وتكەن تاۋلىك ىشىندە قازاقستاندىق شەكاراشىلار جۇكتەرىن كونتراباندالىق جولمەن شەكارا اسىرماق بولعان قازاقستاندىق ەكى ازاماتتى ۇستادى، - دەپ حابارلايدى قر ۇقك شق ءباسپاسوز قىزمەتى.

اتاپ ايتقاندا، «قاراسۋ-اۆتو» باقىلاۋ-وتكىزۋ بەكەتىندە (قازاق-قىرعىز شەكاراسى) وسى جىلدىڭ 18-قاراشاسى كۇنى 23 ساعات 40 مينۋت شاماسىندا 1989 جىلى تۋىلعان «باقتيار» ەسىمدى قازاقستان ازاماتى ۇستالدى. ونىڭ «اۋدي-100» اۆتوماشيناسىن قاراۋ كەزىندە ونىڭ جۇك سالعىشىنان سالماعى 50 كگ بولاتىن قۇس ەتى تابىلدى (ۇيرەك ەتى). جۇرگىزۋشى وعان قاتىستى ىلەستىرمە قۇجاتتارىن كورسەتە المادى.

ۇستاۋ ماتەريالدارى جامبىل وبلىسىنىڭ قاراسۋ پوسەلكەسىندەگى ۆەتەرينارلىق قىزمەتىنە بەرىلدى.

سونداي-اق، ەلىمىزدىڭ باتىسىنداعى «شىڭعىرلاۋ-تەمىرجول» باقىلاۋ-وتكىزۋ بەكەتىنىڭ (قازاقستان – رەسەي شەكاراسى) شەكارا ناريادى وسى جىلدىڭ 19-قاراشاسى كۇنى تۇنگى 02 ساعات 26 مينۋت شاماسىندا № 058 «ورال – استانا» باعىتىنداعى جولاۋشىلار پويىزىنا شەكارالىق باقىلاۋ جۇرگىزدى. باقىلاۋ بارىسىندا «ۆەرا» ەسىمدى 1963 جىلى تۋىلعان قازاقستان ازاماتشاسىنىڭ سالماعى 30كگ بولاتىن ءتىرى شايانداردى جاسىرىن اكەتىپ  بارا جاتقانى انىقتالدى. شايانداردىڭ الدىن الا ەسەپتەگەندەگى  باعاسى 30 000 تەڭگە بولىپ شىقتى. سۋ جاندىكتەرىن زاڭسىز ۇستاعانى ءۇشىن جولاۋشى زاڭ الدىندا جاۋاپ بەرەتىن بولادى.

ۇستاۋ ماتەريالدارى باتىس قازاقستان وبلىسى شىڭعىرلاۋ اۋدانىنىڭ ىشكى ىستەر بولىمىنە بەرىلدى.

اباي-اقپارات