قىتاي بانكتەرىنىڭ كوپ بولىگى رەسەيلىك كرەديتتىك ۇيىمدارمەن جۇمىس جۇرگىزۋدەن باس تارتىپ جاتىر. «wow-impulse.ru» سايتىنىڭ جازۋىنشا، بۇل تۋرالى ۆتب بانكىنىڭ ورىنباسار توراعاسى يۋري سولوۆەۆ مالىمدەگەن.

ونىڭ سوزىنشە، قىتايدىڭ قارجىلىق قۇرىلىمى رەسەيمەن مەملەكەت ارالىق قىزمەتتىك ساۋدا نارىعىنداعى ءوز ۇلەسىن ايتارلىقتاي قىسقارتقان.

ء«بىزدىڭ قاتىناسىمىزدا قيىندىقتار جوق ەمەس. ارىپتەستىك دامۋداعى باستى كەدەرگى – رەسەي بانكتەرىنە قارسى ۇستانىپ وتىرعان قىتاي پوزيتسياسى. قىتايدىڭ بۇنداي قادامعا بارۋىنا اقش پەن ەو-نىڭ رەسەيگە قارسى سالىپ وتىرعان سانكتسيالارى يتەرمەلەدى»، - دەيدى سولوۆەۆ. ول سولاي بولا تۇرا، ازيالىق ينۆەستورلار رەسەيدەن بيىك پوتەنتسيال، ارىپتەستىك الەۋەت كۇتەدى دەپ تە سانايدى.

قىتايدىڭ مينيسترلىك كوميسسياسىنىڭ مالىمەتىنشە، 2014 جىلى قىتايدىڭ رەسەيگە سالعان قارجىلىق ەمەس تىكەلەي ينۆەستيتسياسى 250 پايىزعا جوعارىلاپ، 8 ميلليارد دوللاردى قۇراعان.

ەستەرىڭىزگە سالاتىن بولساق، قىرىم كونفليكتىنەن كەيىن رەسەي مەن باتىس الەمىنىڭ اراسى سالقىنداپ، رەسەيدىڭ ەۋروپاعا ەكسپورتتىق جولى جابىلعان ەدى. بۇنداي جاعدايعا تاپ بولعان رەسەي شيرەك عاسىردان بەرى ءوڭ بەرمەي كەلسە دە، قىتايمەن گاز ماسەلەسىن تالقىلاۋعا ءماجبۇر قالدى. وسى سەبەپتەن پۋتين بىلتىرعى جىلى عانا، مامىردا جانە قاراشا ايىندا قىتايعا ارنايى شاقىرۋمەن ەكى رەت بارىپ قايتتى. بۇل - ءپۋتيننىڭ بىلتىرعى ساپارىنداعى پوستسوۆەتتىك ەلدەردى ايتپاعاندا رەسمي ساپارمەن بارعان ءۇندىستاننان باسقا بىردەن-ءبىر الپاۋىت ەل ەدى. ول ەكىنشى رەتكى قاراشانىڭ 9-11 كۇندەرى اراسىنداعى ساپارىندا، مۇمكىندىكتى پايدالانىپ بەيجىڭدە بىرقاتار ازيالىق مەملەكەتتەردىڭ باسشىلارمەن سويلەسكەن بولاتىن.

تۇتىنۋشىلىق نارىعى اسا ۇلكەن قىتاي ءۇشىن رەسەيمەن قىرعي-قاباق بولۋدان پايدا جوق، قىتاي ارينە زيانىن دا كورە قويمايدى. سەبەبى الەمدىك تۇتىنۋشى نارىقتىڭ 90 پايىزىنا ەكسپورت ءونىم شىعاراتىن قىتايعا رەسەيمەن سالقىندىق كوپ زارداپ تۋعىزبايدى. الايدا، «قيىن» جاعدايداعى رەسەيدىڭ اۋىر كۇندەرىندە جانىنان تابىلىپ، ءسىبىردىڭ گازىن ارزانداۋ باعاعا الا بەرۋ قىتايعا ءتيىمدى. ونىڭ ۇستىنە ۇندەمەي-اق ءىس بىتىرگىش قىتايلار قارجى جاعىندا قادامدى قالاي جاساۋدى جاقسى بىلەدى. ەكونوميكا دەگەننىڭ ءوزى ۇلكەن ساياسات ەكەنىن بىلەتىن ازيانىڭ الپاۋىتى سانكتسيانى اشىق سالماي-اق، رەسەي نارىعىن تۇرالاتا الادى. سوندىقتان، قىتاي ءۇشىن باتىسقا ەرىپ رەسەيگە سانكتسيا سالۋ كۇن تارتىبىندەگى ماسەلە بولماسا كەرەك.

Abai.kz