20 تامىزدان باستاپ، قازاقستاندا تەڭگەنىڭ ايىرباس باعامى ەركىندىككە جىبەرىلەدى .بۇل تۋرالى بۇگىن قر ۇكىمەتىنىڭ سەلەكتورلىق رەجيمدەگى وتىرىسىندا ەل پرەمەر-ءمينيسترى كارىم ءماسىموۆ ءمالىم ەتتى. 

ك.ءماسىموۆ ءوز سوزىندە الەمدىك ەكونوميكاداعى ىرگەلى تەرىس وزگەرىستەر جاعدايىندا جاڭا ەكونوميكالىق ساياسات ەكونوميكالىق ءوسىم مەن باعا تۇراقتىلىعى اراسىنداعى بالانستى قامتاماسىز ەتۋ ءۇشىن جاڭا اقشا-نەسيە ساياساتىن تالاپ ەتەتىندىگىن اتاپ ءوتتى. بۇل تۋرالى قازاقپارات جازدى.
«وسىعان وراي، قر ۇلتتىق بانكى مەن ۇكىمەتى 2015 جىلدىڭ 20 تامىزىنان باستاپ، ينفلياتسيالىق تارگەتتەۋ رەجيمىنە، ۆاليۋتالىق ءدالىزدى الىپ تاستاۋعا جانە ايىرباس باعامىن ەركىندىككە جىبەرۋگە كوشۋگە نەگىزدەلگەن جاڭا اقشا-نەسيە ساياساتىن جۇزەگە اسىرۋعا كىرىسۋ شەشىمىن قابىلدادى»، - دەدى ول.
ونىڭ اتاپ وتۋىنشە، تەڭگەنىڭ اۋىسۋ باعامى نارىق سۇرانىسى نەگىزىندە، جانە ىرگەلى ىشكى، سىرتقى ماكروەكونوميكالىق فاكتورلاردى ەسكەرە وتىرىپ قالىپتاستىرىلاتىن بولادى.

ەستەرىڭىزگە سالساق، ءبىر ايدان استام ۋاقىت بۇرىن، 15 شىلدەدە قازاقستاندا تەڭگەنىڭ دوللارعا شاققانداعى باعامىنىڭ اۋىتقۋ ءدالىزى 170-188 تەڭگەدەن 170-198 تەڭگەگە كەڭەيتىلگەن ەدى. كەشە، 19 تامىز ۇلتتىق بانكتىڭ كەشەگى كۇنگە بەكىتكەن 190 تەڭگەگە جەتپەيتىن دوللار باعامىنا قاراماستان، ەلىمىزدەگى بانكتەر مەن اقشا ايىرباستاۋ جەلىلەرى ءبىر دوللاردى 198 تەڭگەدەن ساتا باستادى.

اباي-اقپارات