ەلباسىمىز 2020 جىلعا دەيىن قازاقتىڭ سانىن 20 ميلليونعا جەتكىزۋىمىز كەرەك دەگەندە بوركىمىزدى اسپانعا اتىپ الاقايلاپ ەدىك. بۇدان بىرنەشە جىل بۇرىن ايتىلعاندا شىنىمەن بۇل سانعا قول جەتكىزەتىندەي  كورگەنبىز. قاراپ  وتىرساق، سول 2020 جىلعا دەيىن دە ءتورت جىلدان ءسال اساتىن ۋاقىت قالىپتى. ەندى قالعان ۋاقىتتا ول 20 ميلليونعا جەتەتىنىمىزگە سەنىم از. ونىڭ ۇستىنە «جىعىلعانعا جۇدىرىق» بولىپ، «كوشى-قون تۋرالى» زاڭ دا كوشتەي سوزىلىپ قابىلدانباي قويدى.

قىركۇيەكتىڭ 2-ءشى جۇلدىزى پارلامەنتتىڭ قوس پالاتاسى جۇمىسىن باستادى. دەمالىستا ءبىرى سايلاۋشىلاردى ارالاپ، ءبىرى جاقىن-جۋىعىن جاعالاپ، ەل ىشىندە بولىپ، ەت جەگەن دەپۋتاتتار كرەسلولارىنا قايتا كەلىپ جايعاستى. جاقسى تىنىققاندارى جايرانداعان جۇزدەرىنەن انىق بايقالادى. قارقىندارى دا قاتتى كورىندى، «40-50 زاڭ جوباسى قاراۋعا ءتۇستى، سونىڭ ءبارىن قابىلدايمىز» دەپ جەلپىنىپ وتىر. قازاقتىڭ مۇددەسىنە قاجەت زاڭدار بولسا، «بارەكەلدىدەن» باسقا ەشتەڭە ايتپاسپىز-اۋ.  وسى 40-50 زاڭ جوباسىنىڭ ىشىندە «كوشى-قون تۋرالى» جاڭا زاڭ جوباسى بار ما؟

بۇل ساۋالىمىزدى پارلامەنت ءماجىلىسىنىڭ دەپۋتاتى گۇلنار سەيتماعامبەتوۆا حانىمعا جولداعان ەدىك. ول جاقتان كەلگەن جاۋاپقا قاراعاندا قاتتاۋلى تۇرعان 40-50 زاڭ جوباسىنىڭ ىشىندە «كوشى-قون» تۋرالى زاڭ جوباسى جوق. ول ۇكىمەتتىڭ قاراۋىنا جولدانىپتى. سول جاقتان ءالى بەرى شىقپاعانعا ۇقسايدى. «كەلەسى اپتا كەلىپ قالۋى كەرەك» دەيدى. سوعان قاراعاندا ۇكىمەتتەگىلەر ءار جەرىنەن جۇلىپ-ءۇزىپ، قىسقارتىپ جاتپاسا نەعىلسىن. ويتكەنى، مىناۋ جاھاندىق ەكونوميكالىق داعدارىس بار، باسقاسى بار ايتەۋىر، ۇكىمەت قازاقتىڭ سانىن كوبەيتكىسى كەلمەسە سىلتاۋ جەتەرلىك. بۇل جەردە ۇلت اتىنان سويلەيتىن حالىق قالاۋلىلارى ءبىر قايرات تانىتۋى ءتيىس قوي. تالاپ بولماسا، سوڭىنان سۇرالماسا، ۇكىمەتتىڭ «ۇمىتشاقتىق» اۋرۋى ۇستاپ، زاڭ جوباسى تاعى ءبىراز جاتىپ قالۋى ابدەن مۇمكىن. ال ءبىز ءۇشىن ءار مينۋت، ءار ساعات قىمبات. حالقى ازداۋ سولتۇستىك وڭىرلەردە ۇلتتىڭ سانىن كوبەيتۋىمىز كەرەك. قازىر قاۋىپ-قاتەر كۇشەيگەن ۋاقىت. حالقىمىزدىڭ «جاۋ جوق دەمە – جار استىندا» دەگەن ەسكەرتپەسى – ەسكەرتپە. قامسىزدىقتى ەندى قۇداي كەشىرمەيدى. سوندىقتان ورالمانداردىڭ سانىمەن تەزىرەك ۇلت سانىن كوبەيتكەنىمىز ابزال. ەلباسىمىزدىڭ ءوزى 2020 جىلعا دەيىن ۇلتىمىزدىڭ سانىن 20 ميلليونعا جەتكىزۋىمىز كەرەك دەپ وتىرعاندا، قازاقتىڭ سانى وسكەنىن قالايتىن ۇكىمەت مۇنى ۇرانداتىپ اكەتپەس پە ەدى؟!

كوشى-قونعا قاتىستى الىپ-قاشپا ءسوز جەلدەي ەسىپ تۇرعاندا ەلگە اياق ارتقان كەيبىر اعايىنداردىڭ كوڭىلىنە الاڭ كىرگەن جايى بار: «كوشتىڭ بەتىن كەرى تۇزەيمىز بە، قايتەمىز؟». وسى الاڭ كوڭىلدى ورنىقتىرار كوشى-قون تۋرالى زاڭ قابىلدانسا، كوپ كۇڭگىرت ماسەلەنىڭ بەتى وزىنەن-ءوزى ايقىندالار ەدى...

مەڭدوللا نۇرىمۇلى

Abai.kz