“قازاق ەلى” دەپ اتالاتىن قازاق حاندىعى تۋرالى سەريالعا بولىنگەن $5 ملن قاراجاتتى ءفيلمدى ءتۇسىرۋ توبى جاراتا المادى. قاراجاتتىڭ باسىم بولىگى قازاقفيلم شوتىندا جاتىر دەپ مالىمدەدى مادەنيەت جانە سپورت ءمينيسترى ارىستانبەك مۇحامەديۇلى.

“زاڭ تىلىمەن ايتايىن. سەريالعا باسىندا قارجىلاندىرۋ باستالعاندا ءفيلمنىڭ قۇنىنىڭ 30%-ى بولىنەدى. ول جاراتىلعانى تۋرالى ەسەپ بەرىلگەندە، كەلەسى ترانش بولىنەدى. قازاقفيلمنىڭ جانىنان فيلم-سەريالدى تۇسىرۋگە دەپ قۇرىلعان توپ سول بولىنگەن 30% قاراجاتتىڭ يگەرىلگەنى تۋرالى ەسەپ بەرگەن جوق. ياعني، ولار شارتتى تۇردە تەك 1,5 ملن قاراجات الدى، ال قالعانىن جاراتىپ تا ۇلگەرمەدى”، – دەدى سارسەنبى كۇنى مۇحامەديۇلى.

Nur.kz-ءتىڭ جازۋىنشا، مينيستر قالعان 70% قاراجات قازاقفيلم شوتىندا جاتقانىن ايتقان. ال بولىنگەن 30% قاراجاتتىڭ يگەرىلۋىن ول جەكە ءوزى قاداعالاپ وتىر.

“ول 30% قاراجاتتىڭ يگەرىلۋىن جەكە ءوزىم قاداعالاپ وتىرمىن، كيىمدەر تىگىلدى، كەرەك-جاراقتار دايىندالدى، ەكى ايدان بەرى اكتەرلەرمەن دايىندىق جۇمىستارى جۇرگىزىلۋدە. سەبەبى ءبىز ول ءفيلمنىڭ، ادەتتەگىدەي، ارتىستەر ءۇش كۇندە جاتتاعان سوزدەرىن ۇمىتىپ قالىپ، كوزدەرى باقىرايىپ تۇرمايتىنداي، جوعارى ساپادا تۇسىرگەنىن قالاپ وتىرمىز”، – دەدى مينيستر.

بۇل رەتتە ول اكتەرلەرمەن دايىندىق 2 ايدان بەرى جالعاسىپ كەلە جاتقانىن، ال بولىنگەن $5 ملن.، ءمينيستردىڭ ويىنشا، سەريالدى دايىنداۋعا جەتكىلىكتى.

“مەنىڭ بىلەتىنىم، ءتىپتى 100 ملن دوللار قاراجات بولىنگەن كۇننىڭ وزىندە رەجيسسەر كەلىپ: “ماعان 300 ملن بەرىڭىزدەر، مەن قيال جەتپەيتىن فيلم ءتۇسىرىپ بەرەمىن”، – دەيدى. ول كوركەم شەبەرلىككە ۇمتىلىستىڭ شەگى بولمايدى. ول دۇرىس تا. (…) ال ونىڭ (سەريال رەجيسسەرى – رۇستەم ابدرەشوۆتىڭ) ءبىر جەردە يكەمسىزدەۋ تۇردە ء“بىز ماسقارا جاعدايدامىز” دەپ ايتقانى، ول ءوزىنىڭ ويىن دۇرىس جەتكىزە الماۋىنان. شىن مانىسىندە مەن وعان دەمەۋشىلەردەن كومەك سۇراۋىنا رۇقسات بەرگەم. ول دۇرىس تا. كومەكتەسۋگە دايىن ادامدار بار”، – دەپ ەسەپتەيدى مۇحامەديۇلى.

ءمينيستردىڭ ايتۋىنشا، “قازاق ەلى” سەريالىن ءتۇسىرۋ كەستەگە ساي ءجۇرىپ كەلەدى. ەسكە سالساق، “قازاق ەلى” سەريالىنىڭ جوباسىن تانىستىرۋ 2015 جىلى 6 مامىردا بولعان. العاشقى جوسپار بويىنشا ءفيلمدى ءتۇسىرۋ ماۋسىمدا باستالۋى كەرەك ەدى، كەيىن ءتۇسىرۋ مەرزىمىن قىركۇيەك ايىنا دەپ شەگەرىلدى.

سەريالدىڭ رەجيسسەرى ابدرەشەۆ پەن باس پروديۋسسەرى ارمان اسەنوۆ باق-تارعا بەرگەن سۇحباتىندا سەريالدى تۇسىرۋگە $5 ملن ەمەس، $10 ملن كەرەك دەپ ءمالىم ەتكەندى. سونداي-اق، رەجيسسەرلەر قاراجاتتىڭ جەتپەۋىنەن فيلم بولىمدەرىنىڭ قىسقاراتىنىن حابارلاعان بولاتىن.

اباي-اقپارات