قازاقستاندا الداعى 3 كۇندە سولتۇستىك پەن ورتالىق وڭىرلەردە وتكىنشى جاڭبىر جاۋىپ، كۇن كۇركىرەيدى. ەلىمىزدىڭ باسىم اۋماعىندا كۇن رايى قۇبىلمالى بولادى، كەي جەرلەردە وتكىنشى جاۋىن جاۋىپ، نايزاعاي وينايدى، جەل كۇشەيەدى، تەك رەسپۋبليكانىڭ وڭتۇستىگىندە كۇن اشىق بولادى.

تۇندە اۋا تەمپەراتۋراسى 16 گرادۋستى كورسەتسە، كۇندىز 25 گرادۋسقا دەيىن كوتەرىلەدى. ال وڭتۇستىك، شىعىس وڭىرلەرىندە اپتاپ ىستىق ساقتالىپ، سىناپ باعاناسى 35 گرادۋسقا دەيىن جەتەدى. “استانادا دا جاۋىن جاۋىپ، قولايسىز اۋا رايى اپتانىڭ سوڭىنا دەيىن ساقتالادى”، – دەيدى سينوپتيكتەر.

“الداعى تاۋلىكتە استانا قالاسى بويىنشا اۋا رايى تۇراقسىز بولادى. كەي كەزدەرى جاڭبىر جاۋادى. اۋانىڭ تۇنگى تەمپەراتۋراسى – 15, 17. كۇندىزگى تەمپەراتۋراسى 26, 28 گرادۋسقا دەيىن بارادى. باتىس وڭىرلەردە اپتانىڭ سوڭىنا قاراي انتيتسيكلوننىڭ ەنۋىنە بايلانىستى جاۋىن-شاشىن بولمايدى. اۋانىڭ تەمپەراتۋراسى ازداپ تومەندەيدى”، – دەيدى “قازگيدرومەت” رمك جەتەكشى ينجەنەرى ءلاززات كەرىموۆا.

«قازگيدرومەت» رمك مالىمەتىنشە، اقمولا، باتىس قازاقستان، قوستاناي، قاراعاندى، شىعىس قازاقستان، تۇندە جانە تاڭەرتەڭ جامبىل، كۇندىز اقتوبە، پاۆلودار وبلىستارىندا كەي جەرلەردە جەلدىڭ جىلدامدىعى 15-20 م/س-كە دەيىن كۇشەيەدى. الماتى وبلىسىندا كەي جەرلەردە 17-22 م/س جىلدامدىقپەن جەل سوعىپ، شاڭدى داۋىل كوتەرىلەدى. سولتۇستىك قازاقستان وڭىرىندە كەي بولىكتەردە 15-20 م/س جىلدامدىقپەن جەل سوعادى، تۇندە جانە تاڭەرتەڭ تۇمان تۇسەدى دەپ كۇتىلۋدە. كۇندىز الماتى، اقتوبە وبلىستارىندا كەي جەرلەردە اپتاپ ىستىق بولادى. قىزىلوردا، وڭتۇستىك قازاقستان، جامبىل، الماتى وڭىرلەرىنىڭ باسىم اۋماعىندا، سونداي-اق باتىس قازاقستان، اقتوبە جانە قاراعاندى، شىعىس قازاقستان وبلىستارىنىڭ كەي جەرلەرىندە توتەنشە جوعارى ءورت قاۋپى ساقتالادى. 

اباي-اقپارات