شىعىستىڭ اڭىز اتاسى
شىعىس قازاقستان وبلىسىنىڭ قۇرمەتتى ازاماتى، ەڭبەك ەرى بوشاي كىتاپباەۆ بابامىز 5 قىركۇيەكتە دۇنيەدەن وزدى.
اتامىز شىعىس قازاقستان وبلىسى, كاتونقاراعاي اۋدانىنىڭ جاڭاۇلگى اۋىلىندا 1923 جىلى دۇنيەگە كەلگەن ول 1941 جىلى ەكىنشى دۇنيەجۇزىلىك سوعىسقا اتتانىپ 1944 جىلى بەلارۋستىڭ ۆيتەبسك قالاسى ءۇشىن بولعان سوعىستا جارالانىپ، ءبىر اياعىنان ايىرىلىپ اسكەرگە جارامسىزدىعىنان ەلگە ورالادى. 1945 جىلدىڭ ءساۋىر ايىندا كاتونقاراعاي اۋداندىق اتقارۋ كوميتەتىنىڭ حاتشىسى قىزمەتىنە ورنالاسقان بوشاي كىتاپباەۆ 1950 جىلى زايسان اۋدانىنىڭ اتقارۋ كوميتەتىنىڭ توراعاسى قىزىمەتىنە اۋىسادى. 1955 جىلى ۇلكەن نارىن اۋدانىنىڭ لەنين اتىنداعى ۇجىمشارىنىڭ توراعاسى بولىپ سايلانادى. ەڭبەك ەتە ءجۇرىپ، عىلىمي جۇمىسپەن دە قاتار اينالىسادى. 1970 جىلى ەكونوميكا تاقىرىبىنا كانديداتتىق ديسسەرتاتسيا قورعاپ عىلىم كانديداتى اتانادى. «وكتيابر رەۆوليۋتسياسى» وردەنىمەن، لەنين وردەنىمەن ماراپاتالعان. 1971 جىلى «سوتسياليستىك ەڭبەك ەرى» اتاعىن الادى. كاتونقاراعاي اۋدانى, شىعىس قازاقستان وبلىسىنىڭ قۇرمەتتى ازاماتى.
قايران نارىم
قايران نارىم كوتەرگەن ەلدىڭ جۇگىن،
دۇنيەدەن وزعان حابارىڭ كەلدى بۇگىن.
ايبارىڭدى ارقا تۇتىپ ءجۇرۋشى ەم،
بايتەرەگىم وپرىلىپ سەندە سىندىڭ.
زامانىڭنىڭ ەرى ەدىڭ جارقىراعان،
ۇلىسىمنىڭ ءبيى ەدىڭ ەل تىڭداعان.
ابىز ەدىڭ كەمەڭگەر، ويىڭ دانا
شەجىرەسى، تاريحى سارقىلماعان.
ەر بوشاي -ەر قوسايداي كورىنەتىن،
قايدا بارسا ەرلىگى بىلىنەتىن.
تۇلپار باپتاپ، ەل ساقتاپ، جەر قورعاعان،
مارتتىگىنە كورگەن جۇرت جۇگىنەتىن.
«بوشەكە»، «بوشەكەلەپ» ورىس-قازاق،
كىتاپباەۆ -دەيتۇعىن موسكۆادا.
سامولەتپەن ۇشاتىن ءوزى-اق جالعىز،
قوناەۆ الماتىعا شاقىرعاندا.
ءوزى باتىر، ءوزى ەر، ءوزى ساڭلاق،
كرەملدە جاتاتىن تالاي ماقتاپ.
نەمىسكە اتقان سيراقتى بومبا قىلىپ،
ءوزى ايتقانداي: «بويىمدا ء"مىنىم" سول-اق».
التاي دەسە ايۋداي اقىراتىن،
ايعالاپ ارۋاعىن شاقىراتىن.
اباي بولىپ اقىلىن ايتاتىن دا،
قابانباي بوپ قاسىڭنان تابىلاتىن.
باتىر بابا، ەر اتا - قاسيەتىم،
التايىنداي ارداقتاپ ەل سۇيەتىن.
كەتتى اينالىپ تاۋىنىڭ ءبىر شىڭىنا،
جۇرت سيىنىپ، قۇرمەتپەن باس يەتىن!
قايرات مالىكاجدار،
كوكپەكتى اۋدانى
شىعىس قازاستان وبلىسى
رەداكتسيادان: تۇعىرىنان تايماي تۋرا سويلەپ وتكەن بوشاي اقساقالدى ەل ءىشى جاقسى بىلەتىن. اقساقال دەپ سىيلايتىن، بەك قۇرمەتتەيتىن. ويتكەنى، بوشەكەڭ ۇلكەندىگىن الدىعا سالىپ، جاسىن ساۋدالاپ، ىقتاسىن ىزدەپ، ىعىپ جان باققان ەمەس. بيلىكتەگى اق جاعالى ۇلىقتارعا بولسىن، باسقاعا بولسىن، ايتارىن اشىپ ايتىپ، قاشاندا «قالىڭ ەلى قازاعانىڭ» قاسىنان تابىلىپ ءجۇردى.
اقساقالدىڭ ەل دارىپتەگەن تاعى ءبىر ەرەكشە قايسەتى، ونەرى – اتبەگىلىگى ەدى. سوۆەت وكىمەتى قازاقتى جىلقىنىڭ جالىنان اۋدارىپ اكەتكەندە بۇل كىسى جۇيرىك اتتار ۇستادى. رەسپۋبليكالىق دەڭگەيدە المان بايگەلەر ۇيىمداستىرۋعا مۇرىندىق بولدى. "كوممۋنيست" كىتاپباەۆتىڭ وسى ەرلىگىن تانىعان حالىق جازۋشىسى عابيت مۇسىرەپوۆ كەزىندە «بوشايدىڭ ءۇش قاراسى» دەگەن اڭگىمە جازدى. سونداي قازىنالى قارتىمىز دۇنيەدەن ءوتتى. ەلىنە، جۇرتىنا، تۋعان-تۋىستارىنا قايعىرىپ كوڭىل ايتامىز. مارقۇمنىڭ جانى جانناتتا بولسىن!
Abai.kz سايتىنىڭ ۇجىمى.
