مەملەكەت جانە قوعام قايراتكەرى، ساياساتكەر التىنبەك سارسەنبايۇلى مەن ونىڭ سەرىكتەرىنىڭ ولىمىنە كىنالى دەپ تانىلىپ، 20 جىلعا سوتتالعان ەرجان وتەمباەۆ قازان ايىندا ءوزىن تۇرمەدەن مەرزىمىنەن بۇرىن بوساتۋدى سۇراپ، ءوتىنىش جازعان. بۇگىن استانادا وتەمباەۆتىڭ ءوتىنىشىن قاراعان استانانىڭ قىلمىستىق ىستەر جونىندەگى اۋدانارالىق مامانداندىرىلعان سوتى سۋدياسى ەربول راحىمبەكوۆ: «سوت ەرجان ابىلقايىرۇلى وتەمباەۆ جازاسىن تولىق وتەۋگە مۇقتاج ەمەس دەپ بىلەدى. سوت قىلمىستىق-پروتسەسسۋالدىق كودەكستىڭ 453, 455-باپتارىن باسشىلىققا الا وتىرىپ ونىڭ شارتتى تۇردە مەرزىمىنەن بۇرىن بوساتۋ جايلى ءوتىنىشىن ورىنداۋعا قاۋلى ەتتى. وتەمباەۆ ءالى وتەلمەگەن 4 جىل 2 اي 29 كۇندىك جازاسىن ورىنداۋدان شارتتى تۇردە مەرزىمىنەن بۇرىن بوساتىلسىن» دەپ شەشىم شىعاردى. وسىلايشا، سوت شەشىمىمەن وتەمباەۆ مەرزىمىنەن بۇرىن بوستاندىققا شىعاتىن بولدى.

ەستەرىڭىزگە سالا كەتەيىك، ساياساتكەر التىنبەك سارسەنبايۇلى جانە  ونىڭ وققاعارى مەن جۇرگىزۋشىسى 2006 جىلى  13 اقپاندا الماتى ماڭىندا قاستاندىقپەن ءولتىرىلدى.  بۇل قىلمىسقا ەرجان وتەمباەۆ «تاپسىرىس بەرۋشى» رەتىندە ايتىپتالىپ، 20 جىلعا سوتتالعان. ال، رۋستام يبراگيموۆ تاپسىرىسپەن كىسى ءولتىرۋ ايىبى بويىنشا ومىرلىك قاماۋعا كەسىلگەن ەدى. 2013 جىلدىڭ سوڭىندا قازاقستان باس پروكۋراتۋراسى يبراگيموۆتىڭ جاڭا تۇسىنىكتەمەسىنە بايلانىستى سارسەنباەۆ ىسىنە ايىپتىلار قاتارىنا اليەۆتى دە قوسىپ، جاڭادان ءىس قوزعادى.

ءامىرجان قوسانوۆ،ساياساتكەر: «ەندى ءبىز وتەمباەۆتىڭ ءومىرى تۋرالى ويلانۋىمىز كەرەك بولار»

- التىنبەك سەكىلدى ءبىرتۋار تۇلعانىڭ ولىمىنە قاتىستى ويىن سەگىز جىل سەگىز ايدىڭ ىشىندە اشىق ايتپاعان وتەمباەۆتى تۇرمەدەن مەرزىمىنەن تىس بوساتۋ تۋرالى شەشىمنىڭ ءۇش جاعى بار.
بىرىنشىدەن، «التەكەڭنىڭ جانە ونىڭ سەرىكتەستەرىن ولتىرۋگە تاپسىرىستى كىم بەردى؟» دەگەن ەڭ باستى قۇقىقتىق ساۋالعا جاۋاپ بەرىلمەي، وسى پروتسەستىڭ ەڭ باستى سۋبەكتىسى بولعان ادامعا بوستاندىق بەرۋدى زاڭدى كوپە-كورىنەۋ بۇزۋشىلىق دەپ بىلەمىن!
ەكىنشىدەن، ۇلتتىق تراگەدياعا اينالعان بۇل قىلمىستىڭ ارتىندا ۇلكەن ساياسات تۇرعانى دا بەلگىلى. ال مۇنداي «گۋمانيستىك» قادام سول ساياسي استاردى ودان سايىن قويۋلاتا تۇسپەك. مۇنىڭ ءوزى «التىنبەكتىڭ قازاسىنا قاتىسى بار تۇلعالار ءالى دە بيلىكتىڭ ىشىندە نە باسىندا وتىر» دەگەن قيسىندى تۇجىرىمعا جەتەلەيدى.
ۇشىنشىدەن، ەندى مەن وتەمباەۆتىڭ ءوزىنىڭ ومىرىنە الاڭداۋشىلىق تانىتۋىمىز كەرەك پە دەپ ويلايمىن. ويتكەنى، ول، ءوزىن وسىنداي رولگە پايدالانۋعا كەلىسىم بەرىپ، نە بولسا دا وسى قىلمىسقا قاتىستى ءبىراز، بىزگە بەيمالىم ماسەلەنى ءبىلۋى ابدەن مۇمكىن. ال ونىڭ سويلەپ كەتۋىنە قارسى توپتار مەن ادامدار جوق دەپ كىم كەسىپ-ءپىشىپ ايتا الادى؟

دايىنداعان: QJ