ەكىنشى دۇنيەجۇزىلىك سوعىس كەزىندەگى 28 گۆاردياشى-پانفيلوۆشىلارعا بايلانىستى رەسەي مەملەكەتتىك مۇراعاتىنىڭ كەشەلى-بۇگىنگى اقپاراتتارى دۇنيەنى دۇربەلەڭگە سالايىن دەپ تۇر. مۇنى بىرەۋ دۇرىس دەسە، ەكىنشى بىرەۋ دۇرىس ەمەس دەيدى. «دۇرىس ەمەس» دەيتىندەردىڭ كوپشىلىگى البەتتە، اتالعان مۇراعات قۇجاتتارىنا سىلتەمە جاسايدى. تاعى بىرەۋلەر مۇنى سولتۇستىك كورشىمىزدىڭ استىرتىن ساياساتىنىڭ الدەقايلاۋ ءبىر «قۇپيا ءجۇرىسى» دەپ ويلايدى. ەندى بىرەۋلەر مۇراعات قۇجاتتارىنىڭ تۇپنۇسقا ەكەندىگىنە كۇمان كەلتىرەدى. قىسقاسىنان قايىرعاندا، بولجام كوپ تە، ءبىر ىزگە تۇسكەن... ءبىر ىزگە ءتۇسىپ – وسىناۋ دۇربەلەڭنىڭ دىمىن وشىرەتىن، ءسويتىپ ادىلەتتىڭ اق-قاراسىن اجىراتىپ بەرەتىن ەشتەڭە بولماي تۇر ازىرگە. ال ءبىزدىڭ ناقتى بىلەتىنىمىز مىناۋ: رەسمي مالىمەتتەرگە جۇگىنەتىن بولساق، قازاق سوۆەتتىك سوتسياليستىك رەسپۋبليكاسى مەن قىرعىز سوۆەتتىك سوتسياليستىك رەسپۋبليكاسىنىڭ استانالارى الماتى جانە فرۋنزە قالالارىندا 316-شى اتقىشتار ديۆيزياسى سوعىستىڭ العاشقى جىلىندا-اق گەنەرال-مايور يۆان پانفيلوۆتىڭ جەتەكشىلىگىمەن قۇرىلعان. حوش دەيىك.

سوعىستىڭ ەكىنشى جىلى، دالىرەگى – 1942-ءشى جىلى سسسر جوعارعى سوۆەتى پرەزيديۋمىنىڭ ۋكازىمەن ماسكەۋ تۇبىندەگى دۋبوسەكوۆو رازەزى ماڭىندا نەمىس فاشيستەرىمەن بولعان ۇرىس كەزىندە ەرەكشە ەرلىگىمەن كوزگە ءتۇسىپ، قايسارلىقپەن قازا تاپقان گۆاردياشى-پانفيلوۆشى 28 جاۋىنگەرگە سوۆەت وداعىنىڭ باتىرى اتاعى بەرىلگەن. وسىدان كەلىپ شىعاتىن تاعى ءبىر وي مىناۋ: ەگەر رەسەي مەملەكەتتىك مۇراعاتىنىڭ كەشەلى-بۇگىندى كەلتىرىپ وتىرعان 1948-ءشى جىلعى سسسر اسكەري باس پروكۋرورىنىڭ انىقتاما-بايانداماسى ناقتى قۇجاتتار دەپ ەسەپتەلەتىن بولسا، 1942-ءشى جىلعى سسسر جوعارعى سوۆەتى پرەزيديۋمىنىڭ ۋكازى ناقتى قۇجات دەپ ەسەپتەلمەي مە؟ قىزىق ماسەلە! سوندىقتان وسىناۋ «قىزىق ماسەلە» دە – باستى اۋىرتىپ، بالتىردى سىزداتاتىن قىپ-قيىن ماسەلە. سۇراق كوپ ازىرگە، بىراق جاۋاپ تا جوق ازىرگە.

مارات ماداليموۆ.

ABAI.KZ