28 قىركۇيەك پەن 1 قازان ارالىعىندا قازاقستان رەسپۋبليكاسى قورعانىس ءمينيسترىنىڭ ورىنباسارى نۇرلان ساۋرانباەۆ باستاعان دەلەگاتسياسى تۇركيادا بولىپ قايتتى. انكارا مەن ىستامبۇل قالالارىندا وتكەن بۇل ساپاردىڭ ماقساتى - تۇرىك قارۋلى كۇشتەرى مەن قورعانىس ءوندىرىسىنىڭ الەۋەتىن زەردەلەۋ جانە ەكى ەلدىڭ اراسىنداعى اتالعان سالالار بويىنشا ىنتىماقتاستىقتى نىعايتۋ بولىپ تابىلدى، بۇل تۋرالى قازاقپارات قر ءسىم ءباسپاسوز قىزمەتىنە سىلتەمە جاساپ حابارلادى.

قازاقستان دەلەگاتسياسى تۇركيا قورعانىس ءمينيسترىنىڭ ءبىرىنشى ورىنباسارى شابان ۇمىتپەن كەزدەسۋ وتكىزىپ، قورعانىس ءوندىرىسىنىڭ بەدەلدى تۇرىك كومپانيالارىندا، ونىڭ ىشىندە وپتيكالىق جابدىقتار مەن راديولوكاتسيالىق قۇرالداردى وندىرەتىن «اسەلسان» كورپوراتسياسىندا، اسكەري رەاكتيۆتىك ۇشاقتارعا قوندىرعىلاردى وندىرەتىن «تاي» كورپوراتسياسىندا، بروندالعان تەحنيكانى شىعاراتىن «وتوكار» كورپوراتسياسىندا جانە ت.ب. بولعان.
حابارعا ساي، ساپار بارىسىندا قازاقستاننىڭ اسكەري كادرلارىن شەتەلدە دايارلاۋ بويىنشا تۇركيانىڭ اسكەري وقۋ ورىندارىندا كۋرسانتتارمەن قاتار، وفيتسەرلەردى وقىتۋ ماسەلەسى قارالدى. تۇركيانىڭ اسكەري ەلەكتروندىق ءوندىرىسى بويىنشا قورعانىس ءوندىرىسى سالاسىنداعى ءىرى كاسىپورىن بولىپ تابىلاتىن «اسەلسان» كومپانياسىمەن ۇسىنىلعان، 2013 جىلعى جەلتوقساندا استانادا اشىلعان «قازاقستان اسەلسان ينجينيرينگ» قازاق-تۇرىك قورعانىستىق-وندىرىستىك زاۋىتىنىڭ الداعى دامۋ پەرسپەكتيۆالارى جانە ونىڭ ىسكە اسىرىلۋى تۋرالى پىكىرلەر الماسىلدى.

اباي-اقپارات