رەسەي ابليازوۆتى قازاقستانعا بەرمەيدى
رەسەي باس پروكۋرورى يۋري چايكا رەسەيدىڭ قازاقستاندىق وپپوزيتسيالىق ساياساتكەر، بۇرىنعى بانكير مۇحتار ءابليازوۆتى قازاقستانعا «ەكستراديتسيالاۋ نيەتى جوعىن» مالىمدەدى.
بۇل تۋرالى چايكا بۇگىن استانادا كوررۋپتسيامەن كۇرەس جونىندەگى مەملەكەتارالىق كەڭەس وتىرىسىنان كەيىن ايتتى.
«قازىر [مۇحتار ءابليازوۆتى] ەكستراديتسيالاۋ جونىندە مەملەكەتتىك كەڭەس دەڭگەيىندە شەشىم شىعۋى ءتيىس. ەگەر ونداي شەشىم قابىلدانسا، وندا ول رەسەيگە ەكسراديتسيالانادى. وعان رەسەيدە ايىپ تاعىلادى» دەگەن يۋري چايكا.
قازاقستاندىق «بتا بانكتىڭ» بۇرىنعى باسشىسى مۇحتار ءابليازوۆ 2013 جىلدىڭ جازىنان بەرى فرانتسيانىڭ وڭتۇستىگىندە ۋكراينا مەن رەسەيدىڭ قارجىلىق الاياقتىق تۋرالى ايىپتاۋى نەگىزىندە قاماۋدا وتىر. قازاقستان ازاماتتارىن ەكستراديتسيالاۋ تۋرالى استانا مەن ءپاريجدىڭ اراسىندا كەلىسىم جوق.
بۇعان دەيىن فرانتسيا سوتى مۇحتار ءابليازوۆتى رەسەيگە ەكستراديتسيالاۋ تۋرالى شەشىم شىعارىپ، فرانتسيا پرەمەر-ءمينيسترى مانۋەل ۆالس ءتيىستى جارلىققا 17 قىركۇيەكتە قول قويعان. قازاقستان بيلىگى ءابليازوۆتى «بتا بانكتىڭ» التى ميلليارد دوللار اقشاسىن جىمقىردى دەپ ايىپتايدى. مۇحتار ءابليازوۆ وزىنە تاعىلعان ايىپتاردىڭ ساياسي نەگىزى بار دەپ سانايدى.
ءابليازوۆتىڭ وتباسى ماسكەۋ وپپوزيتسيالىق ساياساتكەردىڭ جەكە باسىنىڭ قاۋىپسىزدىگىن قامتاماسىز ەتە الماۋى جانە ءىستى ءادىل قاراماۋى ىقتيمال دەپ، فرانتسيا بيلىگىن ەكس-بانكيردى رەسەيگە بەرمەۋگە شاقىرادى.
اباي-اقپارات
