونتسەرتىمەن جارا­سىمدى جال­عا­سىن تاپتى.

 س. قاسىمبەكقىزى.

الماتى وبلىسى.

اباي.kz