جىل باسىنان بەرى اتىراۋ قالاسىنىڭ ىرگەسىندەگى دامبى اۋىلىنىڭ تۇرعىندارى تىڭداعان ادامنىڭ توبە قۇيقاسىن شىمىرلاتار توسىن وقيعالاردىڭ ەرىكسىز كۋاسى بولۋدا. العاشىندا اۋىلدىڭ ءتورت ەر ادامى ءوز-وزىنە قول جۇمساسا، كەيىننەن ەكى ايەل ادام قۇتىرمالى جۇيكە اۋرۋىنا ۇشىراعان. باسىندا  مۇنىڭ بارلىعىنا ەشكىم دە جەتە ءمان بەرمەگەن ەدى. الايدا، قازان ايىنىڭ  سوڭعى ون كۇنى  ىشىندە تاعى دا ەكى ادامنىڭ ءوز-وزىنە قول جۇمساعانىن،   اراعا ازعانتاي ۋاقىت سالىپ، تاعى دا ەكى ادامنىڭ   جىندانىپ اۋىرعانىن كورگەننەن كەيىن دامبىلىقتار  شىبىن جاندارىن قايدا ساقتارىن بىلمەي شىرقىراۋدا.  اۋىل تۇرعىندارى ەكىندى تۇسپەي جاتىپ ەسىك-تەرەزەلەرىن تاس قىلىپ بەكىتىپ الاتىن بولدى. ءتىپتى كۇندىزدىڭ وزىندە   كوشەگە شىعاتىنداردىڭ قاتارى سيرەپ، ويىن بالالارى ەرىكسىز ۇيگە تىعىلدى. كەيبىرەۋلەر «اۋىلدى شىن-شايتان يەلەندى» دەسە، ەندى بىرەۋلەرى «اقىرزاماننىڭ» جاقىنداپ قالعانىن ايتىپ، ۇرەي وتىن ودان سايىن ۇرلەي تۇسۋدە.

بولعان وقيعاعا قاتىستى  قازاقستان مۇسىلماندارى  ءدىني باسقارماسىنىڭ  اتىراۋ وبلىسى بويىنشا  وكىل يمامى باق وكىلدەرىنە بەرگەن تۇسىنىگىندە: «جىن دەگەن بىزگە  قۇران مەن حاديستەن  بەلگىلى ماقۇلىق. پەرىشتەلەر ادامدارعا  پايدا كەلتىرۋ ءۇشىن نۇردان جاراتىلسا، جىن-شايتان ادامدارعا قارسى ارەكەت جاسايدى. ءبىز بۇدان ءبىر-ەكى اپتا بۇرىن دامبى اۋىلىندا  ادامدار  وزدەرىنە قول جۇمساپ، جەلىگىپ اۋىرىپ قالعاندىعى تۋرالى ەستىگەن بولاتىنبىز. وسىعان وراي مەن مەشىتتىڭ باس يمامى رەتىندە  قالا مەشىتتەرىنىڭ يمامدارىن ەرىتىپ، سول جەردە بولدىم. حالىقتى جيناپ، تۇسىنىك جۇمىستارىن جۇرگىزدىك. جالپى ، جىن-پەرىلەر لاس جەرلەردە جۇرەدى.  سوندىقتاندا  تەك  جەكە باستىڭ عانا ەمەس، اينالانىڭ دا تازالىعىنا  كوڭىل بولگەن ءجون» دەپ،اۋىل، قالا تۇرعىندارىن سابىرلىلىققا  شاقىرعان.

دامبى اۋىلىنداعى  بەيكۇنا ادامداردى ءوز-وزىنە قول جۇمساۋعا ماجبۇرلەپ، اقىل -ەستەن ايىرۋ ءبىزدىڭ سانا-سەزىمىمىزگە تۇسىنىكسىز تىلسىم كۇشتىڭ اسەرىمەن ءجۇرىپ جاتىر ما، جوق الدە ەكولوگيالىق احۋالدىڭ اسەرى مە، ءدال قازىر وعان  ەشكىم جاۋاپ تابا الماي وتىر. مۇندايدا اتا-بابامىز اۋرۋ شىققان، قاسىرەتكە ۇشىراعان  ۇيلەردىڭ  اينالاسىن جىن-شايتاننان الاستاپ،  قۇرباندىق شالاتىن.  ارۋاقتارعا باعىشتاپ قۇران وقىتاتىن...

بورانباي عاليەۆ

اتىراۋ وبلىسى

Abai.kz