ءوڭىر باسشىسى ب.اتامقۇلوۆتىڭ توراعالىعىمەن وبلىس اكىمدىگىنىڭ كەزەكتى ءماجىلىسى ءوتتى. جيىندا وبلىستىق قارجى باسقارماسى مەن دەنساۋلىق ساقتاۋ باسقارمالارىنىڭ باسشىلارى بايانداما جاساپ، سالادا اتقارىلعان جۇمىستار بويىنشا مالىمەتتەر كەلتىردى. وبلىستىق قارجى باسقارماسىنىڭ باسشىسى ك.مەندەباەۆتىڭ بايانداماسى مەملەكەتتىك باسقارۋ ورگاندارىنىڭ وبلىس بويىنشا كوممۋنالدىق مەنشىگىنىڭ ساقتالۋى مەن پايدالانىلۋىنا باقىلاۋ بارىسى تۋرالى ءوربىدى. باسقارما باسشىسىنىڭ مالىمەتىنە سايكەس، 2015 جىلدىڭ 9 ايىندا وبلىستاعى 74 مەملەكەتتىك مەكەمەدەن 697,8 ميلليون تەڭگە تابىس ءتۇسىپ، وتكەن جىلدىڭ سايكەس مەرزىمىمەن سالىستىرعاندا 50 ميلليون تەڭگەگە ارتقان. سونىمەن قاتار، 2009-2014 جىلدار ارالىعىندا وبلىستا 252 ارەكەتسىز مەملەكەتتىك زاڭدى تۇلعالاردى جويۋ بويىنشا جۇمىستار جۇرگىزىلىپ، وسى جىلدىڭ باسىنان بەرى 21 مەملەكەتتىك زاڭدى تۇلعا جويىلىپ، تىزىمنەن الىنعان. باياندامانى تىڭداعان وبلىس اكىمى باسقارما باسشىسىنا مەملەكەتتىك مۇلىكتىڭ ساقتالۋى مەن ءتيىمدى پايدالانۋىنا باقىلاۋدى كۇشەيتۋ كەرەگىن ايتتى. ب.اتامقۇلوۆتىڭ سوزىنشە، مەملەكەت باسشىسىنىڭ قازاقستان حالقىنا ارناعان جولداۋىندا ايتىلعان مەملەكەتتىك قۇرىلىمداردىڭ ءتيىمدى جۇمىس ىستەۋىنە ايرىقشا نازار اۋدارىلىپ جاتقان تۇستا بۇل ماسەلە ماڭىزدى بولىپ تابىلادى. سونداي-اق، ماجىلىستە «سالاماتتى قازاقستان» دەنساۋلىق ساقتاۋدى دامىتۋدىڭ 2011-2015 جىلدارعا ارنالعان مەملەكەتتىك باعدارلاماسىنىڭ وقو-دا ورىندالۋى جونىندە وبلىستىق دەنساۋلىق ساقتاۋ باسقارماسىنىڭ باسشىسى س.پاكەەۆ ەسەپ بەردى. ەسكە سالساق، 2015 جىلى بۇل باعدارلامانىڭ جۇزەگە اسۋ مەرزىمى اياقتالادى. وسىعان بايلانىستى اتقارىلعان جۇمىستار بويىنشا جەتىستىكتەردى ايتۋعا بولادى. ماسەلەن، وڭتۇستىك قازاقستان وبلىسىندا ورتاشا ءومىر ءسۇرۋ ۇزاقتىعى 2010 جىلى 69,5 جاس بولسا، 2015 جىلى بۇل كورسەتكىش 71,79 جاستى قۇراپ وتىر. جىل سايىن 70 مىڭنان استام نەمەسە ەلدەگى ءاربىر 5-ءشى ءسابي وڭىرىمىزدە دۇنيەگە كەلەدى. مۇنان بولەك، وسى جىلدار ارالىعىندا 310 دەنساۋلىق ساقتاۋ نىسانى پايدالانۋعا بەرىلىپ، 152 عيمارات كۇردەلى جوندەۋدەن ءوتتى. باعدارلاما ىسكە اسىرىلعان كەزەڭدە مەديتسينالىق ۇيىمداردىڭ جاراقتاندىرىلۋى 25,3 پايىزدان 65,4 پايىزعا جەتكىزىلدى. جاڭعىرتۋ جۇمىستارى باسىم باعىتتار بولىپ سانالاتىن – انا مەن بالا دەنساۋلىعىن قورعاۋ، كارديولوگيا، ونكولوگيا جانە فتيزياتريا سالالارى بويىنشا ىسكە اسىرىلدى. جەدەل مەديتسينالىق كومەك قىزمەتى ءۇشىن سانيتارلىق كومەكتىڭ 128 بىرلىگى الىندى. قالالارداعى مامان تاپشىلىعى 2 ەسەگە، اۋىلدىق جەردەگى كادر جەتىسپەۋشىلىگى 2,5 ەسەگە ازايدى. بۇگىنگى تاڭدا وبلىستا 7303 دارىگەر مەن 22 134 مەدبيكە جۇمىس ىستەيدى. سونداي-اق، باسقارما وكىلى وڭىردەگى دەنساۋلىق ساقتاۋ جۇيەسىن دامىتۋداعى نەگىزگى باعىتتاردى اتادى. ياعني، ولاردىڭ قاتارىنا مامانداردى قايتا دايارلاۋ، جوعارى تەحنولوگيالاردى دامىتۋ مەن مەديتسينالىق قۇرىلعىلاردى ۇتىمدى پايدالانۋدىڭ مونيتورينگىن كۇشەيتۋ ماسەلەلەرى كىرەدى. جيىن سوڭىندا وقو اكىمى باسىم باعىتتار بويىنشا جۇمىستاردى جالعاستىرۋ كەرەگىن ايتىپ، بىرقاتار تاپسىرمالار بەردى.

وقو اكىمىنىڭ ءباسپاسوز قىزمەتى