حالىقارالىق تۇركى اكادەمياسىندا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، تاريح عىلىمدارىنىڭ دوكتورى، پروفەسسور ەرلان ءباتتاشۇلى سىدىقوۆتىڭ تۇرىك تىلىندە جارىق كورگەن «Şakarim» (شاكارىم) اتتى كىتابىنىڭ تۇساۋكەسەرى ءوتتى. وعان قازاقستان مەن تۇركيانىڭ عالىمدارى، زيالىلارى مەن مەملەكەت جانە قوعام قايراتكەرلەرى قاتىستى. 

تانىمدىق-عۇمىرباياندىق جانرداعى اتالمىش كىتاپ انكارا قالاسىنداعى  «Bengu» (ماڭگى) باسپاسىنان شىققان.  

ەۋرازيا جازۋشىلار وداعىنىڭ قولداۋىمەن جارىق كورگەن ەڭبەك شاكارىمدى تۇرىك وقىرماندارىمەن قاۋىشتىرىپ وتىرعان تۇڭعىش كىتاپ. كوپتەگەن عالىمدار تۇرىكتىڭ ايگىلى اقىنى يۋنۋس ەمرە مەن شاكارىم پوەزياسىندا بىرقاتار ساباقتاستىقتاردىڭ بار ەكەنىن ايتادى. ياعني، بۇل كىتاپ تۇرىك وقىرماندارى ءۇشىن دە ماڭىزى جوعارى رۋحاني دۇنيەلەردىڭ بىرىنە اينالارى ءسوزسىز.

كىتاپتا اۆتور شاكارىم قۇدايبەردىۇلىنىڭ عۇمىرى مەن قازاق رۋحانياتىنا سىڭىرگەن ولشەۋسىز ەڭبەگىن جاڭاشا سارالاپ، كوپتەگەن كومەسكى دەرەكتەردى ايقىنداي تۇسكەن.

تۇساۋكەسەر راسىمىندە  بىلتىر تۇركى الەمىنىڭ مادەني استاناسى بولعان ەسكىشەھيردىڭ اكىمى، ەسكىشەھير 2013 تۇركى دۇنيەسىنىڭ مادەني استاناسى اگەنتتىگىنىڭ  باسقارۋ كەڭەسىنىڭ توراعاسى گۇنگور ازيم تۋنا تۋىس ەكى ەل باسشىلارىنىڭ باۋىرلاستىققا نەگىزدەلگەن ساياساتى ىنتىماقتاستىقتى تىپتەن نىعايتا تۇسكەنىنە توقتالىپ، «رۋحاني سالادا مۇنداي ساليقالى دۇنيەنىڭ تۇرىكشەگە اۋدارىلۋى اۋىز تولتىرىپ ايتارلىق زور جەتىستىك» دەپ باعالادى. سونىمەن قاتار ول ەسكيشەحير قالاسىنىڭ مۇنداي يگى ىستەردى جالعاستىرا بەرەتىنىن اتاپ ءوتتى. 

ەڭبەك قازىردىڭ وزىندە تۇركيا رەسپۋبليكاسىنىڭ بىرقاتار قالامگەرلەرى تاراپىنان جوعارى باعالانىپ، ۇلكەن  قىزىعۋشىلىققا يە بولىپتى. ەۋرازيا جازۋشىلار وداعىنىڭ توراعاسى ياكۋپ ومەروعلى بارشا تۇرىك وقىرماندارىنا كىتاپتى وقىپ شىعۋعا كەڭەس بەرەتىنىن ايتتى. ول «شاكارىم» كىتابىنان قازاق زيالىلارى، الاش ارىستارى مەن ولاردىڭ ارپالىسقا تولى كەزەڭدەرى جايلى تولىمدى مالىمەتتەر الىپ، سونى دەرەكتەرگە قانىق بولعان. ء«تۇبى ءبىر ەلدەردىڭ مادەني بايلانىستارىن تەرەڭدەتۋدە ءوز ۇلەسىن قوسىپ وتىرعان حالىقارالىق تۇركى اكادەمياسى تۇركى الەمىنىڭ جارقىن كەلەشەگى ءۇشىن كوپتەگەن يگى ىستەر اتقارادى دەپ سەنەمىن»، — دەدى ياكۋپ ومەروعلى.

ءوز كەزەگىندە مەملەكەت جانە قوعام قايراتكەرى مىرزاتاي جولداسبەكوۆ، پروفەسسور عاريفوللا ەسىم سىندى بەلگىلى تۇلعالار ءوز ءداۋىرىنىڭ وزىق ويشىلى شاكارىمدى تانۋعا تۇرىك ءتىلىن بىلەتىن ءجۇز ميلليونداعان ادامعا جول اشىلعانىنا ەرەكشە توقتالدى.

اباي-اقپارات