ءدىني باسقارما حيجرا جاساۋ، تاكپىرشىلدىك جانە جيھاد تۋرالى ءپاتۋا شىعاردى

اسا قامقور ەرەكشە مەيىرىمدى اللانىڭ اتىمەن باستايمىن!

قازاقستان مۇسىلماندارى ءدىني باسقارماسىنىڭ نەگىزگى جۇمىس باعىتتارىنىڭ ءبىرى – ءدىني ماسەلەلەردە ءپاتۋا شىعارۋ. باس ءمۇفتي ەرجان قاجى مالعاجىۇلى لاۋازىمدى قىزمەتكە سايلانعان ساتتەن باستاپ قمدب عۇلامالار كەڭەسىنە قوعامدا كورىنىس تاپقان وزەكتى ءدىني ماسەلەلەرگە قاتىستى دەر كەزىندە ءپاتۋا بەرۋدى تاپسىردى. سولاردىڭ ءبىرى – الەم مۇسىلماندارىنىڭ الاڭداۋشىلىعىن تۋدىرعان جالعان سەنىمدى ساناعا سىڭدىرۋگە تىرىسقان «تاكپىرشىلەر» جاماعاتى. ولار ادامداردى سەنىم مەن كۇپىرلىك (تاۋحيد پەن شيرك), بىرقۇدايلىق پەن سەرىك قوسۋ (يمان مەن شيرك) ماسەلەسىندە اداستىرىپ، كاپىرگە شىعارۋدا. «تازا يسلام»، «تازا تاۋحيد» دەگەن سوزدەردى بەتپەردە ەتكەن جاماعات وكىلدەرى جاستارعا جارقىن بولاشاقتى ۋادە ەتىپ، بۇلىككە باستايدى. قازاقستان مۇسىلماندارى ءدىني باسقارماسى 2013 جىلى 7 قاراشادا «تاكپىرشىلەرگە» قاتىستى شىعارعان ءپاتۋاسىندا «تاكفير – دىنگە ەنگەن جاڭالىق» ەكەنى تۋرالى ۇكىم بەرىلدى. بۇل ءپاتۋا بۇقارالىق اقپارات قۇرالدارىندا جاريالاندى. سەنىمدە شەكتەن شىققان تاكپىرشىلەردىڭ ارەكەتى مۇسىلمانشىلىققا مۇلدەم جات. ءدىني باسقارما سيرياداعى سوعىسقا نە ءۇشىن بارعانىن بىلمەيتىن، ماقساتى ايقىن ەمەس جاستاردى مۇنداي فيتناعا (بۇلىنۋشىلىككە) قاتىسپاۋعا شاقىرادى. بۇگىندە سيريا حالقى بەيبىتشىلىكتى ورناتۋ شارالارىنا ءارى بۇكىل مۇسىلمان ۇممەتىنىڭ شىنايى جاناشىرلىعىنا مۇقتاج. ونداعى زورلىق-زومبىلىق ارەكەتتەر مەن داۋلى ماسەلەلەر بەيبىتشىلىك جولىمەن شەشىلۋى ءتيىس.

قوعامدا كورىنىس تاپقان تاعى ءبىر ماسەلە – جيھاد ۇعىمى. كەيبىر ادامدار جيھاد ۇعىمىن قولعا قارۋ الىپ، سوعىسقا اتتانۋ دەپ تۇسىنەدى. بىرىنشىدەن، شاريعاتىمىزدا يمامنىڭ (مەملەكەت باسشىسىنىڭ) رۇقساتىنسىز سوعىسقا شىعۋعا تىيىم سالىنعان. ەكىنشىدەن، وزگە ەلدىڭ ىشكى ماسەلەسىنە ارالاسۋىنا ەشكىمنىڭ قۇقىعى جوق. ءار مۇسىلمان مەملەكەتىنىڭ ءپاتۋا بەرەتىن رەسمي ءدىني باسقارماسى جانە ءمۇفتيى بولادى. قمدب-نىڭ جيھاد تۋرالى شىعارعان ءپاتۋاسىندا تەرىس پيعىلدى، راديكالدى اعىمداردىڭ ارباۋىندا جۇرگەن جاستاردىڭ ءدىني باسقارمانىڭ، اتا-انانىڭ رۇقساتىنسىز وزگە ەلگە جيھادقا اتتانۋى دۇرىس ەمەس ەكەندىگى جايلى ۇكىم ايتىلدى.

شاريعات بويىنشا حيجرات جاساۋدىڭ شارتى، ونىڭ ۇكىمى تۋرالى دا ءدىني باسقارمانىڭ ءپاتۋاسى شىقتى. يسلامداعى بەس پارىزعا (يمان، ناماز، ورازا، زەكەت، قاجىلىق جاساۋ) تىيىم سالىنسا، ازان ايتتىرماسا، مەشىتتەر تۇگەلىمەن جابىلسا جانە مۇسىلمانداردىڭ مەيرامدارىن اتاپ وتۋگە شەكتەۋ قويىلسا، وندا مۇسىلمانعا ءوزىنىڭ ءدىنىن ساقتاۋ ءۇشىن باسقا ەلگە كوشۋى مىندەت ەتىلەدى. ال بىزدە، قۇدايعا شۇكىر، ءزاۋلىم مەشىتتەر كۇننەن-كۇنگە كوبەيىپ، ءدىني مەيرامدار كەڭىنەن تويلانىپ كەلەدى. ماسەلەن، ءدىنىمىزدىڭ جاناشىرى ەلباسىنىڭ پەرمەنىمەن قۇربان ايت مەيرامى دەمالىس كۇنى بولىپ جاريالاندى. بۇل مۇسىلمانداردىڭ ۇلىق مەرەكەسىنە كورسەتىلگەن قۇرمەت دەپ بىلەمىز.

قمدب-نىڭ حيجرات جاساۋ تۋرالى 2013 جىلدىڭ 7 قاراشاسىندا بەرىلگەن ءپاتۋاسىندا يسلامنىڭ نەگىزگى رامىزدەرى مەن راسىمدەرىن اتقارۋعا رۇقسات ەتىلگەن مەملەكەتتەن وزگە ەلگە كوشۋگە ەشبىر قاجەتتىلىك جوق دەگەن شەشىم شىعارىلعان.  

ەرشات وڭعاروۆ،

قمدب ۋاعىز-ناسيحات ءبولىمىنىڭ مەڭگەرۋشىسى