قازاقستان دۇنيەجۇزىلىك ساۋدا ۇيىمىنا (دسۇ) كىرۋىنە قاتىستى كەلىسسوزدەردى تابىستى اياقتادى، ەندى وسى ۇيىمنىڭ قۇرامىنا 162-مۇشە بولىپ ەنەدى دەپ حابارلادى بۇگىن پرەزيدەنت نۇرسۇلتان نازارباەۆ.

اقوردانىڭ ءباسپاسوز قىزمەتىنىڭ حابارلاۋىنا سۇيەنسەك، نازارباەۆ بۇگىن دسۇ-عا كىرۋ كەلىسسوزىنىڭ اياقتالۋىنا قاتىستى ارنايى ۇندەۋ جاساعان. "بۇگىن جەنەۆادا جۇمىسشى توبىنىڭ سوڭعى وتىرىسى بولدى. وندا قازاقستاننىڭ دسۇ-عا كىرۋىنە قاتىستى كەلىسسوزدەردىڭ اياقتالعانى رەسمي تۇردە جاريالاندى. بۇل وقيعانىڭ ءبىز ءۇشىن تاريحي ماڭىزى زور. قازاقستان دسۇ-نىڭ 162-مۇشەسى بولادى. دسۇ-عا كىرۋ ءبىزدىڭ ەكونوميكامىزعا جاڭا كوكجيەك اشادى. بۇل ءبىزدىڭ كاسىپورىندارىمىزدىڭ شەتەل نارىقتارىنا شىعۋىنا، ال تۇتىنۋشىلاردىڭ تاۋارلار مەن قىزمەت كورسەتۋلەردى تاڭداۋىنا مۇمكىندىك بەرەدى" دەدى قر پرەزيدەنتى.

قازاقستان دسۇ-عا كىرۋ جونىندەگى كەلىسسوزدى 1996 جىلدىڭ قاڭتارىندا باستاعان بولاتىن. ەستەرىڭىزگە سالا كەتەيىك، كورشى قىرعىز ەلى اتالعان ۇيىمعا 1998 جىلدان بەرى مۇشە بولىپ كەلەدى.

Abai.kz