ۇلتتىق بانك قۇنى 20 مىڭ تەڭگەلىك بانكنوتتاردى اينالىمعا ەنگىزەدى، - دەپ حابارلايدى Tengrinews.kzء تىلشىسى قارجى رەتتەۋشىسىنىڭ ءباسپاسوز قىزمەتىنە سىلتەمە جاساپ. ول اينالىمعا 2015 جىلدىڭ 1 جەلتوقسانىندا شىعارىلادى.

بانكنوتتىڭ قازاقستان رەسپۋبليكاسىنىڭ تۇڭعىش پرەزيدەنتى مەملەكەتتىك مەرەكەسىنە وراي شىعارىلاتىنى حابارلاندى. بۇل بانكنوت 2013 جىلى دايىندالعان. باسقا اقشا بەلگىلەرىمەن قاتار اينالىمعا شىققان كەزەڭنەن باستاپ ول زاڭدى تولەم قۇرالى بولىپ ەسەپتەلەدى جانە تولەمدەر مەن اقشا اۋدارىمدارىنىڭ بارلىق تۇرىندە قابىلدانادى.

بانكنوتتاردىڭ ديزاينى اينالىمداعى اقشا بەلگىلەرىمەن بىرىڭعاي ستيلدە ورىندالعان: بەت جاعىنىڭ باسىم بەينەلەرى تىگىنەن، ال سىرت جاعىندا كولدەنەڭ ورنالاسقان. 20 مىڭ تەڭگەلىك بانكنوتتىڭ ولشەمى: 155ح79 مم.

بانكنوت كوك-سۇر ءتۇستى.

بەت جاعىندا نەگىزگى بەينەلەر "قازاق ەلi" مونۋمەنتى، پىراق جانە ماڭگىلىك ەل سالتاناتتى اركاسى بەينەلەنگەن. "قازاقستاننىڭ تاۋەلسىزدىگىن بەينەلەيتىن "قازاق ەلى" تاريحي-مەموريالدىق كەشەنى استانا قالاسىنىڭ ون جىلدىق مەرەيتويى قارساڭىندا اشىلدى. ستەلا بيىكتىگى - 91 مەتر - ول قازاقستان تاۋەلسىزدىك العان 1991 جىلدى بىلدىرەدى. ەسكەرتكىشتىڭ ءمارمار نەگىزى قازاقستان حالقىنىڭ تازا وي-نيەتى مەن ەتنيكاارالىق ۇيلەسىمىن كورسەتەدى. ال توبەسىندە سامۇرىق قۇس بار ستەلانىڭ ءوزى قازاقستان حالقىنىڭ بولاشاققا، ودان ءارى دامۋ مەن گۇلدەنۋگە دەگەن ۇمتىلىسىن كورسەتەدى", - دەپ جازىلعان ۇلتتىق بانكتىڭ ءباسپاسوز حابارلاماسىندا.

"بانكنوتتىڭ جوعارعى سول جاعىندا پىراق بەينەلەنگەن، ول تۇركىتىلدەس جانە كوشپەندى حالىقتاردى قوسا العاندا كوپتەگەن مادەنيەتتە تازا نۇر مەن ءومىردىڭ، شابىت پەن جەمىستى ەڭبەكتىڭ، ماقساتقا ۇمتىلۋشىلىق پەن بيلىكتىڭ نىشانى رەتىندە قابىلدانادى. بانكنوتتىڭ تومەنگى جاعىندا ورتادا ماڭگىلىك ەل سالتاناتتى اركاسى - ەركىن ەلدىڭ ماڭگىلىك يدەياسى، جالپىعا ورتاق قازاقستان ءۇيىنىڭ ۇلتتىق يدەياسى ساۋلەت قۇرىلىسى تۇرعىسىنان بەينەلەنگەن. سىرت جاعىندا بانكنوتتىڭ ورتاسىنداعى نەگىزگى بەينە قازاقستان كارتاسىنىڭ ءپىشىنى جانە استانامىز - استانا قالاسىنىڭ قازاقستان رەسپۋبليكاسىنىڭ كونستيتۋتسياسىندا نەگىزى قالانعان بيلىك تارماقتارىن ءبولۋ قاعيداتىن كورسەتەتىن تارتىپپەن ورنالاسقان اقوردا، پارلامەنت جانە ۇكىمەت عيماراتتارى بار كورىنىسى بەينەلەنگەن", - دەپ حابارلادى ءباسپاسوز قىزمەتى.

تاراتىلعان حابارلاماعا سايكەس، جاڭا بانكنوت قازاقستان تەڭگەسىنىڭ ەڭ قورعالعان اقشا بەلگىسى، سونىمەن قاتار الەمدەگى ەڭ قورعالعان بانكنوتتاردىڭ ءبىرى بولىپ ەسەپتەلەدى. "قورعاۋ ءۇشىن قولدان جاساۋدان قورعاۋ يندۋسترياسىنداعى سوڭعى يننوۆاتسيالار، جالعان اقشا جاساۋشىلارعا قارسى ءىس-قيمىلدىڭ جاڭارتىلعان ءارى كۇشەيتىلگەن كلاسسيكالىق تاسىلدەرى پايدالانىلدى. بەت جاعىنداعى نەگىزگى قورعانىش ەلەمەنتتەر: بانكنوتتىڭ ەكى جاعىنان جارىققا توسىپ قاراعاندا كورىنەتىن سامۇرىق ميفتىك قۇسى تۇرىندەگى كومپوزيتتىك جەتىلدىرىلگەن سۋتامعى بەلگىسى جانە ءمولدىر ورىن تۇرىندەگى قۇس ءپىشىنى. ديزاينىنىڭ تۇپنۇسقالىلىعىن تەكسەرۋدى جەڭىلدەتەتىن ءتۇس اۋىستىرۋ ەلەمەنتتەرى پىراق، ءمولدىر ورىندا كورىنەتىن قازاقتىڭ ويۋ-ورنەگى جانە ءتۇس اۋىستىراتىن قورعانىش ۇزىك-ۇزىك ءجىپ تۇرىندە ورنالاسقان", - دەپ جازىلعان ۇلتتىق بانك حابارلاماسىندا.

بانكنوتتىڭ سىرت جاعىندا بىرقاتار قورعانىش ەلەمەنتى بار: سۋتامعى بەلگىسى، ءتۇس اۋىستىرۋ بوياۋمەن باسىلعان ويۋ-ورنەك ەلەمەنتى بار ءمولدىر ورىن، جارىققا توسىپ قاراعان كەزدە بەت جاعىنداعى بولىكتەرمەن ءبىرتۇتاس سۋرەتتى قۇرايتىن قوسارلانعان بەينەنىڭ بولىكتەرى. بانكنوتتىڭ تومەنگى سول جاق بۇرىشىنداعى نومينالى دا كولبەۋ بۇرىشىن وزگەرتكەن كەزدە ءتۇسىن اۋىستىرادى.

Abai.kz